2025 jyldyń 1 qańtarynan bastap Qazaqstan BRIKS-tiń resmı túrde seriktes elderiniń biri bolady. Bizdiń elimizden basqa, bul sanatta Belarýs, Bolıvıa, Indonezıa, Taıland, Kýba, Ýganda, Malaızıa jáne Ózbekstan da bar. Bul týraly birinshi bolyp Reseı prezıdentiniń kómekshisi Iýrıı Ýshakov málimdedi. Artynsha muny Qazaqstannyń Syrtqy ister mınıstrligi de rastady.

Qazan samıtiniń mańyzdy nátıjeleriniń biri BRIKS-tiń seriktes elder kategorıasy engizildi. Tizimdegi 13 el kelisildi. Bul memleketterge tıisti shaqyrtý jiberildi», – dedi Iýrıı Ýshakov.

Seriktestik mártebesine kelsek, 2025 jyldyń 1 qańtarynan bastap seriktes atanatyn elderdiń ókilderi BRIKS samıtteriniń otyrystaryna jáne syrtqy ister mınıstrlikteriniń kezdesýlerine shaqyrylyp otyrady.

2024 jyly 16 qazanda Qasym-Jomart Toqaevtyń baspasóz hatshysy Berik Ýálı Qazaqstannyń ázirge BRIKS-ke kirýdi josparlamaǵanyn málimdegen edi.

Ázirge BRIKS-ke 9 el múshe. Atap aıtqanda, Brazılıa, Rossıa, Úndistan, Qytaı, Ońtústik Afrıka Respýblıkasy, Birikken Arab Ámirlikteri, Iran, Mysyr jáne Efıopıa kiredi. Bul uıymnyń qatary sońǵy ret 2024 jyly 1 qańtarda tolyqqan edi.

Munyń aldynda BRIKS-te dollarǵa balama bolatyn ortaq valúta shyǵarý týraly másele kóterilgen bolatyn. AQSH-tyń qaıta saılanǵan prezıdenti Donald Tramp BRIKS mundaı qadamǵa barsa, bul elderge qarsy qatań ekonomıkalyq shara qoldanylatyny týraly málimdeme jasady. Budan keıin BRIKS-tiń múshesi OAR kún tártibinde mundaı másele turmaǵanyn aıtyp aqtalǵan edi.