Baýyrjan Serikbaev esimdi Facebook qoldanýshysy óziniń paraqshasyna telejobalar tarıh, dástúr, mádenıetti nasıhattaýdyń eń utymdy joldarynyń biri ekenin aıtady.
"Túrikterdiń Osman ımperıasyn qurýshy Osman patshanyń ákesi Ertuǵryl jaıly tarıxı serıaly osymen 3 jyl qatarynan túsirilip kele jatyr. Internetke shyǵysymen ár serıasyn úzbeı kórýge tyrysamyn. Jalpy óte sátti shyqqan jobalardyń biri. Elimizde "Qazaqstan" arnasy atalǵan serıaldy qazaq tilinde kórsete bastapty. Baıqasańyzdar túrik xalqy tarıxı serıal túsirip, shetelge shyǵarýdy bıznes pen tabystyń kózine aınaldyryp alǵan. Bunyń aldynda ǵana Sultan Súleımen patsha týraly tarıxı serıaly elimizde keń aýqymda taralǵany belgili. Aqshadan bólek tarıxı serıal degenińiz - óz tarıxyń men mádenıetińdi ózge elge tanytýdyń keremet quraly. Mundaı quraldardy ımperıa quryp, ózge xalyqtardy ýysynda ustap kórgen Túrkıa syndy elder sátti qoldaný joldaryn da jaqsy biledi. Túrkıa prezıdenti Taıyp Erdoǵan BAQ ókilderine bergen suxbattarynda "Ertuǵryl" tarıxı serıalyn nemerelerimen birge kóretinin de jasyrmaı ashyq aıtyp otyrady.
Negizi bizge de "Qazaq xandyǵy" serıalynyń jalǵasy retinde tarıxı dúnıelerdi túsirýdi úzbeı jalǵastyra berý kerek. Tek túsirip qana qoımaı aqyryndap Orta Azıa elderi naryǵyna shyǵarýdy qolǵa alý qajet. Bul da bir ıdeologıa, ózge memleketter xalqynyń sanasy men emosıasynda qazaq xalqy týraly jaqsy pikir men kózqarastardyń qalyptasýyna óz septigin tıgizetin keremet qural. Biz de bir zamandary alyp memleket bolǵan Aq Ordanyń muragerimiz. Qazaqstan 2030 jyly Orta Azıa barysyna aınalady degen strategıalyq baǵdarlamanyń sonaý 1997 jyly qabyldanýynda da osy tarıxı sananyń yqpaly jatyr. 1997 jyly ózimiz qınalyp jatsaq ta Orta Azıada lıder bolamyz degen tátti armanymyz boldy. Halyqtyń ótken tarıxy ulttyq kod arqyly urpaqqa beriletinin eskersek, endi bir 30-40 jyldan keıin urpaqtyń bir býyny aýysyp, balalarymyz bılikke kelgende Orta Azıa aýmaǵy Qazaqstannyń strategıalyq múddesi bar terıtorıaǵa jatady degen bizdiń de aımaqtyq derjavalyq syrtqy saıasatymyz kún tártibine shyǵýy múmkin. Ol kúnge jumsaq saıasat júrgizý arqyly kıno men mádenıet salasynda óz tarıxymyz men qundylyqtarymyzdy aqyryn nasıxattap, ózgelerdiń sanasyn qazirden daıyndaı berýge ne kedergi?.." dep suraq joldaıdy jeli qoldanýshysy.
Pikir qaldyrý