Elordada «Shyǵys jáne Batys: memlekettik Ermıtaj jınalymynan kóne qarý-jaraq» kórmesinen ımperatorlardyń saıys qylyshtary men serilik saýyt-saımandardy, qanjarlardy kórýge bolady, dep jazady Qamshy.kz aqparat agenttigi. Bul týraly qala ákimdiginiń medıa ortalyǵy habarlady.

«Kórmege qarý-jaraq óneriniń úzdik týyndylary qoıylǵan. Ekspozısıada 70-ten astam jádiger: Túrkıa, Iran, Úndistan, Japonıa, Fransıa, Italıadan jáne de ózge memleketterden jaýyngerlik, ańshylyq, sherýlik qarýlar jetkizildi», - dep málim etti QR Ulttyq mýzeıiniń ekskýrsıalyq qyzmet kórsetý bóliminiń ádiskeri Qumar Júnisov. 

«Kórmeniń jylnamalyq shegi qarý-jaraq qolóneriniń 400-den astam jyl boıǵy damý tarıhı kezeńin - XV ǵasyrdan XIX ǵasyr sońyna deıin qamtıdy», - dedi Q.Júnisov.

Kórme qarýlardyń damý tarıhynan jáne olardy jasaýshy sheberlerdiń talantynan syr shertedi.

«Jádigerlerliń arasynda erekshe qarý bar - ol Napoleon Bonaparttyń semseri. Ony ol ımperator İ Aleksandrǵa Tılzıttik beıbitshilik kelisimine qol qoıý kezinde syıǵa tartqan»,- dep atap ótti Júnisov. Qarý-jaraq óneriniń ekspozısıasy halyqaralyq EKSPO kórmesiniń ótýine oraılastyrylǵan jáne 20 qyrkúıekke deıin jalǵasady.  

Sholýshy: Gúlim Jaqann