Búgin aqyrzaman ornaıdy. Bul bizdiń emes, NASA ǵalymdarynyń aıtqan boljamy. Esterińizge bolsa, ǵalymdar osy beısenbide, ıaǵnı búgin  TS asteroıdy jerge óte jaqyn jáne qaýipti qashyqtyqqa deıin jaqyn keledi degen bolatyn. Aqıqatyn eshkim bilmese de halyq mundaı jańalyqqa eleń etpeı qoımaıdy. Sońǵy jyldary qoǵamda dúmpý týdyryp júrgen «12 qazandaǵy aqyrzaman» qanshalyqty aqıqat? Jáne buǵan sharıǵat ne deıdi? Osy suraqtardyń izimen Shyǵys Qazaqstan oblysy, Óskemen qalasynyń ókil ımamy, Halıfa Altaı meshitiniń bas ımamy Ermek Muqataıulyn sózge tartqan edik.

         – NASA ǵalymdarynyń boljamyna dinı turǵydan ne aıta alasyz?

         –Aqyrzamannyń erte me, kesh pe bolatyny anyq. Onyń naqty qashan  ekeni Alla Taǵalaǵa ǵana aıan. Qasıetti Quranda: «Muhammed, olar senen qıamettiń qashan bolatyndyǵyn suraıdy. «Shynynda onyń málimeti Rabbymnyń qasynda. Onyń ýaqytyn ózi ǵana biledi. Kókter men jerdegi aýyr jaǵdaı senderge kenetten-aq keledi» de. Sen ony zerttep otyrǵandaı surastyrady. «Shynynda onyń bilimi Allanyń quzyrynda. Biraq adamdardyń kóbi ony túsinbeıdi» dep aıt» dep ǵaıbı (kómeski) ister jaıly naqty málimet bir Allaǵa ǵana málim ekenin eskertedi. Ábý Hýraıra (r.ǵ) Jebireıildiń (ǵ.s) adam sýretinde Paıǵambarymyzǵa (s.ǵ.s) kelip: «Qıamet qashan bolady?» - dedi. Paıǵambarymyz (s.ǵ.s): «Ol jaıly suralýshy, suraýshydan artyq bilmeıdi. Biraq onyń belgilerinen seni habardar eteıin» jáne: «Alty nárse kelýden buryn izgi amal jasaýǵa asyǵyńdar. Olar: Kúnniń batystan shyǵýy, dájjal, duhan (tútin), dábbatýl-ard (haıýan), bireýińniń basyńa keletin ólim jáne jalpyǵa birdeı keletin qıamet» dep qıamet belgilerine mán berýge shaqyrady. Árkim óziniń qansha jasynda, qaı jyly, qaı kúni dúnıeden ótetinin bilgende áli ýaqytym bar dep boıdy keńge salyp júre beredi nemese ýaqyt taıaǵan saıyn boıyn qorqynysh bılep, ómirden túńilip qoǵamnan alshaqtap qalar edi. Tipti, qulshylyq jasasa da Alla razylyǵyn kózdep tolyq maǵynada jasaı almaı, óletinin oılap ala kóńil bolyp turady. Qulshylyq Alla Taǵalanyń sheksiz nyǵmetterine razylyq turǵysynan jasalýy, qorqynysh áserinen zorlyqty túrde jasalmaýy kerek. Árbir adam qashan, qalaı óletinin bilmeýi, ólim qorqynyshyn bir sát bolsyn umytyp (ólmeıtindeı), úmitpen aqyreti sanalatyn tosyn ajal arpalysyna erkin daıyndyq jasaýy Alla Taǵalanyń álsiz pendelerine syılaǵan keńshilik-rahmeti degen.

         –Aqyrzamandy qalaı elestetesiz?

         –Aqyrzamandy, tek qana Quran men Paıǵambarymyzdyń (s.ǵ.s) aıtqan hadısterine súıene otyryp elestete alamyz.  Qıamet – sýrdyń (syrnaıdyń) qatty daýysynan keıin ile-shala buryn-sońdy bolmaǵan jer silkinisi, sýnamı, janartaýdyń atqylaýy syndy istermen dúnıe tirshiliginiń aıaqtalýy. Quran, hadıs qıamet kúni tóbesi kók tiregen ǵımarattar, záýlim zaýyttar, qymbat baǵaly kólikter sıaqty adam balasy janyndaı jaqsy kóretin, ajyramas menshigi retinde bilgen nárselerdiń barlyǵy tozańǵa aınalyp, tapjylmastaı bolyp kóringen taýlar tarydaı shashylatynyn aıtady. Qasıetti Quranda: «Olar qıamet mezgiliniń ózderine kenetten kelýin kúte me? Rasynda onyń belgileri keldi ǵoı. Qıamet kelip bolǵanda, úgit alýlary nege jaraıdy?» dep qıamettiń belgileri kelgenin aıtsa, Alla elshisi (s.ǵ.s) eki saýsaǵyn biriktirip turyp: «Meniń paıǵambar bolyp jiberilýim men qıamettiń arasy osy ekeýi tárizdi» dep sońǵy paıǵambar bolyp jiberilýi qıamet kúniniń jaqyndyǵynyń belgisi ekenin eskertken. 

         –Qoǵamǵa aıtar sózińiz bolsa, marhabat.

         – NASA ǵalymdary aıtty eken dep Allaǵa degen senimimizden aıyrylmaıyq. Jáne qıamet kúnin kútip, qarap otyrýǵa bolmaıdy. Ǵıbadat qylyp, qulshylyqtaryńyzdy oryndap, ıgilikti istermen aınalysyńyzdar! Ǵaıypty da, bolashaqty da bilýshi jalǵyz Alla!

         –Áńgimeńizge rahmet!

Blıs-suhbatty júrgizgen Marjan ÁBİSH