«Qoshqar men Teke» múltfılminiń úshinshi bólimi shyǵady. Bul týraly anımasıalyq fılmdi jasaýshy «Saq» kınostýdıasynyń rejıseri Batyrhan Dáýrenbekovtiń suhbatynda aıtylǵan. «Egemen Qazaqstan» gazeti jarıalaǵan suhbatty oqyrman nazaryna usynamyz.
Sońǵy jyldary ekranǵa shyqqan qazaq múltfılmderiniń ishinde «Qoshqar men Teke» á degennen-aq kórermenderdiń ystyq yqylasyna ıe bolǵany anyq. Qashanda shetel múltfılmine qumartyp, Shrek, Órmekshi adam, Spandjbob dese ishken asyn jerge qoıatyn qazaq balalaryn lezde baýrap alyp, kishkentaılardyń qoshqar bop alysyp-julysyp júrgenine talaı kýá boldyq.
Degenmen de qazaqy bolmysqa jaqyn, ásirese, jas kórermenderdi kúlkige bólep, kóptep jınaı bilgen «Qoshqar men Tekeniń» bar-joǵy eki-aq serıasy shyqty. Tipti, aýyz toltyryp aıtýdyń ózi uıat… Mundaı kezde shetel múltfılmderi serıal-serıal bop túsirilip, sońy kórinbeı, ubap-shubap keter edi. Jap-jaqsy tabylǵan personajdardyń nebári eki-aq serıamen shektelip qalýyna ne sebep?
– Shynynda «Qoshqar men Tekeni» jurt óte jaqsy qabyldady, – deıdi bizben áńgimesinde «Saq» kınostýdıasynyń rejıseri Batyrhan Dáýrenbekov. – Eńbegimiz baǵalanyp, bul mýltfılm Qytaıda arnaıy júldemen de marapattaldy. Elimizdegi osy salany saraptaýshy mamandar «Qoshqar men Tekeni» eń úzdik 5 múltfılmniń biri retinde baǵalady. Aıtpaqshy, úzdik dep baǵalanǵan osy beseýdiń úsheýi bizdiń «Saq» kınostýdıasynyń ónimderi. Bul da bizdiń sapaly eńbegimizdiń aıqyn bir kórinisi bolsa kerek. «Qoshqar men Tekeniń» eki serıasy «Qazaqfılmniń» tapsyrysy boıynsha túsirildi. Qarjysyn sol mekeme tóledi. Qazir úshinshi serıasynyń senarıi jazylyp, daıyn tur. Bul serıa aldyńǵylardan da qyzyqty bolatynyna senimim mol. Óıtkeni, qoshqar, teke, qasqyrlardan da bólek personajdar qosylǵan. Biraq, osy serıany túsirýge qarjy bolmaı tur. Ázirge demeýshilerge habarlasyp, usynys aıtqanymyz joq. Degenmen de bul iske qoldaý bolmasa, senarı tartpada jatyp, óz mańyzyn joǵaltyp ala ma degen de qaýpimiz bar.
Iá, elimizde múltfılm óndirisiniń áli de aıaqqa tura almaı jatqany týraly talaı márte jazyldy. Áıtse de tapqyrlyǵy men sheberligi arqasynda jurtty moıyndatyp, ulttyń bitim-bolmysyn, tynys-tirshiligin ekran arqyly jarqyratyp júrgen bul ónerli ujymǵa Mádenıet jáne sport mınıstrligi tarapynan úlken qoldaý kerek sıaqty.
Oralhan DÁÝİT
