Naýryz ben sáýir aılarynda boljam boıynsha, aýa raıy jylynyp, mol jaýyn-shashyn túspek.  Osyǵan baılanysty Aqmola, Qostanaı, Aqtóbe, Batys Qazaqstan, Atyraý oblystarynyń ákimderi óńirlerde eldi mekenderdi sý basýdyń aldyn alý boıynsha atqarylyp jatqan sharalar týraly baıandady, dep habarlady primeminister.kz. 

13 naýryzdaǵy jaǵdaı boıynsha elimizdiń qar basyp jatqan aýmaǵy 67%-dy quraıdy. Ekologıa jáne tabıǵı resýrstar mınıstri Erlan Nysanbaev Qyzylorda, Túrkistan, Jambyl, Batys Qazaqstan, Atyraý jáne Mańǵystaý oblystarynda qazirdiń ózinde qar erı bastaǵanyn aıtty. Bul rette elimizdiń soltústik-batysynda, soltústik-shyǵysynda jáne ortalyǵynda tońnyń qalyń bolýy baıqalyp otyr. Qostanaı oblysynda 150 sm-ge deıin jáne odan da kóp, Aqmola oblysynda – 139 sm-ge deıin, Pavlodar oblysynda – 159 sm-ge deıin, Qaraǵandy oblysynda –132 sm-ge deıin toń bar. Boljamdarǵa sáıkes, naýryz jáne sáýir aılary jyly bolady dep kútilýde, elimizdiń basym bóliginde jaýyn-shashyn mol bolady, bul sý tasqyny qaýpin arttyrady.

«Memleket basshysy sý tasqynynyń aldyn alý sharalaryna basymdyq berýdi tapsyrdy. Úkimet sý tasqynynyń aldyn alý jáne keri áserin joıýǵa baǵyttalǵan uıymdastyrýshylyq-profılaktıkalyq, ınjenerlik-tehnıkalyq jáne jedel sharalar qabyldaýda. Degenmen, aımaqtardyń daıyndyǵy joǵary deńgeıde bolýy kerek. Ákimdikter eldi mekenderdi tasqyn sýdan qorǵaý úshin keshendi sharalar qabyldaýy tıis. Olardyń aınalasyn topyraq úıindilerimen bekitip, birinshi kezekte syrttan keletin sýdy bógeý kerek. Sý ótkizý qurylystary, kópirler men túbıńter qatyp qalǵan muz ben qoqystardan tazartylyp, qarǵyn sýdy ótkizip jiberýge daıyn bolýy tıis. Ózen arnalaryn tazartyp, bekitý qajet. Dala ózenderiniń bitelýge aınalǵan jerlerin keńeıtý kerek. Sý basý qaýpi joǵary eldi mekenderde kúshter men quraldardy, onyń ishinde tıisti tehnıkany daıyndaý qajet. Evakýasıa oryndaryn anyqtańyzdar. Olar tirshilikke qajetti barlyq quraldarmen jabdyqtalýǵa tıis», — dep aıtty premer-mınıstr.

Byltyr Qazaqstanda jerdiń tońy jibimeı jatyp kúrt erigen qalyń qar sýy men arnasynan asqan ózen sýy eldi mekenderdi basyp, jurt úıinen, mal-múlkinen aıyrylǵan. 17 oblystyń onyn sý alyp, segiz oblysta tótenshe jaǵdaı jarıalanǵan.

2024 jyly sáýirde tótenshe jaǵdaılar mınıstrligi Atyraý oblysy Qulsary qalasynda tasqynnan tórt adam opat bolǵanyn málimdegen. Budan bólek, Aqtóbe óńirinde erigen qar sýyna batyp mert bolǵan eki balanyń ajalyna "tasqynnyń qatysy joq" dedi jergilikti bılik. Al Abaı oblysynda ózen tasyp jatqanda tórt adam habarsyz ketti.

BUU byltyr kóktemde Qulsaryda bolǵan apattyń saldaryn azaıtýǵa bolar edi dep jazǵan. Sý tasqynynan keıin Qulsaryǵa jaqyn mańnan ótetin Jem ózeniniń joǵarǵy jaǵynda birde-bir gıdropost joq ekeni belgili boldy.