Shýchınskte IV Ulttyq quryltaıdyń otyrysy aıasynda seksıalar bastaldy.

Májilis depýtaty Maksım Rojın atap ótkendeı, bul - IV Quryltaı. Prezıdent árqashan Quryltaıdyń elimizdiń tarıhynda, rýhanıatynda erekshe orny bar jerlerde ótkizýdi usynyp keledi.

Búgin biz Býrabaı óńirine jınalyp otyrmyz. Quryltaı óziniń maqsatyn oryndaıdy degen oı bar. Óıtkeni ár quryltaıda ártúrli kózqarastaǵy azamattar jınalady. Bul - pikir alýandylyǵy, óıtkeni túrli kózqarasta dıalog arqyly belgili bir sheshimder paıda bolady degen senim bar. Bul jerge biroıly, birkelki azamattar jınalmaıdy. Tipti keı jaǵdaıda keıbir máseleler boıynsha azamattarda qarama-qaıshy pikirler de paıda bolady, - dedi depýtat.

Ol búgin ózi qatysatyn seksıada qoǵamnyń mádenı salasynda órship jatqan máseleler kóteriletinin atap ótti.

Men búgin ádep máselesi jaıly aıtqym keledi. Qoǵamdy, qoǵam múshesi retinde ózimdi qoǵamda bolyp jatqan ádepsiz dúnıeler alańdatyp otyr. Nege ondaı jaǵdaı týyndap jatyr? Ony qalaı sheshýge bolady? Osy suraqtardy ortaǵa talqyǵa salǵym keledi. Azamattyń qaýipsizdigine, balanyń mekteptegi, qoǵamdaǵy qaýipsizdigine qatysty oılar bolady, - deıdi Rojın.

Depýtat ádep - ol fýndament ekenin, sol sebepti aldymen ádep máselesin kóterý oryndy deıdi.

Mysaly, sońǵy kezderi júrgizýshilerdiń kóshede tóbelesip qalýy, oqýshylardyń bir-birin uryp-soǵýy. Meni bul máseleler alańdatady. Óıtkeni meniń balam mektepke barady, erteń meniń balam kóshege shyǵady, qoǵam múshesi bolady. Endi men balamnyń ádepti bolýy úshin jumys isteýim kerek. Basqalary da solaı jasaýy kerek. Ony qalaı jasaımyz? Bálkim, biz úıde tárbıe berilip jatyr deımiz. Biraq qoǵamda osyndaı jaǵdaılar bolady. Qaıdan shyǵady? Nege bolady? Biz qaı jerden olqylyq jiberdik? Osyny kótergim kelip otyr, - dep oıyn aıtty Maksım Rojın.

Ol elimizde mádenıet úılerin kóbeıtý kerek dep sanaıdy. Sebebi depýtattar óńirlerdi aralaǵanda keıbir óńirlerde mádenıet oshaqtarynyń joq ekenin baıqaǵan.

Keıbir óńirlerde mádenıet úıleri áli joq. Aýyldy jerlerde balalardyń ne kitap oqıtyn jeri joq. Prezıdent aıtqandaı, mádenıet úıi konsert ótetin orynǵa ǵana emes, jastar jınalyp, túrli baǵyttaǵy jumystar júrgiziletin oryndarǵa aınalýy kerek. Keıbir óńirlerde azamattar ony áli kútip otyr. Aýyldarda tárbıe beretin qarıalar da qalmady. Sol qarıalardy mádenıet úılerine alyp kelý kerek shyǵar, - dedi ol.

Rojın qazir ata-analar balasyn asyraý úshin jumystan qoly bosamaı júretinine nazar aýdardy.