AQSH-ta 3 jyl oqyǵan qyzyljarlyq Qaıyrjan Aısın shetelde alǵan bilimi men tájirıbesin Qazaqstanda utymdy paıdalanyp júr. Jas kásipker kúnine 15 tonna turmystyq qaldyq irikteıdi. Bul isi arqyly bir jaǵynan paıda tapsa, ekinshi jaǵynan ekologıa tazalyǵyna úlesin qosyp júr dep habarlaıdy baq.kz.

Petropavl turǵyndary kúnine orta eseppen 150 tonna qoqys shyǵarady eken. Sol turmystyq qaldyqtyń 75 paıyzyn kádege jaratýǵa bolady.

«2012 jyly Petropavlda makýlatýra qabyldaıtyn kásiporyn jumysyn bastaǵan bolatynmyn. Ońaı boldy deı almaımyn. Degenmen, isim birtindep alǵa basty. «Bıznestiń jol kartasy» memlekettik baǵdarlamasy boıynsha 20 mln. teńge nesıe aldym. Ol qarajatqa qoqysty irikteýge arnalǵan qondyrǵylar satyp aldym. Qaladaǵy qoqys jáshikteriniń janyna plasık bótelkelerdi bólek jınaýǵa arnalǵan jáshikter qoıdyq», – deıdi «Vtorsyre» JSHS dırektory Qaıyrjan Aısın.

Bastapqyda qoqysty bólip laqtyrý petropavldyqtarǵa jat kóringenimen, turǵyndar oǵan da úırenisip ketti. Qazir tipti ádetke aınaldy deýge bolady. «Vtorsyre» JSHS ázirge qaǵaz, plasık pen shynyny irikteıdi. Turmystyq qaldyqtardy qaıta óńdeýmen aınalysatyn kásiporyndarmen tyǵyz baılanys ornatqan. Petropavlda suryptalǵan qoqystyń bir bóligi Almatyǵa jol tartsa, endi bir bóligi kórshiles Reseıge jóneltiledi.

Jýyrda «Vtorsyre» seriktestigi Soltústik Qazaqstan oblystyq tabıǵat qorlary jáne tabıǵatty paıdalanýdy retteý basqarmasymen birlesip, «Makýlatýra tapsyr da, aǵashtardy saqtap qal!» atty aksıa jarıalady. Sharanyń alǵashqy kúninen-aq oqýshylar belsendilik kórsetti.

«Biz atalǵan aksıaǵa ótken jyly da qatysqanbyz. Sodan beri jınap júrgen biraz qaǵaz qory bar. Úıde 3 oqýshymyz. Qaǵaz jeterlik. Barlyq synyptastarymmen birge men de búgin bir qushaq qaǵaz ákelip tapsyrdym», – deıdi Petropavl qalalyq birinshi gımnazıa oqýshysy Anastasıa Korochenko.

Aksıany bıylǵy oqý jylynyń sońynda qorytyndylaý josparlanyp otyr. Ótken jyly petropavldyq oqýshylar 35 tonna makýlatýra tapsyrǵan bolatyn.

«Barlyq mektepterge makýlatýra salýǵa arnalǵan jáshikter qoıylady. Osylaısha biz tabıǵatqa keletin zıandy azaıtamyz, oqýshylardy mádenıetke úıretemiz jáne áleýmettik jaǵdaıy tómen jandarǵa qol ushyn beremiz», – deıdi Soltústik Qazaqstan oblysy tabıǵat qorlary jáne tabıǵatty paıdalanýdy retteý basqarmasynyń bas mamany Janar Báshenova.

Statısıkaǵa súıensek, 1 tonna qaǵaz 5 aǵashty kesýden saqtap qalady eken. Qaǵazdy 6 retke deıin qaıta óńdep, turmysta paıdalanýǵa bolady.