Qazaqstan úkimeti eldegi biryńǵaı ýaqyt beldeýine qatysty zertteýdiń qorytyndysyn jarıalady.

Jumys barysynda derekterdi zertteý, saýalnama nátıjeleri jáne biryńǵaı ýaqyt beldeýine aýysqanǵa deıingi jáne keıingi kórsetkishterdi salystyrýdy qamtıtyn keshendi tásil qoldanyldy. Zertteý júrgizý ádistemesi biryńǵaı ýaqyt beldeýin engizýdiń halyq densaýlyǵyna, energıa tutynýǵa, eńbek tıimdiligine, oqýshylardyń úlgerimine, jol-kólik oqıǵalary deńgeıine, qylmysqa jáne basqa da aspektilerge áserin baǵalaý boıynsha 40-tan astam metrıka men kórsetkishterdi qamtıdy. 

"Densaýlyq saqtaý salasy boıynsha 100 myń adamǵa eseptelgen qala jáne aýyl turǵyndarymen qatar túrli jastaǵy azamattar qamtyldy. Energıa tutyný boıynsha elektr energıasyn tutyný statısıkasyn, onyń ishinde eń joǵary júktemelerdi jáne búkil el boıynsha elektr energıasyn tutynýǵa salystyrý júrgizildi. Eńbek qyzmeti boıynsha, oryndalǵan jumys kólemi, keshigý jáne sabaqqa kelmeý jaǵdaılary, jaraqattar men tártip buzý jaǵdaılary qamtylǵan", – dedi saýda jáne ıntegrasıa mınıstri Arman Shaqqalıev. 

Onyń sózinshe, zertteý qorytyndysy ýaqyt beldeýiniń aýysýy turǵyndardyń ómirine keri áser etpegenin kórsetken. 

"Memleket basshysy úkimet pen parlamentke atalǵan máseleni egjeı-tegjeıli qarap, birlesip ońtaıly sheshim qabyldaýdy tapsyrǵanyn bilesizder. Mınıstrdiń baıandamasynda aıtylǵandaı, monıtorıń biryńǵaı ýaqyt beldeýin engizý týraly qabyldanǵan sheshimniń teris áseri joq ekenin kórsetti", – dep qosty premer-mınıstr Oljas Bektenov.