Kúni keshe Memleket Basshysy N.Á. Nazarbaevtyń «Bolashaqqa baǵdar: rýhanı jańǵyrý» atty «Egemen Qazaqstan» gazetinde jarıalanǵan maqalasy máni men mazmuny, mańyzy men maǵynasy qosa órilip, ózindik ómirsheńdigin kórsetken kólemdi týyndy bolǵany sózsiz. Tarıhtyń tolqyndaryn tarazylaýdan bastalyp, ult bolmysyn barynsha baǵamdaýmen baılanysyp, memlekettik atqarýy tıis mindetterin mejelep bergen maqala bizdiń de tebirenýimizge túrtki boldy.

Qoǵamǵa qozǵaý salǵan Elbasy ultty uıystyrýǵa, keshegimizdi saralap, keleshegimizdi kemeldendirýge úndep, «ulttyq kodty» saqtap qalýdyń san alýan baǵytyn baıyptaıtyn tamasha týyndysyn tartý etti.

Maqalanyń «HHİ ǵasyrdaǵy ulttyq sana» dep atalǵan alǵashqy taraýynda Nursultan Ábishuly jańa ǵasyrdyń talaptaryna tótep berý úshin ekonomıkamyzdyń ál-aýqatyn arttyryp qana qoımaı, sanany jańǵyrtýdyń birneshe ereksheligin alǵa tartty. Dálirek aıtqanda, ulttyq qundylyqtarymyzdy ulyqtap, saltymyzdy saqtap, dástúrlerimizdi dáriptep, rýhanı baılyqtarymyzdy abattandyrýǵa shaqyrdy. Jershildik sekildi jahandyq jańǵyrýdyń talaptarymen janaspaıtyn jaǵymsyz ádetterden arylyp, ysyrapshyldyqty ysyryp, yqylym zamannan qalyptasqan ymyragershilikti ydyratpaýdyń yńǵaıyn Egemen elge erkin tilmen taǵy bir márte jetkizdi.

Budan bólek, jastardy táýlik saıyn túrlengen tehnogolıalyq dáýirdiń qarqynynan qaımyqpaı, bilim keńistiginde memleket usynǵan múmkindikterden qur qalmaı, básekege qabilettilikti arttyrýǵa qaýqarly bolýyn da atap ótti. Bul – Elbasynyń ósıetin óskeleń urpaqqa ónege etýiniń ólsheýsiz úlgisi degen sóz.

Memleket basshysy munymen qosa ǵasyrlar qoınaýynda qalyp, jyldar óte saıası sebeptermen de sergeldeńge túsken «qazaq álipbıiniń»  taǵdyryn da nazardan tys qaldyrǵan joq. Elbasy bul máseleni birneshe jyldan beri kóterip kele jatqanyn bilemiz. Desek te, maqaladan latyn qarpine kóshetin kezdiń kelgenin oqyǵanymyzda qatty qýandyq. Tipti, bıylǵy jyldan bastap qazaq álipbıiniń jańa grafıkadaǵy biryńǵaı standartty nusqasyn qabyldaý kerektigi aıtylyp, Úkimettiń iske kirisetinin de tilge tıek etilipti. Nátıjesinde 2025 jylǵa qaraı latyn álipbıine tolyqtaı kóshý jospary da jarıalanǵan. Osyndaı quptarlyq isti jasotandyqtarmen qosa bizdiń barsha zamandastarymyz, qatarlastarymyz, jalpy jastar qaýymy qoldaıdy dep oılaımyz.

Maqaladaǵy taǵy bir baǵdar – «Jańa gýmanıtarlyq bilim. Qazaq tilindegi 100 jańa oqýlyq» jobasynyń qolǵa alynýy. Bul  – álemdegi eń tańdaýly 100 oqýlyqty ártúrli tilderden qazaq tiline aýdarylýy degen sóz. Keıde stýdentter qaýymymen kezdeskenimizde memlekettik tilderdegi oqýlyqtar sanynyń azdyǵyn alǵa tartýshy edi. Mine, endi olardyń da armandary oryndalar kúnniń alys emestigin ańǵardyq.

Patrıotızmniń parasattylyǵyn paıymdaıtyn «Týǵan jer» baǵdarlamasynyń qolǵa alynatynyn aıtqan Prezıdent adamzat balasy úshin qasterli uǵym sanalatyn «Týǵan jerdiń» qadir-qasıetin saralaı ótipti. Bul baǵdarlama óz kezeginde elimizdiń árbir aımaǵynda ótkennen syr shertetin kóne ǵımarattar men tarıhı eskertkishterdi, mádenı nysandardy qalpyna keltirýdi, óńirlerde ólketaný, ekologıalyq tazartý jumystaryn júrgizýdi, aýyl aımaqty abattandyrýdy kózdeıdi. Kásipkerler de, zıaly qaýym ókilderi de,                    shendi-shekpendiler de, jastar da týǵan jerlerine qamqorlyq tanytyp, janashyrlyqtyń jańasha úlgisin kórsetýleri qajet ekenin usynǵan Kóshbasshymyzdyń bastamasy qoldaýsyz qalmaýy qajet dep sanaımyz.

Sonymen qatar, Elbasynyń Táýelsizdik jyldarynda óz aqylymen, eńbegimen, bilimimen, darynymen oza shapqan azamattardyń «Qazaqstandaǵy  100 jańa esim» jobasyn júzege asyrý ıdeıasymen de tanysyp shyqtyq. Jasampazdyqtyń jarqyn jyldarynda jaqsylyqtyń janynan tabylǵan jandardyń bul jınaǵy jastarǵa da úlgili joba bolary aqıqat.

Dana halqymyzdyń «ÓZ ERİN ÓZ PERZENTİ ESKERMESE, EL QAIDAN ALSYN TAÝYP KEMEŃGERDİ?» degen qanatty sózi kóregendiliktiń kósh basyndaǵy Elbasymyz Nursultan Ábishuly Nazarbaevtaı taý tulǵaǵa arnalyp aıtylǵandaı dep sózimizdi túıdik.

Danıar Súndetbaev

«Nur Otan» partıasy janyndaǵy

«Jas Otan» Jastar qanatynyń tóraǵasy