Búgingi kúni kámelet jasqa jetpeı júkti bolyp qalatyn qyzdardyń sany azaıar emes, kóbeımese. Bundaı jaǵdaılardyń aldyn alý úshin qandaı amaldar qoldaný kerek ekenin arnaıy mamandar da taba almas. Dárigerlerdiń aıtýynsha, erte júktilikke kóbine aýyldan qalaǵa oqýǵa kelgen jas qyzdar ushyrap jatady eken.
Aqtóbede kámelettik jasqa tolmaǵan qyzdardyń arasyndaǵy júktilik azaımaı otyr. Al dárigerlerdi jynystyq qatynasty erte bastaıtyn jasóspirimderdiń ómiri men densaýlyǵy alańdatady. Qazirdiń ózinde oblysta 14-16 jas aralyǵyndaǵy 170-ke jýyq mektep pen kolej oqýshycy aıaǵy aýyr áıelderdiń tiziminde tur, dep jazady 31 telearna.
17 jasynda balaly bolyp, jastaıynan ana atanǵan qyzdardyń biri Kámıla Temirbekova. Aıtýynsha, júkti bolǵan kúnnen bastap anasy qyzynan teris aınalypty. Otbasynda kúnde urys-keris, janjaldan sharshaǵan jetkinshek aqyry analar úıine kelýge májbúr bolǵan. Qazir onyń Álimjan esimdi eki aılyq uly bar.
KÁMILA TEMİRBEKOVA, Jas ana:
- 20 kúndeı úıde boldym. Meni mamam alyp ketti roddomnan. Kúnde urysamyz. Bir aı boldy úıden ketip qalǵanyma. Maǵan osy jer jaqsy. Nege? Óıtkeni osy jerde urys joq, aıqaı joq. Mamam keldi, biraq meniń úıge barǵym kelmeıdi.
JANAR QOJANOVA, Tilshi:
- Jastaıynan júkti bolyp, bastaryna qıyndyq túsken jas qyzdar kóbi mine osy analar úıin kelip panalaıdy. Taǵdyrdyń tálkegine túsip, týǵandary teris aınalǵan qyzdar osy jerden sábıli bolyp, osy jerden aıaqtanýǵa májbúr. Óıtkeni olardy túsinetin jan, baratyn jerleri joq.
Jalpy mektep qabyrǵasynan bastap jynystyq qatynasqa túsetin oqýshy qyzdardyń sany, ókinishke qaraı, Aqtóbede jyl saıyn artyp keledi. Búgingi kúnniń keseline aınalǵan bul jaǵdaı dárigerlerdi de alańdatyp otyr. Tek ótken eki aıdyń ishinde aıaǵy aýyr bolǵan 24 qyz tirkelip úlgergen. Aq halattylardyń aıtýynsha, qyz balalardyń erte eseıip, jynystyq qatynasqa erte túsýi kóbine otbasyndaǵy jaǵdaılarǵa baılanysty. Óıtkeni kóp ýaqytyn jumysta ótkizetin ata-ana balalaryn qadaǵalaı almaı jatady. Al osyndaı erkindikti sezingen jas jetkinshekter artynan túrli jaǵdaılarǵa dýshar bolady deıdi gınekolog - dárigerler.
SALTANAT TÝBÝLBAEVA, Aqtóbe oblystyq perınataldyq ortalyǵynyń balalar gınekology:
- Ótken 2016 jyly kámelettik jasqa bolmaǵan 145 qyz bala bizge keldi. Júkti bolǵandardyń 90 paıyzy 17 jasqa tolǵan qyzdar, al 10 paıyzy 14 pen 16 jas aralyǵyndaǵylar. Jalpy mundaı jaǵdaıǵa áleýmettik jaǵdaıy tómen emes, kerisinshe tolyqqandy otbasynan shyqqan qyzdar tap bolyp jatady. Bir aıta keterligi bul jasta qyzdardyń aǵzasynda etekkirdiń kelý ýaqyty da buzylady. Al júrek aınýdy olar asqazan dep oılaıdy. Sondyqtan aıaǵy aýyrlaǵan qyz da, onyń anasy da júktilikti der kezinde bilmeıdi. Bizge kesh kelip jatady.
Dárigerlerdiń aıtýynsha, erte júktilikke kóbine aýyldan qalaǵa oqýǵa kelgen jas qyzdar ushyrap jatady. Jáne sol kópshiliktiń basym bóligin kolejde oqıtyn qyzdar qurasa, qalǵany 10 men 11- synyptaǵy mektep oqýshylary. Erte eseıip, ana atanatyn qyzdar kóp jaǵdaıda turmysqa shyǵyp jatsa, qalǵandarynyń balasyn qyzdyń ata-analary óz attaryna jazdyryp, ózderi asyrap jatady eken.
