AQSH 21 qańtardan 75 el azamattaryna ımıgrasıalyq vızalardy óńdeýdi ýaqytsha toqtatady. Bul qadam úmitkerlerdi irikteý men tekserý tártibin qaıta qarap jatqanda, «public charge» ólshemin kúsheıtý aıasynda qabyldandy.
Jańalyqty Fox News Digital qyzmettik jazbaǵa súıenip habarlady. Alǵashqy habarda barlyq vızalar týraly aıtylsa, keıin naqtylaý boıynsha toqtatý ımıgrasıalyq vızalarǵa ǵana qatysty delindi.
Ne ózgerdi?
Konsýldyqtarǵa úmitkerlerge qoldanystaǵy zańnamaǵa súıenip, vıza berýden ýaqytsha bas tartý jóninde nusqaý berildi. Prosedýralardy qaıta baǵalaý aıaqtalǵansha osy tártip saqtalady.
Qaı elder ataldy?
Fox News jarıalaǵan qujatta Reseı, Taıland, Egıpet, Aýǵanstan, Brazılıa, Irak, Iran, Iemen, Somalı jáne Nıgerıa ataldy. Tolyq tizim áli resmı jarıalanbady.
Áleýmettik jelilerde taraǵan beıresmı tizimder týraly málimetti resmı derekkózder rastamady. Jospar qurarda naqty aqparatty AQSH Memlekettik departamentiniń nemese elshilikterdiń resmı habarlamasynan teksergen jón.
Nege mundaı sheshim qabyldandy?
Federaldyq bılik «public charge» qaýpin joǵary dep baǵalanatyn ótinish berýshilerge nazaryn kúsheıtti. Mınnesota shtatyndaǵy áleýmettik tólemder boıynsha tergeýlerden keıin Somalı baǵytyna bólek nazar aýdaryldy.
«Public charge» degen ne?
Qarashada Memlekettik departament dıplomatıalyq ókildikterge «public charge» ólshemderi boıynsha jańa tekserý tártibin joldady. Endi konsýldyqtar úmitkerdiń densaýlyǵyn, jasyn, aǵylshyn tilin bilý deńgeıin, qarjylyq turaqtylyǵyn jáne uzaq merzimdi medısınalyq kútimge muqtajdyq táýekelin eskeredi. Buǵan deıin memlekettik aqshalaı kómek alǵan jaǵdaılar da nazarǵa alynady.
Resmı túsinikteme
«Eger úmitker memlekettiń moınyna salmaq salýy múmkin bolsa, Memlekettik departament ony qabyldamaýǵa ejelgi ókiletin qoldanady. Bul – amerıkalyq salyq tóleýshilerdiń jomarttyǵyn qorǵaýǵa baǵyttalǵan qadam», – dep málimdedi departament ókili Tommı Pıggott. Erekshelikter óte shekteýli túrde qaralatyny atap ótildi.
Zań tarıhy qysqasha
«Public charge» normasy ondaǵan jyl boıy qoldanysta boldy. 2019 jyly Donald Tramp ákimshiligi krıterıılerdi keńeıtti, keıin bul túzetýlerdiń bir bóligi sottarda daýlandy, al Baıden ákimshiligi olardy keri shegindirdi. Qazir tártipterdi qaıta baǵalaý júrip jatyr.
Qazaqstanǵa áseri qandaı?
Tolyq tizim resmı jarıalanbaı turǵandyqtan, Qazaqstannyń mártebesin naqty aıtý qıyn. Fox News keltirgen on eldiń ishinde Qazaqstan atalmady. Imıgrasıalyq emes vızalar (mysaly, týrısik nemese stýdenttik) jóninde bul habarlamada ózgeris kórsetilmedi.
Aqparat Fox News Digital jáne Tengrinews.kz materıaldaryna súıenip jazyldy.
Bul týraly Qamshy.kz aqparat agenttigi habarlaıdy.
