Memlekettik «Densaýlyq» baǵdarlamasynyń basty maqsaty  -  halyq densaýlyǵyn nyǵaıtý jáne qorǵaý.  Osy oraıda úzdik halyqaralyq tájirıbege súıensek, densaýlyq saqtaý júıesin odan ári damytýdyń  negizi qoǵamdyq densaýlyq saqtaý qyzmetin qurý bolmaq. Qoǵamdyq densaýlyq saqtaýdyń  qyzmeti   múddeli memlekettik organdarmen  ózara is-qımyl  negizinde  keńester berip, salaýatty ómir saltyn nasıhattaý jáne  turǵyndardy  qorshaǵan ortanyń túrli zıandy faktorlarynan, durys tamaqtanbaýdan, juqpaly dertterden saqtandyrý jáne  aldyn alý bolyp tabylady.  Oblystyq densaýlyq saqtaý mamandary esirtki, shylym sekildi zıandy ádetterden aýlaq bolý maqsatyndaǵy  sharalaryn  júıeli júrgizip keledi. Aıta ketsek, oblys boıynsha esirtkini zalaldy tutynýmen jáne oǵan táýeldilikpen narkologıalyq esepte 671 nashaqor tursa, onyń ishinde 524-i dıspanserlik esepke, 147-si profılaktıkalyq esepke tirkelgen. 

 Esirtkiniń «aýyr» jáne «jeńil» bolyp bólinýi – onyń 1 gramyndaǵy ýly zattardyń kólemine baılanysty eken. Alaıda  esirtkiniń az mólsheri de aǵzany ýlandyrady. Adamnyń oılaý qabileti, este saqtaý qabileti birtindep kemip, ashýlanshaq jáne agressıvti bolady. Shekten tys qorqý sezimi paıda bolady. Belgili bir ýaqyttan keıin jeńil esirtki qanaǵattyrmaı, adam esirtkiniń aýyr túrine kóshedi. 

-Esirtkimen kúresti eń aldymen mektep qabyrǵasynan bastaýymyz kerek. Eger bala onyń zıany men azaby týraly habardar bolsa jáne onyń dertiniń aýyr  másele ekendigine kózin jetkize bilsek, sonda ǵana balalarymyzdy saqtandyra aldyq deýimizge bolady. Árıne, esirtkiniń taralý jolyna óte qatań tyıym salý men jazalaý júıesin qarsy qoıýǵa bolady. Biraq, qoǵam músheleri turǵysynan suranys bolǵan jaǵdaıda, ony tipti ólim jazasymen de tosqaýyldaı almaısyń. Demek, eń aldymen suranysty azaıtýymyz kerek. Balany tek úrkitip-qorqytpaı, onyń sanaly túrde esirtkiden bas tartýyna jaǵdaı jasaý kerek,- deıdi  oblystyq salaýatty ómir salty ortalyǵynyń mamany Móldir Qurmasheva.

Gúlim AQAP,

Batys Qazaqstan oblysy