Qyrǵyzstannyń Osh oblysynda jergilikti turǵyndar 19 jastaǵy qyzdy qutqaryp qaldy, dep habarlaıdy Qamshy aqparattyq agenttigi  Turmush.kg saıtyna silteme jasap.

30 maýsym kúni Raıymbek kóshesinde ornalasqan kóp qabatty úılerdiń birinen bir qyz júgirip shyǵyp, jurttan kómek suraı bastaǵan. Ol úı ortalyq bazardyń mańynda ornalasqandyqtan ol jerde jumys isteıtin turǵyndar kúdikti adamdarǵa boıjetkendi bermeı qoıǵan.

Belgili bolǵandaı, kómek surap kelgen qyz Osh oblysy Noqat aýdanynyń turǵyny – Ásel esimdi qyz eken.

Ol Jalal-Abadtaǵy ápkesiniń úıine bara jatqandyǵyn aıtqan. Jolda bir tanysy ony aldap Osh oblysyna alyp kelip, qyzdy satyp jibermek bolǵan.

Zábir kórsetýshi bir top jigitter men áıel ol qyzdy jeńil júristi qyz dep atap, jezóksheler úıinen qashyp ketken dep aıtyp bergen. Alaıda, qyzǵa kómektesken adamdar ol sózge sengen joq. Birneshe ýaqyttan soń Áseldi Súleıman TOO polısıa basqarmasyna jetkizgen.

«Men Jalal-Abadtaǵy gıpermarkette jumys isteımin. Sol jaqqa ápkeme bara jatqanmyn. Jolda meniń Mıka esimdi tanysym bir jerde demalyp, sháı ishýdi usyndy. Men kelistim, keıinnen ekeýmiz beıtanys kólikke otyryp, olar bizdi Osh qalasy Raıymbek kóshesindegi kóp qabatty úılerdiń birine alyp keldi. Júregim bir jamandyqty seze bastady. Qatty qorqyp kettim de, dalaǵa qashyp shyqtym. Meniń artymnan Mıka da júgirip shyǵyp, kúshtep páterge kirgize bastady. Men bar daýysymmen aıqaılap, kómekke shaqyrdym. Men qazir eshkimge de senbeımin, tipti, polısıa qyzmetkerlerine de. Meni satyp jibermek bolǵan adamdardyń aqshasy kóp, olar meni kez kelgen ýaqytta polısıa basqarmasynan da alyp kete alady. Tek resmı formada kelgen polısıa qyzmetkerlerine ǵana sendim, olar meni úıime jetkizip tastaýy kerek», - deıdi Ásel.

Sonymen qatar, ol qyz páterden aıaq kıimsiz júgirip shyqqan. Al onyń artynan bir top jigitter men bir áıel qýyp, alyp ketpek bolǵan.

Keshki ýaqytta oqıǵa ornyna polısıa qyzmetkerleri kelip, qyzdy polısıa basqarmasyna alyp ketti.

Aýdarǵan: Nazerke Labıhan