Oqý ordasynyń bazasynda túrli baǵyttaǵy ǵylymı ortalyqtar men zerthanalar iske qosyldy. Sheteldik ýnıversıtettermen birge ortaq jobalar júzege asyrylýda.
Atap aıtqanda Ál-Farabı atyndaǵy Qazaq ulttyq ýnıversıteti Qytaıdyń Soltústik-Batys polıtehnıkalyq ýnıversıtetimen birlesip 2025 jyly ǵaryshqa mıkrospýtnık ushyrýdy josparlap otyr. Búginde NKSat ǵarysh apparatyn qurý jumystary júrgizilýde. Ortaq jumys úlken tereńdiktegi geodınamıkalyq prosesterdi zertteýdiń negizgi mindetterin sheshýge arnalǵan.
QazUÝ-dyń negizgi ázirlemelerine jer qyrtysynyń kartasyn jasaý úshin gravımetrıalyq jabdyqty qurý jatady, bul geologıa jáne paıdaly qazbalardy óndirý salasyndaǵy zertteýlerdi jedeldetedi. Sondaı-aq, búkil el boıynsha qurylǵylardy baqylaýǵa arnalǵan IoT-shlúz ázirlendi.
Aıta keteıik QazUÝ ǵaryshqa nanospýtnık ushyrýda tájirıbesi bar. Bilim ordasy Ortalyq Azıada alǵashqy bolyp óz «Al-Farabi 1» jáne «Al-Farabi 2» nanospýtnıgin ushyrǵan bolatyn.
Bıyl Ál-Farabı atyndaǵy QazUÝ-da «Qashyqtan zondtaý tehnologıasy jáne qoldaný» qazaq-qytaı birlesken zerthanasy iske qosyldy. Munda Ortalyq Azıa óńirindegi klımattyń ózgerýinen bolatyn sý tapshylyǵy, qurǵaqshylyq, jerdiń qunarsyzdanýy, aımaqtaǵy sý tasqyny, jer silkinisi sıaqty tabıǵı qaýip-qaterlerge monıtorıń júrgiziledi.
Sondaı-aq, JOO bazasynda «Turaqty damý jáne tabıǵatty utymdy paıdalaný» ǵylymı ortalyǵy jumys isteıdi. Oǵan TDM iske asyratyn 10 ınovasıalyq zerthana kiredi. Mundaǵy ǵalymdar aǵymdaǵy jyly Atyraý oblysynda bolǵan sý tasqynynyń sebep-saldaryn anyqtaý jumystaryna qatysty. Olar Jaıyq ózeniniń baseınindegi aǵymdaǵy sý tasqyny jaǵdaıyn baǵalap, eseptik, grafoanalıtıkalyq, gıdrologıalyq jáne dalalyq zertteýler júrgizdi.
Qazaqstan men Fransıa arasyndaǵy qarym-qatynasty nyǵaıtý maqsatynda aǵymdaǵy jyldyń mamyr aıynda QazUÝ-da «Ortalyq Azıany zertteý jónindegi arheozoologıalyq ortalyq – ZooStan» alǵashqy qazaq-fransýz ǵylymı ortalyǵy ashyldy. Jańa zertteý nysany sońǵy mıllıon jyl ishinde adam men janýarlar arasyndaǵy qarym-qatynas evolúsıasyn zertteý úshin Qazaqstan, Fransıa jáne AQSH ǵalymdaryn bir arnaǵa toǵystyrdy. 3,5 aılyq jumys barysynda ZooStan halyqaralyq ekspedısıalar ótkizdi, iri eýropalyq jobalarǵa qarjy tartty jáne 2025 jyly Fransıada halyqaralyq arheologıalyq mektep uıymdastyrýǵa daıyndalýda.
Sondaı-aq 90 jyldyq aıasynda ZTE korporasıasymen birlesken ınovasıalyq ortalyq ashyldy.
QazUÝ men ZTE birlesken ınovasıalyq ortalyǵy aqparattyq jáne telekomýnıkasıalyq tehnologıalar salasyndaǵy ǵylymı-zertteý qyzmetin júrgizý úshin bilim berý mekemeleri men kásiporyndar arasyndaǵy yntymaqtastyqty keńeıtý maqsatynda qurylǵan. Sonymen qatar, ınovasıalyq ortalyq bazasynda 5G ozyq telekomýnıkasıalyq tehnologıalar boıynsha oqý ortalyǵy jumys isteıdi. Oqýdy aıaqtaǵan túlekterge halyqaralyq sertıfıkat beriledi.
ZTE sıaqty álemdik tehnologıalyq kóshbasshylarmen seriktestik Qazaqstannyń ǵylymı jáne tehnologıalyq áleýetin damytýǵa úles qosady. Mundaı yntymaqtastyq jańa múmkindikterge jol ashady.
QazUÝ-da jýyrda halyqaralyq qonaq úı menedjmenti Ortalyǵy óz jumysyn bastady. Bul ortalyq áriptestik baılanys arqyly Gonkong polıtehnıkalyq ýnıversıtetimen (PolyU) birlesip quryldy. Atalǵan ortalyq «Bir beldeý, bir jol» baǵdarlamasy boıynsha pánaralyq zertteýler júrgizý úshin mańyzdy platforma bolady dep kútilýde. Sondaı-aq, joǵary tıimdi forýmdar ótkizý arqyly halyqaralyq dıalog pen yntymaqtastyqqa járdemdesetin bolady. Ortalyq zertteýleriniń basym baǵyttary - áleýmettik jumys, damý, turaqty jáne qoǵamdyq týrızm, týrızmniń sıfrlyq transformasıasy, týrısik bilim berý jáne t.b.
Bolashaqta jahandyq ınovasıalar men turaqty damý boıynsha Qazaqstandaǵy jetekshi taldaý ortalyǵyna aınalady.
Pikir qaldyrý