Qazaqstan Respýblıkasynyń prezıdenti Nursultan Nazarbaev otandyq jáne halyqaralyq BAQ-pen kezdesý barysynda óziniń Qazaqstandaǵy belgili obektilerge óziniń  atyn berýge baılanysty óz pikirin bildirdi dep habarlaıdy qamshy.kz  Today.kz-ke silteme bere otyryp. Esquire jýrnalynyń shef-redaktory Gúlnar Bajkenova qoıǵan: «Qazirgi ýaqytta áleýmettik jelide sizdiń qurmetińizge arnap án shyrqap, óleń shyǵaryp, kıno túsirilip jatqandyǵy týraly kóp jazatyn boldy. Depýtattar tarapynan da  sizge arnap eskertkish ornatý, keıbir obektterge atyńyzdy berý týraly másele jıi qozǵalady. Osyǵan kózqarasyńyz qandaı?» degen suraǵyna prezıdent bylaı dep jaýap qaıyrdy:

«Maǵan bul kerek emes. Men sizderge árqashan osyny aıtamyn. Mark Avrelıı óz ýaqytynda bylaı degen: "Eskertkishterdi tek ózderiniń bolashaq urpaqtardyń esinde, júreginde qalatynyna senbeıtinder ornatady. Eshqandaı eskertkish, adamnyń jasaǵan tirlikterin kórsete almaıdy. Máselen, Stalın, Lenınge kezinde ózderiniń iltıpatyn bildirip, eskertkish ornatqan adamdar keıin ózderi sol basshylarǵa qarsy shyǵyp, jek kórgen. Bolashaqta men prezıdenttikten ketken ýaqytta keler urpaq dál osylaı oılasa ne bolmaq?»-dedi.

Suraqqa jaýap berý barysynda prezıdent mundaı is-áreketterge iltıpatsyzdyǵyn bildirdi. Sonymen birge, óz sózinde elbasy óz atyn tek Nazarbaev Ýnıversıtetine usynǵan ýaqytta ǵana kelisimin bergendigin aıtty.

«Bul ýnıversıtet Qazaqstannyń ǵylymı ortalyǵyna aınaldy. Men onyń erekshe joǵarǵy oqý ornyna aınalatynyna sendim, sondyqtan da óz kelisimimdi berdim. Barlyq joǵarǵy oqý oryndary osy ýnıversıtetten úlgi alǵanyn qaladym. Al endi qalǵan nárselerge qatysty men ózimniń qarsy ekenimdi aıttym. Taǵy da aıtamyn: maǵan bul qajet emes. Adam haqynda onyń is-áreketi, eńbegi, adamgershiligi aıtýy qajet. Artynda qaldyrǵan izi men orny aıtýy qajet. Men el basqarýym kerek boldy. Elime basshy bolyp  Qazaqstan degen memleketti kartada belgilep, onyń astanasyn salý maǵan berilgen mindet boldy. Endi mine, Astana –búgin bizdiń elimizdiń maqtanyshy bolyp otyr»-dedi elbasy.