11 shilde kúni Sátpaev qalasynyń ákimdiginde tóbeles boldy, dep jazady Qamshy.kz aqparat agenttigi.

Áleýmettik jelide Sátpaev qalasynyń ákimdiginde bolǵan tóbelestiń vıdeosy taraldy. Vıdeoda tilshi Berik Jaǵyparov pen áıel adamnyń janjaldasyp jatqanyn baıqaımyz. Jaǵdaıdyń naqty sebebin bilý úshin Qamshy.kz jýrnalısi Berik Jaǵyparovtyń ózine habarlasyp, istiń mán-jaıyn anyqtady.

Sátpaev qalasynyń tilshisi áriptesterimen ákimdiktiń orynbasary Aıgúl Tólendınaǵa qoǵamdyq másele jaıynda aıtý úshin barǵan. Ózine kerekti aqparatty alyp, qaıtyp bara jatqanda bólmege beıtanys áıel kirip kelip, Berik Jaǵyparovqa tıesili vıdeokamerany tartyp alady. Áıel basqa bólmege qashyp bara jatqan ýaqytta ony ustap úlgergen. Tilshiniń aıtýynsha, áıel adam álgi vıdeokamerany terezeden laqtyryp jibermek bolǵan kórinedi. Berik Jaǵyparov ózine tıesili dúnıeni qalaı da qaıtarmaq bolǵan, sóıtip oqıǵanyń sońy janjalǵa ulasty. Jaǵyparovtyń aıtýynsha, ol vıdeokamera bolmasa, atalmysh oqıǵaǵa baılanysty óziniń kinásizdigin dáleldeı almaǵan bolar edi.

Keıin anyqtalǵandaı er adammen tóbelesken áıel áleýmettik jumys jónindegi jetekshi maman bolyp shyqty. Óziniń jaraqat alýyna baılanysty tilshiniń ústinen aryz túsirmek nıette eken. Alaıda Berik Jaǵyparov kúsh qoldanbaǵanyn aıtady.

Bul týrasynda aqparatty Berik Jaǵyparov óziniń Feısbýktegi paraqshasyna vıdeolarymen qosy bólisti. Ákimdikke barǵandaǵy maqsatyn da jazyp ótti: Qalada túngi 23:00-den keıin araq satýǵa tyıym salynǵan. Alaıda, dál ákimdikke tıip turǵan dúkenniń ózinde tún ortasynda alkogóldik sýsyndar erkin satylatyn kórinedi.

Tilshiler dál osy suraqtyń jaýabyn alý úshin, ákimdiktiń osy másele jóninde habardar bolǵan-bolmaǵanyn, ári sharalar qoldanýyn talap etý úshin kelgen. Janjal osy áńgimeden keıin bastaldy.

Tilshimiz Sátpaev qalasynyń ákimdigine de habarlasyp kórdi. Alaıda, olar resmı aqparat daıyndap jatqanyn aıtyp, biraz ýaqyttan soń jarıa bolatynyn málim etti.

Sholýshy: Gúlim Jaqan