Biraz kún buryn ǵalamtor jelisinde tanymal ımam Ábdiǵaffar Smanovtyń nesıe týraly aıtqan ýaǵyzy taralǵan. Moldanyń «nesıeniń árbir paıyzy anańmen jeti ret zına jasaǵan kúnámen birdeı» dep aıtqany qazaq halqyn dúr silkindirgen edi. Osyǵan oraı belgili ıslamtanýshy Qaırat Joldybaı tanymal ýaǵyzshynyń aıtqandaryn joqqa shyǵaryp, ondaı úkimniń durys emestigin jazdy, dep habarlaıdy Qamshy.kz aqparat agentttigi.

«Ósim berýdiń de, alýdyń da kúná ekeni belgili. Alaıda ony kisiniń anasymen zına jasaǵannan da aýyr kúná degen úkim durys emes. Bul mazmunda kelgen hadısti kópshilik muhaddıs ǵulamalar tizbek turǵysynan da, mátin turǵysynan da dálelge jaramsyz ekendigin aıtqan. Islamdaǵy zınaǵa beriletin jazanyń aýyrlyǵyna qarap-aq, ony kisiniń anasymen, tipti, jalpy zına ataýlymen salystyrýǵa kelmeıtinin baıqaý qıyn emes. Ósimniń zınadan da aýyr ekendigin bildirgen hadıster sahaba Abdýllah ıbn Sálam, tabıǵın Kaǵbýl-ahbar sekildi ıslam dinin qabyldaǵan ózge din ókilderiniń (evreı) rıýaıaty bolmaq. Bul kisiler burynǵy dinderindegi keıbir úkimderdi shatastyryp rıýaıat etkendigi baıqalady. Hadıstiń basqa joldarmen kelgen (shaýahıd, taýabıǵ) rıýaıattary dálelge jaramaıtyndaı álsiz.
PS: Ábdiǵaffar aǵamyz talaı jastardyń týra jolǵa túsýine sebep bolǵan kisi. Muny eshkim joqqa shyǵara almaıdy. Hadıs jınaqtarynda kezdesken keıbir rıýaıattardy jurtty ósimnen saqtandyrý maqsatynda aıtqany kórinip tur. Biraq sátsiz hám qate. Alaıda kisini bir-eki sózine bola múldem syzyp tastaý da durys emes dep oılaımyn», – dep jazdy dintanýshy óziniń Feısbýktegi paraqshasyna.