Qyrkúıektiń 6-sy kúni Tájikstanda uıaly baılanys operatorlarynyń abonentteri ulttyq kıim kıý týraly habarlama aldy, dep jazady Qamshy.kz aqparat agenttigi. Tájikstan úkimetindegi Áıelder jáne otbasylyq ister jónindegi komıtet atalmysh habarlamany rastady.

«Biz «Tájiktelekom» kompanıasynyń basshylyǵy men ózge de uıaly baılanys operatorlaryna «Salt-dástúr men ádet-ǵurypty retteý» týraly zańnama aıasynda ulttyq mádenıet atrıbýttaryn saqtaýǵa mindetteıtin resmı hattar jiberdik. Tájikstannyń ár azamaty memlekettik tildi bilip, ulttyq kıimde júrýi tıis», –  dedi komıtet ókili Mahbýba Azımova.

«Ulttyq kıimdi kıý mindetteledi!», «Ulttyq kıimdi qurmetteńizder!», «Ulttyq kıim kıýdi dástúrge aınaldyraıyq» –  dál osyndaı mazmunadǵy habarlamalar uıaly telefon qoldanatyn 6 mıllıon turǵynǵa kelgen.

El azamattaryna ulttyq kıim kıýdi mindettegen «Salt-dástúr men ádet-ǵuryptardy retteý» týraly zańnamadaǵy túzetýlerdi Tájikstan parlamentiniń  tómengi palatasy 23 tamyzda maquldaǵan. «Jeke jáne zańdy tulǵalar ulttyq mádenıet atrıbýttaryn saqtaýǵa mindetti – memlekettik tildi bilý jáne ulttyq kıimde júrý», –  delingen zań jobasynda.