Almaty turǵyny áıeliniń birneshe jyl boıy nekeleskennen keıin dinı aǵym qabyldap, eki qyzyn alyp, qashyp ketkeni jaıly aıtyp berdi, - dep habarlaıdy Qamshy.kz aqparat agenttigi Tengrinews.kz saıtyna silteme jasap.

Erbol Qasymov (keıipkerdiń aty-jóni ózgertilgen - Avt.) áıeli Aıgúlmen nekeleskenine jeti jyldan asqan. Aıtýynsha, áıeli dindi qatty ustanbaıtyn.

"Jyl saıyn sheshesine Kavkazǵa baryp turdy. Meniń jumysym ónbeı qoıdy, ol jumys istemedi, balalarmen júrdi. 2014 jyly taǵy bir baryp kelgennen keıin hıdjap kıip, namaz oqyǵysy keletinin aıtty. Budan qıyndyq kórmedim, oǵan árdaıym qoldaý bildirýge daıyn edim, biraq bul jaıly kim keńes bergenin surap kórdim. Ol órt, ot týraly tús kórip júrgenin aıtty. "Olar musylman ǵoı, bul qudaıdan kelgen belgi, naǵyz musylman bolý kerek dep aıtty" dep túsindirdi", - dep eske alady Erbol.

Er adamnyń aıtýynsha, ol sol kezde budan esh jamandyq kórmeı, áıeline qoldaý bildiripti. 

"2016 jyldyń naýryzyna deıin jaǵdaı jaqsy boldy. Ol óziniń qurbylarymen kóp aralasatyn boldy. Keıin qurbylary turmysqa shyǵyp, Reseıge ketip qaldy, biraq árdaıym baılanysta boldy. Biraz ýaqyttan soń anany jasama, mynany jasama, haram bolady deýmen boldy. Áýen tyńdaýǵa da, mereke toılaýǵa da bolmaıdy eken. Teledıdar kórýge múmkindik bermedi, balalarǵa dinı ánder qosyp berip júrdi. Men árdaıym balalarǵa ertegi aıtyp beretinmin, planshetten qoıyp beretinmin. Endi ol qudaısyzdardyń bulaı jasaıtynyn aıtyp, tyńdamaý kerek ekenin aıtty", - deıdi Erbol.

Osy sátte er adam birdeńe bolaryn sezgendeı úıdegi Internetti óshirip, áıelin meshit medresesindegi sabaqtarǵa aparǵan. 

"Aparyp jazdyrdym, bastapqyda medresege baryp júrgen, birneshe aı solaı boldy. Sosyn Kavkazdan oǵan Almatyda turatyn bir qyzdyń nómirin jiberipti. Bul qyz Tájikstan azamatynyń áıeli, sol azamatty Reseıden Qazaqstanǵa deportasıalapty. Olar tyǵyz qarym-qatynasta bolyp, kúnderdiń birinde áıelim maǵan "Men endi meshitke barmaımyn, ol jaq hanafı mazhabyn ustanady, men oǵan kelispeımin, men shyn musylman salafıtpin" dedi", - dep eske alady Erbol.

Er adam sol kezdiń ózinde áıeliniń mektep pen balabaqshadaǵy merekelerge barǵyzbaı, shyn musylmandar Jańa jyl men Konstıtýsıa kúnin emes, sharıǵat ruqsat etken merekelerdi toılaıdy dep aıtqanyn málimdedi. Keshki ýaqytta "shaıtandar ushyp júredi" dep terezeni de ashqyzbapty. Erboladyń dostary men áriptesterine de tımeı ketpepti, aıtýynsha, olar "durys jolda júrgen joq" dep, osy qarym-qatynasymen olardyń ony buzyp júrgen degen paıymyn aıtqan. 

"Sol kezde men alańdaı bastadym. Imamǵa baryp, "Ne isteımin?" dep suradym. Ol ony meshitke alyp kelýimdi surady. Kelip edik, ımam onyń úgit qurbany bolǵanyn aıtty. Ata-anasyna habarlastym, olar da sharasyz ekenin aıtty, olardy da áıelim tyńdamaı qoıdy. Bul alǵan betinen qaıtarý úshin biraz áreket ettim", - deıdi Erbol.

Taǵy bir qurbysy kelgen kezde áıel kúıeýin "áıelderdiń taqyrybynda áńgimelesemiz" dep páterden shyǵaryp jibergen, sonyqtan Erbol áıeliniń qurbysyn úıdiń kireberisinde ǵana kóripti. Aıtýynsha, áıel bastan aıaq qara kıim kıip alypty. Qolynda qolǵap, al betin oramal jabylǵan, sondyqtan kózin de kóre almapty. Aýlasynda Erbol onyń kúıeýin kóripti, kúıeýi saqaldy ári birtúrli kıinipti.

