Iemende qarýly qaqtyǵystar men halyqtyń turmysy nasharlaýy saldarynan kámelet jasqa tolmaǵan qyzdardy úlken jastaǵy er adamdarǵa turmysqa berý kúsheıip ketken. Malák esimdi 10 jastaǵy qyz 70 jastaǵy  kári shalmen atastyrylyp qoıǵan. Alaıda anasynyń sharq uryp kómek suraýymen «Iemen áıelder keńesi» uıymy qyzdy jasyryp ustap otyr.

- «Men qyzymnyń erte  turmys qurýyna qarsymyn. Ol áli bala, ol mektepke barýy kerek, bilim alýy kerek, onyń jasy nebári 10-da. Ol áli kúıeý , jigit degenniń kim ekenin de bilmeıdi. Ol aman qalmas edi. Ákesi aqkóńil musylman bolyp kóringisi kelgenmen, oǵan tek aqsha kerek. Mine 2 jyl boldy Malák mektepke barmaı otyr. Ákesi ustap alyp, turmysqa kúshtep shyǵarady ma dep qorqamyz», -dep málimdedi Maláktyń anasy Nasrın.

Eń qorqynyshtysy, 70 jastaǵy er adam Maláktyń atasymen jasty. Eger osy neke qıylar bolsa, qyzdyń ákesi 4 myń dollar alady. Al bul qarjy Iemenniń kedeı halqy úshin úlken aqsha. Osy istiń jalǵasy ne bolaryn bilmegen ana men qyz búginde belsendilerdiń qol astynda jasyrynýda.

Iemendegi soǵys saldarynan eldegi 18 jasqa tolmaǵan qyzdardyń 72 %-y turmysta. Al 15 jasqa tolmaǵan qyzdardyń 44 %-y egde jastaǵy er adamdarǵa turmysqa shyǵýǵa májbúr bolǵan.  Taǵy bir aıta ketetin jaıt,qyzdardyń analary kúıeýleriniń aıtqanyna shyǵa almaı amalsyz kelisip otyr.

Iemen- Ońtústik-Batys Azıada ornalasqan memleket. Halyqtyń 99 %-y musylmandar.

Elde ákeleri óz qyzdaryn saýdaǵa salyp, qatigezdikke barýda. Iemende oryn alǵan  8 jastaǵy qyzdyń ólimi álem talqysyna túsken bolatyn. Aıta ketsek, 8 jastaǵy qyz 40 jastaǵy er adamǵa turmysqa shyǵyp, alǵashqy neke túninde kóz jumǵan. 

Daıyndaǵan: Aıgerim TAÝBAI