Premer-mınıstr Oljas Bektenovtiń tóraǵalyǵymen sý tasqynyna qarsy sharalardy úılestirý jáne qarǵyn sý júrý kezeńiniń saldaryn joıý jónindegi respýblıkalyq shtabtyń otyrysy ótti.

Ekologıa jáne tabıǵı resýrstar mınıstri Erlan Nysanbaev óńirlerdegi gıdrometeorologıalyq jaǵdaı týraly baıandady.

"Tasqyn" júıesindegi sý tasqyny jaǵdaıyn modeldeý nátıjelerin sıfrlyq damý mınıstri Jaslan Mádıev, sý nysandarynyń jaǵdaıy týraly sý mınıstri Nurjan Nurjigitov, sý tasqynyna qarsy áreket etý týraly tótenshe jaǵdaılar mınıstri Shyńǵys Árinov baıandama jasady.

Aqmola, Qostanaı, Aqtóbe, Batys Qazaqstan, Atyraý oblystarynyń ákimderi sý basýdyń aldyn alý boıynsha qandaı sharalar atqarylyp jatqanyn baıandady.

13 naýryzdaǵy jaǵdaı boıynsha elimizdiń qar basyp jatqan aýmaǵy – 67%. Ekologıa jáne tabıǵı resýrstar mınıstri Erlan Nysanbaev Qyzylorda, Túrkistan, Jambyl, Batys Qazaqstan, Atyraý jáne Mańǵystaý oblystarynda qar erı bastaǵanyn aıtty. Elimizdiń soltústik-batysynda, soltústik-shyǵysynda jáne ortalyǵynda tońnyń qalyń bolýy baıqalyp otyr.

“Qostanaı oblysynda 150 sm-ge deıin jáne odan da kóp, Aqmola oblysynda 139 sm-ge deıin, Pavlodar oblysynda – 159 sm-ge deıin, Qaraǵandy oblysynda –132 sm-ge deıin toń bar. Naýryz jáne sáýir aılary jyly bolady degen boljam bar, elimizdiń basym bóliginde jaýyn-shashyn mol bolady, bul sý tasqyny qaýpin arttyrady”, – delingen habarlamada.

"Qazgıdromet" bıyl árbir óńir boıynsha sý shyǵynynyń eń joǵary deńgeıin, gıdrologıalyq beketter boıynsha aǵyn kólemin kórsetetin jáne qaýipti aımaqtaǵy eldi mekenderdi anyqtady.

Tasqyn qaýpi joǵary aımaqtar:

• Shyǵys Qazaqstan,
• Qaraǵandy,
• Aqmola,
• Soltústik Qazaqstan,
• Qostanaı,
• Aqtóbe,
• Abaı,
• Ulytaý oblystary

Qaýip deńgeıi ortasha aımaqtar – Almaty, Jetisý, Jambyl, Batys Qazaqstan jáne Atyraý oblystary.

Sý basý qaýpin azaıtý maqsatynda premer-mınıstr ýákiletti organdarǵa Aqmola, Batys Qazaqstan, Ulytaý, Qaraǵandy jáne Soltústik Qazaqstan oblystaryn aralap, shuǵyl sharalar qabyldaý jóninde tapsyrmalar berdi.