Búgin Astana qalasyndaǵy «Beıbitshilik jáne kelisim» saraıynda «Islam jáne órkenıet» taqyrybyna arnalǵan İİ Respýblıkalyq ımamdar forýmy bolyp ótti dep habarlaıdy Qamshy AA QMDB baspasóz qyzmetine siltep. Egemen elimizdiń túkpir-túkpirinen 500 ımam jınaldy. Forýmǵa QR Din isteri jáne azamattyq qoǵam mınıstri Nurlan Ermekbaev, Bas múftı Erjan qajy Malǵajyuly, Qazaqstan halqy Assambleıasynyń tóraǵa orynbasary Darhan Qamzabekuly bastaǵan memleket jáne qoǵam qaıratkerleri men Ózbekstan, Qyrǵyzstan, Mońǵolıa elderiniń bas múftıleri, Reseıdiń Omby, Altaı aımaǵynyń múftıleri, zıaly qaýym ókilderi, ǵalymdar, dintanýshylar qatysyp, ıgi bastamaǵa oraı oń pikirlerin bildirip, baıandama jasady.

Osymen ekinshi márte uıymdastyrylyp otyrǵan Respýblıkalyq ımamdar forýmy asyl dinimizdiń damýyna tyń serpin berip, jańa belesterge jeteleri sózsiz. «Keńesip pishken tonnyń kelte bolmaıtynyn» eskersek, búgingi biregeı basqosýdyń da baǵasy tym erekshe. Din salasyndaǵy jumystardy ońtaılandyryp, tıimdi júıe qalyptastyrýdaǵy mańyzdylyǵy da ushan-teńiz.

Osydan eki jyl buryn elimiz boıynsha tuńǵysh ret ótkizilgen Respýblıkalyq ımamdar forýmynda QMDB-nyń jumys baǵytyn aıqyndap, baǵdaryn mejelegen tórt birdeı qujat qabyldanǵan bolatyn. «Qazaqstan musylmandarynyń Tuǵyrnamasy», «Musylmannyń tulǵalyq beınesi», «Imamnyń tulǵalyq kelbeti», «QMDB qyzmetkeriniń etıkasy» dep bul tarıhı qujattar sol forým aıasynda biraýyzdan qabyldanyp, sodan beri asyl dinimizdiń damýyna laıyqty úles qosyp keledi. Osy qujattar negizinde elimizdegi din qyzmetkerleriniń bilimi men biliktiligi, ádebi men mádenıettiliginiń jańa ıdealy qalyptasyp, musylman jamaǵatynyń jarqyn beınesi somdala bastaǵan bolatyn.

Bas múftı Erjan qajy Malǵajyuly da óz baıandamasynda dinı basqarma aldynda turǵan negizgi mindetterdiń biri – qazirgi zaman talabyna laıyqty ımam daıyndaý ekenin aıta kelip, «Úzdik zıatker ımam» tujyrymdamasyn – din qyzmetkerleriniń bedeli men bilimin arttyrý baǵytyndaǵy biregeı qadam dep baǵalady.

«Qabyldanǵaly turǵan Tujyrymdamada din qyzmetkerleriniń, ıaǵnı Bas ımam, naıb ımam, ustaz, molda, azanshylardyń laýazymdyq mindeti men mártebesi aıqyndaldy. Budan bylaı din mamandary joǵary laýazymdy qyzmetterge kezeń-kezeńimen satylap taǵaıyndalatyn bolady.

Óıtkeni, ımam qyzmeti tek bes ýaqyt namazǵa ımamdyq etýmen shektelmeıdi. Imamnyń ýaǵyz aıtý, dinı rásimderdi atqarý, meshitke kelgen árbir jamaǵattyń suraǵyna jaýap berý, rýhanı is-sharalardy uıymdastyrý syndy ózine júktelgen jaýapkershiligi joǵary mol jumystary bar.

«HHİ ǵasyrdyń úzdik zıatker ımamy» atty qujattyń basty maqsaty – HHİ ǵasyrdyń ımamdaryn zaman talabyna saı jan-jaqty bilimdi, bilikti, zaıyrlylyq prınsıpterdi ustaný jaǵynan basqa jamaǵatqa úlgi etý. Sonymen qatar, bul Tujyrymdama elimizdiń musylmandaryn birlikke, tatýlyqqa shaqyryp, halyqty ultymyzdyń ádet-ǵuryptaryn syılaýǵa, zaıyrlylyq prınsıpterdi ustanýǵa, dinı ekstremızm men terorızmniń kez kelgen túrine tózbeýshilikke úndeıdi», – dep atap ótti Bas múftı Erjan qajy Malǵajyuly.

Qazaqstan musylmandary dinı basqarmasynyń jumys úderisin jańa belesterge kótergen bul tarıhı qujattardyń zańdy jalǵasy retinde búgingi İİ Respýblıkalyq ımamdar forýmynda eki birdeı tarıhı qujat talqylanyp, qatysýshylardyń biraýyzdan maquldaýyna ıe boldy. QMDB-nyń naıb múftıi, «Áziret Sultan» meshitiniń bas ımamy Serikbaı qajy Oraz forýmǵa qatysýshylarǵa «ÚZDİK ZIATKER IMAM» tujyrymdamasyn tanystyryp, biregeı qujattyń berer paıdasy men tıgizer kómegi jaıynda keńinen túsindirip ótti. El aýmaǵyndaǵy meshitterde dinı bilimi men biliktiligi joǵary, jasampaz, dinı máselelerdi úılestirýdi sheber meńgergen úlgili, isker, aǵartýshy mamandar qalyptastyrýǵa negizgi tirek bolatyn qujat jaıynda ózge de qonaqtar oń pikirlerin bildirip, forým jumysyna nıettestikterin jetkizdi. Aıta keteıik, «Úzdik zıatker ımam» tujyrymdamasy din salasyndaǵy qyzmetkerlerdiń mansaptyq taǵaıyndaýlaryna tyń tártip engizetin bolmaq.

İİ Respýblıkalyq ımamdar forýmynda qabyldanǵan kelesi qujat – Qazaqstan musylmandary dinı basqarmasynyń ustanymyn aıqyndaıtyn «Hanafı mázhaby men Matýrıdı senim mektebi –  Qazaqstandaǵy Islamnyń dástúrli joly». Atalmysh qujatty forým qonaqtaryna QMDB-nyń naıb múftıi, «Nur Astana» Ortalyq meshitiniń bas ımamy Naýryzbaı qajy Taǵanuly tanystyrdy. Bul qujattardy qabyldaýdaǵy negizgi maqsat – búgingi HHİ ǵasyr talabyna jaýap beretin bilimdi, tájirıbeli, birneshe mamandyqty meńgergen bilimi jan-jaqty ımamdar tobyn qalyptastyrý, sonymen qatar dástúrli mázhabymyz – Ábý Hanıfa mázhabyn jalpy halyq arasynda, ásirese jastar arasynda kóbirek nasıhattaý bolyp tabylady.

Forým aıasynda qatysýshylarǵa QMDB-nyń byltyrǵy jyly atqarǵan irgeli isterine sholý jasalyp, arnaıy beıne fılm de kórsetildi. Qazirgi ýaqytta QMDB tarapynan bekitilgen tórt jumys baǵyty boıynsha atqarylǵan aýqymdy sharalar naqty derektermen órnektelip, aldaǵy jumys jospary da qosa aıtyldy.

Basqosý sońynda «Islam jáne Órkenıet» atty İİ Respýblıkalyq ımamdar forýmynyń arnaıy úndeýi qabyldandy.