QR Mádenıet jáne sport mınıstri Arystanbek Muhamedıuly men Iran Mádenıet jáne ıslamdyq baǵdar mınıstri Reza Salehı Amırı seısenbi kúni Tegeranda kezdesý barysynda eki el arasyndaǵy mádenıet pen óner aıasyndaǵy seriktestik týrasyn talqylady. Bul týraly Qamshy.kz aqparat agenttigi jergilikti ParsToday agenttiginiń málimetine súıenip habarlaıdy. 

Iran mınıstriniń aıtýynsha, ırandyq kıno álem boıynsha joǵarǵy deńgeıde jáne Qazaqstanmen birigip kıno túsirýge, kıno salasynda bilim júıesin damytýǵa atsalysady.

Sondaı-aq, Qazaqstannyń Iran úshin orny aıryqsha ekenin aıta ketip, Iran prezıdenti Hasan Roýhanıdiń Elbasy Nursultan Nazarbaevty erekshe qurmetteıtinin de jetkizdi. Qazaqstanmen qaı salada bolmasyn, seriktestik qurýǵa daıyn ekenderin aıtty.

«Iran men Qazaqstan seriktes bolý úshin eshqandaı kedergi joq. Eki jaq ta mýzyka, óner, teatr jáne kórkem galereıa aıasynda birigip jumys atqara alady», – dedi Iran Mádenıet jáne ıslam baǵdar mınıstri.

QR Mádenıet jáne sport mınıstri Arystanbek Muhamedıuly da Irannyń tarıhı týrızmi Qazaqstan úshin asa mańyzdy ekenin jetkizdi.