6 qazanda tanymal rejıser Erkin Raqyshevtiń «Kókjaldar» fılminiń tusaýkeseri ótti, dep habarlaıdy Qamshy.kz aqparat agenttiginiń tilshisi.

Fılmniń tusaýkeserine  qoǵam qaıratkeri, profesor, memleket basshysy Nursultan Nazarbaevtyń bılik basyna qalaı jetkendigi baıandalǵan «Aqıqat pen ańyz» kitabynyń avtory Serikbolsyn Ábdildın, ataqty ǵalym Orazaly Sábden, senarı avtory Ramazan Qurmanbaev jáne qoǵam qaıratkerleri men elimizdiń beldi akterleri qatysty.

Fılm týraly  pikir bildirgen Serikbolsyn Ábdildın qanmen bitken jigerli kúshti jastarǵa fılm arqyly kórsete bilgen Erkin Raqyshevtiń komandasyna rızashylyǵyn bildirdi. «Fılm bastalǵannan aıaqtalǵan ýaqytyna deıin tolqyp otyrdym. Sebebi, fılmdegi kórinister adamnyń janyn, júregin qozǵaı bildi. Meniń bir túıgenim, biz rýhanı jańǵyrý dep júrmiz, negizinde, «rýhty joǵaltpaý kerek» degen uran bolǵany durys. Bizdiń qanymyz da, ádet-ǵurpymyz da keń dalamyzǵa saı ónip ósken ultpyz. Qazaq – dosyna adal, qasyna qatal. Sol minez-qulyqty jańǵyrtýdyń qajeti joq, ony saqtaýymyz kerek, kóbeıtýimiz kerek, qanmen bitken jigerli kúshti jastarǵa syılaýymyz kerek», - deı kele el azamaty rejıser Erkin Raqyshevtiń ári qaraı jastardy tárbıeleıtin talaı týyndyny dúnıege ákeletinine senim bildirdi.

«Kókjaldar» fılminiń maqsaty – qasqyrdyń tekti minezin negizge ala otyryp, ultymyzdyń boıynda joǵalyp bara jatqan asyl qasıetter men adamı qundylyqtardy urpaqtyń sanasyna sińirip, namysyn oıatyp, rýhyn kóterý.

Osy oraıda rejıser Erkin Raqyshev búgingi jastardyń ulttyq rýhty joǵaltyp alǵanyn jáne atalmysh fılm arqyly joǵaltyp alǵan rýhymyzdy qaıtarýdy maqsat etkenin aıtty. «Búginde halqymyz kók bóriniń urpaǵy ekenin umytyp, qasqyr minezdiden qoı minezdige aınalǵan zamanda bizge rýh, namys jetispeıdi. Sondyqtan osyndaı kınolar arqyly ulttyq rýhty kóterýimiz qajet. Ár jas kókiregin kerip «Men qazaqpyn!» dep aıtqa alatyndaı ózge ulttardyń qyzǵanyshyn týdyratyn jańa ult qalyptastyrýymyz kerek. Osynyń bárin «Kókjaldar» fılminen bastaımyz», –  dep qorytyndylady sózin Erkin Raqyshev.

Aıta keteıik, fılm Ońtústik Qazaqstan oblysy Túlkibas aýdanynda, «Aqsý-Jabaǵaly» qoryǵynda túsirilgen. Óz kezeginde ǵalym Orazaly Sábden tabıǵat, jan-janýarlar, adamdar – osy úsh úlken qubylystyń úılesimin taba bilgen rejıserge zor tabys tilep, «Kókjaldar» fılminiń bolashaǵyna senim bildirdi.

Fılmdi jaqyn arada elimizdiń kınoteatrlarynan tamashalaı alasyzdar!