Tehas shtatyndaǵy San-Antonıo qalasynda maýsym aıynyń ortasynan bastap múmkindigi shekteýli jandarǵa arnalǵan attarksıondar saıabaǵy jumys isteı bastady, dep jazady Qamshy aqparattyq agenttigi.

 Saıabaqty qurastyrýshylar múgedek jandardyń haýyzda júzý men demalý ortalyqtarynda kezdesetin qıyndyqtaryn eskerip, máseleni sheshpek bolady. Saıabaqta kóńildi sý atraksıondaryn kezdestirýge bolady, sonymen qatar múgedek jandarǵa saıabaqqa kirý tegin.

Joba tek qaıyrymdylyq týrasynda ǵana emes, eksperıment retinde de iske asyrylýda. Bul jańa tehnologıalardy tekseristen ótkizýdiń úlken múmkindigi.  Sondaı tehnologıanyń biri PneuChair múgedekter arbasy Pıttsbýrg ýnıversıtetinde jasalǵan, ereksheligi – aýa energıasy arqyly qozǵalady. Saıabaqqa kelýshiler ózderiniń múgedek arbalaryn syrtqa qaldyryp, yńǵaıly ári qaýipsiz PneuChair arbalaryna minedi.

Arbanyń salmaǵy 40 keli ǵana, al qozǵalysy 8 saǵatqa jetetindeı arbany 10 mınýt ýaqyt qana qýattaıdy.

Sý atraksıondary sýdyń temperatýrasyn qalypty saqtap turady. Sý súzgiden ótken, dezınfeksıasy tolyq saqtalǵan, aǵzanyń titirkenýi syndy túrli áserlerden qorǵalǵan. Kasada kezekte turmas úshin bıletti ınternet arqyly tapsyrys bere alady.

«Morgan Inspiration Island» dep atalatyn saıabaqtyń ár atraksıony múmkindigi shekteýli jandarǵa beıimdelip jasalǵan. Haýyzdar men arnaıy arbalardan ózge, barlyq ınfraqurylym elementteri tolyq zerttelgen, tekseristen ótken.

Tipti, múgedek adamdar saıabaqtan shyqqan soń arnaıy profılaktıkadan ótedi.

Mundaı saıabaqty dúnıege ákelgen ıesi óziniń 23 jastaǵy múgedek arbasymen júretin qyzyna arnap salǵan eken. Ákesi qyzynyń erkin, qysylmaı kóńil kótergenin qalady, ómirdi sezinse dep oılady.

Saıabaq tekseristen oıdaǵydaı ótip, búginde kelýshilerge esigi aıqara ashyq, ári jaz boıy demalyssyz jumys jasaıdy. Aldaǵy ýaqytta aýmaǵyn keńeıtip, jańa tehnologıalardy iske qosyp, ózge de aýdandarda nysandardyń qurylysyn bastaý josparlanýda.

Sholýshy: Gúlim Jaqan