"Áıelime habarlasyp, qurbysynyń radıkal ekenin aıttym. Al áıelim olarǵa bul sózimdi aferıst dep aıtty dep jetkizip barypty. Olar sodan keıin maǵan qarsy úgitin bastaǵan, basyna neshe túrlini quıyp, meniń "durys jolda júrmegenimdi" aıtypty", - deıdi er adam.

Sońǵy janjal bul úıde 2016 jyldyń jeltoqsanynda bolypty. Erbol áıeline aıtpaı, balalaryna jańajyldyq kostúmderdi satyp alyp berip, jańajyldyq sharaǵa jiberipti. 

"Barlyǵy jaqsy ótti, al keshke áıelim shý shyǵaryp, betimdi tyrnap aldy, "ımansyz" dep atap, musylman eline ketkisi keletinin moıyndady. 2 qańtarda "baýyrlaryna" habarlasyp, olar 15 mınýttyń ishinde qalanyń basqa túkpirinen jetip keldi. Qatty tańǵaldym. "Muny aldyn ala josparlaǵansyńdar ma?" dep suradym. Ol maǵan "Ket, men senimen sóılespeýim kerek" dedi. Sóıtti de kıim-keshegin jınastyra bastady. Kenje balamdy alyp úlgerdim de kólikke aparyp qoıdym, úlken qyzyma bara jatqanymda ony da alyp ketipti", - dedi Erbol.

Erboldyń aıtýynsha, úıge kelgen er adamdar shyn musylman bolmaıynsha áıeli men qyzdaryn eshqashan kórmeıtinin aıtqan. Keıin áıeli "baýyrlaryn" paıdalana otyryp, Erboldyń jumysta bolǵan sátin paıdalanyp, kenje qyzyn balabaqshadan urlap áketipti. 

Sodan beri, er adamnyń aıtýynsha, áıelimen eki ortada ajyrasý prosesi júrip jatyr eken. Er adam áıeliniń úgit qurbany bolǵanyn jáne ony úıge qaıtarǵysy keletinin aıtyp otyr.

"Besinshi qazanda ajyrasýǵa aryz jazdy. Sotqa baryp, aryzdy qarap kórsem, onyń ózi jazbaǵan. Telefon soǵyp, surasam "Naǵyz musylman bolsań, nekelesemiz" dep jaýap qatty. Meni onyń baýyrlary tekserýi kerek eken. Sosyn óz dostarymmen emes, onyń baýyrlarymen aralasýym kerek ekenimdi aıtty. Ol aryzdy "baýyry" jazǵanyn aıtty, ol ózi tek qol qoıyp beripti. Al qyzdarymdy oqytpaı, shyn musylman qylǵysy keledi eken, ózi salafıtke turmysqa shyqqysy keledi. Olar ózderi sıaqty saqaldy advokat taýyp alypty", - deıdi Erbol.

Er adam qajetti organdardan kómek surap, advokat jaldaǵan, poısıaǵa aryz túsirgen, aýdandyq jáne ıývenaldyq sotqa da barypty.

"Birinshi sotymyz aýdandyq boldy. Bar dálelimdi usyndym. Áıelim de qorqynyshty túster kórgen soń naǵyz musylman bolǵanyn moıyndady. Sóıtip, olar osy sotta jeńilgen soń "qurbylary" oǵan din taqyrybynda sóz qozǵama jáne kúıeýim uryp-soqty dep aıt dep kóndiripti. Biraq muny dáleldeı almady, sebebi tárbıeshiler de, muǵalimder de, kórshiler de, ata-anasy da meniń qandaı adam ekenimdi biledi", - dedi er adam.

Osylaı basy qatyp júrgen Erbol qyzdarynyń jıi aýyryp qala beretinin jáne azyp ketkenin baıqaıdy. Aıgúldiń ózi de aýyryp júrgendikten, er adam úsheýin de aýrýhanaǵa jatqyzypty. Alaıda bir aptadan keıin áıel qyzdaryn alyp, aýrýhanadan qashyp ketken. Áıel qyzdardyń densaýlyǵy "Allanyń qolynda ekenin" jáne em-domnyń qajeti bolmaıtynyn málimdepti.

Er adamnyń aıtýynsha, sodan beri áıeli habarsyz ketken.

"Qyzdarymdy kórmegeli kóp boldy, Ázirbaıjanǵa alyp ketipti. Ata-anama da, maǵan da telefon soqpady. Eki sotta da jeńip shyqtym, olar bolsa maǵan qyzdarymdy jolatpaıdy. Sodan beri sozylyp ketti, áli de áıelimdi jaqsy kóretinimdi aıtyp, balalarymdy úıge qatarýyn surap kelemin. Men oǵan súrelerdi jattap júrgenimdi de aıttym", - deıdi Erbol Qasymov.

Ol jeńilgisi joq ekenin aıtyp, zań turǵysynda qyzdaryn dinı aǵym áserinen qorǵap qalamyn dep úmittenip otyr.