«Astana sý arnasy» MKK synaq zerthanasy 19 lıtrlik bótelkedegi aýyz sýǵa hımıalyq saraptama jasady. Tekserýdiń nátıjesinde sarapshylar elordadaǵy birqatar aýyz sý óndirýshisi krannan quıylǵan sýdy satylymǵa shyǵaryp júrgendigin anyqtady, dep habarlaıdy Baq.kz

«Astana sý arnasy» qaladaǵy saýda ortalyqtarynda satylyp jatqan aýyz sýdyń ıondyq quramyn anyqtaý maqsatynda 57 túrli mıneraldy sýdy arnaıy tekserýden ótkizipti.

Saraptama qorytyndysy 19 lıtrlik úlken bótelkedegi aýyz sýdy óndirýshiler sý qubyrlarynyń sýyn súzgiden ótkizetinin anyqtady. Iaǵnı, hımıalyq analız bul sýdyń quramynda mıkroelementter men mıneraldardyń joq ekendigin kórsetti. Al mundaı sý tiri aǵzanyń qalypty jumys isteý teńgerimin buzady.

«Óli sýdy» turaqty túrde tutynýshylar birshama ýaqyttan keıin baýyr, búırek jáne taǵy da basqa aýrýlarǵa shaldyǵady. Sondyqtan da, «Astana sý arnasy» MKK sarapshylary mundaı sýdy tutynýshylar tamaqqa qosymsha retinde mindetti túrde mıneraldy qospalar, dárýmender ishýleri qajet deıdi. Máselen, saraptamadan ótkizilgen sýdyń quramynda kálsı men magnıı belgilengen standarttardan tómen ekendigi anyqtalsa, ftor múldem joq deýge bolady. Al aǵzaǵa ftor jetispeýshiligi tisjeginiń paıda bolýyna, kálsı tuzdarynyń jetispeýshiligi súıek ulpasy damýynyń buzylýyna ákep soqtyrady, al magnııdiń jetkiliksizdigi onkologıalyq aýrýlarǵa shaldyǵý qaýpin arttyrady.

Búkilálemdik densaýlyq saqtaý uıymynyń málimeti boıynsha, adamdardyń densaýlyǵy negizinen osy sapasyz sýdyń saldarynan nasharlaıdy. Aǵzaǵa mıneraldy tuzdar men dárýmenderdi jetkizýshi de, ony las zattardan tazartýshy da dál osy sý bolǵandyqtan, onyń sapasyna asa kóńil bólgen jón. Mıkrobıologıalyq jáne hımıalyq kórsetkishterge saı kelmeıtin aýyz sýdy tutyný oba, tyrysqaq, gepatıt jáne gastroenterıt sekildi jaman aýrýlarǵa shaldyqtyratyny taǵy belgili.

Al, elordalyqtar ol aýyz sýdy dúkennen 300-600 teńge kóleminde satyp alyp júr.

Memlekettik standarttarǵa saı, kez kelgen sýdyń túri, dámi, ıisi, sanıtarly-toksıkologıalyq kórsetkishi syndy quramynyń barlyǵy qatań talaptarǵa saı bolýy tıis.

«Astana sý arnasynyń» mamandarynyń aıtýynsha, aýyz sý óndirýshilerdiń kóbisi zattańbada onyń qaıdan alynatyndyǵyn, hımıalyq jáne mıneraldyq quramyn kórsetpeıdi. Keıbir sýdyń sapasy zattańbada kórsetilgen belgilermen sáıkes kelmeıtindigi de belgili bolǵan.

«Astana sý arnasy» MKK baspasóz qyzmetiniń málimetinshe, elordadaǵy aýyz sýdyń quramy 86,8 mg/dm3 hlorıdten turady, kermektigi - 4,0 mg ekv/dm3, aýyr metaldar, munaı ónimderi, fenol, pestısıdter joq. Qazirgi ýaqytta elordada 27 kásiporyn sý shyǵarýmen aınalysady. Onyń 11-i bótelkege quıylatyn sý shyǵarsa, 16-sy sýdy avtomatty túrde tazalaıtyn qurylǵylardy úılerge ornalastyrýmen aınalysady.

Eske sala keteıik, buǵan deıin «Astana Sý arnasy» elordanyń sýy sapaly ári súzgiden ótkizbeı-aq ishýge jaramdy degen bolatyn.