Qytaılyq «Sınhýa» aqparattyq agenttigi qazaqctandyq qyz ben qytaı jigitiniń mahabbat hıkaıasy týrasynda beınerolık túsirgen eken. Bul jaıynda Qytaı prezıdenti Sı Szınpın aıtty.

Prezıdenttiń sózderine qaraǵanda, qytaı jigiti men qazaqstandyq qyzdyń mahabbatyn kórsetý arqyly eki eldiń yntymaqtastyǵyn kórsetpek bolǵan.

Beınerolıktegi oqıǵa jelisi mynadaı: Sınzándyq jas qytaı jigiti jergilikti aýrýhanada Valentına esimdi arýdy kózi shalyp, ǵashyq bolyp qalady. Aqyry ekeýi bas qosyp, dúnıege uldary keledi. Uldary 6 jasqa tolǵanda Valentına saıası jaǵdaılarǵa baılanysty eline qaıtýǵa májbúr bolady. Uldary er jetip, óz anasyn izdeı bastaıdy. Tek 2009 jyly uly 61 jasqa kelgende 80 jastaǵy anasyn Almatydan tabady. Sóıtip Valentınany Qytaıǵa aparyp, Aspan asty eliniń jaılylyǵyn kórsetedi.

«Birneshe jyldardan keıin baqytqa kenelgen bul otbasynyń taǵdyry – Qazaqstan men Qytaı turǵyndary arasyndaǵy ajyramas dostyqtyń kórinisi» dep aıtty beınerolık jaıynda Qytaı prezıdenti.

Iá, Qazaqstan men Qytaıdyń dostyq qarym-qatynasyn kórsetemiz dep tyrysyp baǵypty. Biraq sol dostyqty qyz ben jigittiń mahabbaty arqyly kórsetkendegi oılarynyń tereńinde ne jatqanyn kim bilsin? Munyń da astarynda qytaı halqynyń quıtyrqy saıasaty jatqan joq pa dep qalasyń.

Qazaqstandyq qyzdar qytaı jigitterin qyzyqtyrady eken

Eske sala keteıik, qańtar aıyndaǵy qazaqstandyq qyzdarǵa Qytaı dókeılerine turmysqa shyǵýdy usynǵan habarlandyrý áleýmettik jelilerdi dúr silkindirgen. Feısbýk áleýmettik jelisindegi «Doska obávlenıı Almaty, Astana» pablıginde mynadaı mazmundaǵy habarlama jarıalanǵan: «18-40 jas aralyǵyndaǵy basy bos qyzdar! Beıjiń turǵyny, ári boıdaq er jigitke turmysqa shyqqyńyz kele me? Bizge habarlasyńyz. Beıjińdegi dókeı jigitter toby Astanaǵa otbasyn qurý úshin kele jatyr. Arnaıy birneshe sharalar daıyndap jatyr. Er adamdar baqýatty ómir súredi, eýropalyq bilimi bar, aǵylshyn, orys tilderin jetik meńgergen».

Mundaı aqparatqa ashynǵan qazaq halqy narazylyǵyn bildirip, ne bir pikirlerin qaldyrǵan. Osy jarnamaǵa baılanysty Qazaqstandaǵy QHR elshisi Chjan Hanhýeı de óz pikirin bildirgen edi. Atalmysh uıymnyń bar-joǵynan habary joq elshi qazaqstandyq qyzdarǵa Qytaı jigitteri qatty qyzyǵatyny jaıynda aıtyp qalǵan.

«Qazaqstannyń qyzdary óte ádemi, názik. Olardyń bilimi joǵary, shyǵys mentalıteti bar. Olar otbasyn jaqsy kóredi, ata-anasyn qurmetteıdi, úlkenderdi syılaı biledi», deı kele, eki el arasynda dástúr boıynsha uqsastyqtar baryn aıtyp qazaq jurtshylyǵyn esinen tandyrǵan.

Bul qytaılyqtardyń qazaq qyzdaryna degen qyzyǵýshylyǵyn dáleldeıtin mysaldyń 10-nan 1-i ǵana. Ony jaza bersek, jyry taýsylmas.

Úlkenderimiz qarsylyq tanytyp, er jigitterimiz narazylyǵyn bildirip, Qytaıǵa ketken qazaq qyzyn, tipti «jezókshege» balaǵandar da boldy.

Ne kerek, búginde Qazaqstannyń qanshama qarakózderi qytaı ultynyń urpaǵyn tárbıelep, qytaı shańyraǵynyń Otanasy atanǵan. Qytaımen bas qosyp, boıynan qazaqtyqty joıǵandary da jetip artylady.

Joq, Qytaıdy múldem jolatpaý kerek degen túsinikten adamyn. Dostyq qarym-qatynas kez-kelgen memleketter arasynda asa qajet-aq, alaıda dostyqtan aspaý kerek shyǵar. Ájelerimiz ben analarymyzdyń aryn ózge ult ókiliniń azamaty taptamady, ájelerimiz qazaqtyń tekti urpaǵyn dúnıege ákeldi, boıyna elge degen súıispenshilikti darytyp ósirdi emes pe?! Qor bolǵan joq qoı. Qaltasyndaǵy baılyǵyn kórsetip, Qazaqstan qarakózderin tuzaǵyna túsirmek oılary bar qytaı halqy tynysh jatar emes. Jaı ǵana habarlandyrýdan bastap, saıasatqa deıin taban tirepti. Qytaıy bolsyn, basqasy bolsyn, elder arasyndaǵy yntymaqtastyqty mahabbat sheshpek emes. Qytaıdyń kezekti saıasatynyń qurbany bolyp júrmeıik.

Gúlim Jaqan