Rasyn aıtsam, Bilim mınıstrliginiń qazaq tili men ádebıetin tizimnen alyp tastady degenge onsha bir mán bermeppin. "Kezekti bir shý shyǵar, olaı bolýy múmkin de emes qoı" degem de qoıǵam. "Ákem aty shapqan saıyn órleıdi" demekshi, baqsam myna áńgime shynǵa aınalyp bara jatqanǵa uqsaıdy ǵoı ózi.
Oý, Saǵadıev myrza abaılasańyzshy! Elbasynyń qabaǵyna qaramasańyz da, eldiń qabaǵyna qarańyz. Qazaqtyń tili joq bolsa, siz de, sizdiń ákeńiz, bolashaq urpaǵyńyz da joq. Siz bálkim, akademıktiń balasy, aıtaltaq bop ósken shyǵarsyz. Sol sebepti de ulttyń janyn jan-júregińizben túsine almassyz. Mınıstr bolmaı jatyp-aq, affshordaǵy aqshalylardyń qaraly tiziminen atyńyz shyqqanda da únsiz qaldyq qoı osy. Endi keldi, jas adam jaǵasynan jarmaspaıyq dep. "Bir apamnan, bir apam soraqy" demekshi, sizdiń reformalaryńyzdaǵy soraqylyqtyń biter túri baıqalmaıdy.Sizdi bilmedim, alaıda myna qazaqtyń erteńgi kúnnen úmiti úlken. Bile bilseńiz, sizdiń oryntaq ta eń bir urymtal mansapqa jatady. Óıtkeni onda eldiń bolashaǵy tur. Demek, sizge degen jaýapkershilik te eki ese joǵary. Siz kerisinshe, bárimizdi masqara qyldyńyz ǵoı. Álde, "atyń shyqpasa jer órte" dep, eldiń esinde osylaısha qalý maqsatyn qoıǵansyz ba, aldyńyzǵa. Siz eldiń de, Elbasynyń da aldynda jaýap beresiz áli. Kóptiń nalasymen oınamańyz. Ondaılardyń sońy eshýaqyt jaqsylyqqa aparǵanyn kórmek turǵaı, estigen pende de joq. Álde de bolsa, qalǵan-qutqan abyroıyńyzdy saqtap qalyńyz. "Halyq kóneden suraıdy, qaıyq kemeden suraıdy" degen. Aqyl suraıtyn kemeńiz bar ǵoı, shúkir....

Elýbaı Áýezovtiń feısbýk paraqshasynan