Ortalyq komýnıkasıalar qyzmetinde «QTJ» UK» AQ «Áleýmettik jobalar qory» men «Samruk-Kazyna Trust» áleýmettik jobalardy damytý qorynyń «Densaýlyq» jáne «Salamatty Qazaqstan» mamandandyrylǵan medısınalyq poıyzdarynyń jumysy bastalǵany týraly baspasóz konferensıasy ótti dep habarlaıdy «Qamshy» aqparattyq agenttigi.

Quramdardyń júrý baǵyty men dárigerler brıgadasy kórsetetin qyzmetteri týraly «QTJ» UK» AQ «Áleýmettik jobalar qory» ujymdyq qorynyń dırektory Erbol Keńgirbaev, «Samruk-Kazyna Trust» áleýmettik jobalardy damytý qorynyń Basqarýshy dırektory Lıma Dıas, «Apattyq medısına temirjol gospıtali» AQ basqarma tóraǵasy Ábdilmanov Ǵabylnur aıtyp ketti.

Jobanyń arqasynda stansıalar men olarǵa irgeles jatqan eldi mekenderdiń halqy naýqastyń aldyn alý úshin medısınalyq aldyn ala  tekserýden ótedi, qajetti alǵashqy kómek, kásibı konsýltasıa men ári qaraı emdelý úshin jaqyn ornalasqan medısınalyq ortalyqtarǵa joldamalar alady.

Budan buryn Elbasy N.A. Nazarbaev medısınalyq poıyzdardyń jumysyn joǵary baǵalap, kóliktik medısınalyq qyzmet kórsetýdiń ózektiligin basa atap ótken bolatyn.

Qazaqstannyń ońtústik jáne batys óńirleriniń halqy 2017 jylǵy 18 sáýirden bastap 2017 jylǵy 20 jeltoqsan aralyǵy kezeńinde «Densaýlyq» poıyzynyń júrip ótken joly boıynsha joǵary biliktilikti medısınalyq kómek ala alady.

«Salamatty Qazaqstan» medısınalyq poıyzy Qaraǵandy qalasynan attanady jáne 2017 jylǵy 11 sáýirden bastap 2017 jylǵy 6 qarasha aralyǵynda ortalyq, soltústik, shyǵys óńirleriniń qalalary men keńsharlaryna barady.

Dárigerler brıgadasynyń quramynda terapevt, pedıatr, nevropatolog, okýlıs, lor, gınekolog, hırýrg, ýrolog, mammolog, stomatolog sıaqty negizgi baǵyt mamandary bar. Medısınalyq poıyz qyzmetterin Qazaqstannyń shalǵaıdaǵy eldi mekenderiniń medısınalyq kómekke muqtaj turǵyndary, temirjol qyzmetkerleri men zeınetkerler jáne olardyń otbasy músheleri paıdalanýǵa múmkindikteri bar.

«QTJ» UK» AQ Áleýmettik jobalar qory ujymdyq qorynyń dırektory Erbol Keńgirbaev medısınalyq poıyzdar jumysyn uıymdastyrý barysyna tolyq toqtalyp ketti: «Ujymdyq qor poıyzdardyń qozǵalysyn, olarǵa kútim jasalýy men jóndelýin uıymdastyrady, poıyzdar, jabdyqtar men qyzmetshileriniń kúzetilýin uıymdastyrady, dárigerler men poıyz brıgadalaryn tamaqpen qamtamasyz etedi. TJ komıteti dárigerler men jabdyqtar qyzmetine jaýapty. Poıyzdardyń qozǵalys kestesi azamattardyń ótinimi men memlekettik organdar suraýlary negizinde shalǵaıdaǵy stansıalarda medısınalyq pýnktterdiń bolmaýyn eskere otyryp jasalady. Sondaı-aq QTJ qaı oblystarda jáne medısınalyq poıyzdardyń qanshalyqty qaı ýaqytta bolǵanyna taldaý júrgizedi. Ár medısınalyq poıyz kóp beıindi mamandandyrylǵan konsýltatıvtik-dıagnostıkalyq kómek kórsetý úshin arnaıy jabdyqtalǵan, sondaı-aq medısınalyq personaldyń turýyna arnalǵan segiz vagonnan turady. Medısınalyq personal men poıyz brıgadasyna arnalǵan eki vagon-kýpede aýa baptaǵyshtar, teledıdarlar, tońazytqyshtar, sebezgi, bıo-dárethanalar men kir jýý orny ornatylǵan. Sondaı-aq vagon-restoran men vagon-dızeldi generatory bar. Onyń kúshi TJ jaǵdaıynda shaǵyn turǵylyqty eldi mekenderge jaryq berýge jetkilikti. Qalǵan tórt vagon tek halyqty qabyldaýǵa jáne medısınalyq kómek kórsetýge arnalǵan. Bul jaǵdaıda dárigerlerge arnalǵan jaıly vagondar, poıyzdardyń jolda jylyna 300 kún bolýyna oraı jabdyqtalǵan».

«Samruk-Kazyna Trust» áleýmettik jobalardy damytý qorynyń basqarýshy dırektory Lıma Dıas bylaı dep atap ótti: «Halyqqa arnalǵan medısınalyq qyzmet sapasy men qoljetimdiligin arttyrý – memlekettiń basym mindetteriniń biri. Mamandandyrylǵan medısınalyq poıyzdar birneshe jyl boıyna shalǵaıdaǵy aýdandar halyqtarynyń óz densaýlyqtaryna kútim jasaýlaryna kómektesip, osy máseleni jemisti sheship keledi. 2010 jyldan beri medısınalyq poıyzdar mamandary 1052 stansıa turǵyndaryn qarady, bul 300 myńnan astam adam, olardyń ishinde úshten biri – balalar. Kóliktik medısınanyń damýyna oraı, kóptegen pasıentter uzaq jyldar ishinde dárigerler qaraýyna alǵash ret keldi. Aýrýdyń aldyn alǵan dárigerler sozylmaly, qaterli isikter men týberkýlezdiń bastalǵan mezetin aıqyndap alýy mańyzdy».