Men túsimde kórdim Ahań, Jaqańdy,
Qansha Uly bar jáne olar qatarly.
On bir jasar Atılladaı nemerem,
Otyra qap, atalardan Bata aldy.
Jibigendeı ishte qatqan tońdarym,
Uly atalar: sol jaǵym men oń jaǵym.
Qazaqtaǵy Ustazdardyń Ustazy:
-Bismillá!-dep, Ahań jaıdy qoldaryn,-
-O, Qudaıym, ońdasyn,
Esh jamandyq bolmasyn!
Qazaǵymnyń basyna
Jaqsy zaman ornasyn!
Dushpandary sorlasyn,
Qazaǵymdy qashan da
Qydyr kelip qorǵasyn!
Al, kishkentaı balaqaı,
Jolyń dáıim oń bolsyn!
Aq peıiliń keń bolsyn!
Asyl tegiń sanalar,
Qazaq – Uly El bolsyn!
Dáý jigit bol, ulyq bol,
Ulyq bolsań, kishik bol!
Qazaǵyńnyń namysyn
Taptatpaıtyn jigit bol!
Ata-anaǵa súıikti eń,
Jaýyń - kúısin kúıikten,
Ultyń úshin qashan da
Kórinip júr bıikten!
Áýmıin!-dep, Ahań berdi batasyn,
Nemerem de alqalap júr atasyn...
Qaıran halqym, sen, qashan da aman bol,
Aman bolsań, Baqyt dámin tatasyń!...
Kórgen bar ma, Uly Ahańdaı danany,
Nemeremniń eki kózi qýanyshtan janady.
Sodan keıin, Ahań, sál-pál tynystap,
Janyndaǵy Mirjaqypqa qarady.
-Biz ejelden Qazaq degen el edik,
Ultymyzdy eshkimnen kem demedik.
Qonaǵyna mol dastarhan jaıatyn,
Jaqsylarǵa aıdyn-shalqar kól edik.
Ne bolsa da, biz demedik: «kesh pe edi?»
Eń birinshi, Namysymyz óshpedi!
Qýǵyn-súrgin, shapqyn, qyrǵyn sıaqty
Bizdiń Qazaq neni bastan keshpedi...
Júz jyl bopty, biz ketkeli arada,
Ne ózgeris, mynaý Uly Dalada?..
Bizdiń Qazaq Ult boldy ma eńseli,
Jańǵyrdy ma, bizdiń Ulttyq sana da?
Túsinemin, bastan bári ótti me,
Ulttyń qoly óz aýzyna jetti me?
Qaıran Qazaq, el boldyń ba irgeli,
Baıaǵy uıqyń, kelmes jaqqa ketti me?-
Dep, oılanyp, Jaqań bizge qarady.
«Qazaǵymdy qalaı aıtam, jalaly?
Sodan beri týra ǵasyr ótse de,
Qalaı aıtam, Qazaq janyn jaraly?..)
Uly atalar, bostandyqqa jerikpin,
Júz jyl ótti, olar úshin ólikpin...»-
Dep, ishimnen oılasam da, men baıǵus,
Basymdy ızep, tómen qaraı berippin...
«Keshir bizdi, o tarıh qaharly?..»-
Dep, kózimmen aımalaımyn atamdy...
-Asyǵys ek, keshirińder, halaıyq,
Qysqa ǵana qaıyraıyn Batamdy?-
Dep, Mirjaqyp, qolyn jaıyp:
-O, Allam!
Tapshy armanyn Qazaǵymnyń joǵalǵan?
Myna urpaǵym, óz kózimen kórsinshi,
Qazaǵymdy bar jaǵynan ońalǵan!
Bul ómirde jolyń bolyp tańdaǵan,
Bar jaǵynan Baqytty bol, al, balam!
Bul Batamdy batam dep bil jáne de
Myna saǵan, bar Qazaqqa arnaǵan!,
Dep, jatqanda men túsimnen oıandym,
Tań atypty, aq sáýlege boıandym
Qýanyshtan dúrs-dúrs etken júregim,
Júregimdi qaıda, qalaı qoıarmyn...
Ahań, Jaqań!.. Qazaq úshin týypty!
Dep, oılaımyn: «Netken jandar bilikti?!.»
Tósektegi nemereme qarasam,
Ol da búgin tańmen erte turypty...
Jumash KENEBAI KÓKBÓRİ,
07.09.2017 jyl.
