Mindetti áleýmettik medısınalyq saqtandyrý júıesi bul turǵyndardyń densaýlyǵyn áleýmettik turǵyda qorǵaıtyn memlekettik júıe. Búgingi kúni oblysta mindetti áleýmettik medısınalyq medısınalyq saqtandyrý máseleleri boıynsha turǵyndarmen aqparattyq-túsindirý jumystary áli de belsendi júrgizilýde.
Oblystyq densaýlyq saqtaý basqarmasynyń baspasóz qyzmetine súıensek, MÁMS júıesi týraly 200-ge tarta beınerolıkter túsirilip, qoǵamdyq oryndarǵa syrtqy jarnamalar men aýdıojarnamalar túrindegi aqparattar ornalastyrylǵan. 500 myńǵa jýyq býklet, 300 myńǵa jýyq jol júrý bıletteri men komýnaldyq kásiporyndardyń túbirtegi taratylǵan. Sondaı-aq turǵyndardyń nysanaly aýdıtorıasymen, ıaǵnı jumys berýshimen, qyzmetkerlermen, memlekettik qyzmetshilermen túsindirý jumystary áli de júrýde. Jeke sot oryndaýshylar alqasynyń jáne qorǵaýshylar alqasynyń, sharýa qojalyqtarynyń, jeke kásipkerlermen kezdesýler uıymdastyrylǵan. «Qazaqstannyń 500 iri kásiporny» aksıasy aıasynda oblystyń iri 14 kásipornynda túsindirý jumystary ótkizilgen. «Nur Otan» halyqtyq-demokratıalyq partıasy oblystyq fılıaldarynda turǵyndarǵa keńes berýler uıymdastyrylǵan. Oblysta mindetti áleýmettik saqtandyrýdy engizý máseleleri boıynsha Biryńǵaı óńirlik Call ortalyǵy jumys isteıdi. Oblysta barlyǵy 3000-ǵa jýyq kezdesýler uıymdastyrylyp, eresek turǵyndardyń 87,3%-y qamtylǵan. Mindetti áleýmettik saqtandyrý júıesine qatysýshylaryna der kezinde sapaly medısınalyq jáne dári-dármektik kómek kórsetiletindigi túsindirilýde. Sonymen qosa memleket kepildik bergen tegin medısınalyq kómek sheńberinde jedel járdem, sanıtarlyq avıasıa qyzmetteri men áleýmettik mańyzy bar aýrýlarǵa kórsetiletin kómek jáne profılaktıkalyq ekpeler kiretindigi aıtylýda. Sondaı-aq MÁMS týraly zańǵa sáıkes qorǵa jarna tóleýden balalar kóp balaly analar, UOS qatysýshylary men múgedekter, jumyssyz retinde tirkelgender, ınternattyq uıymdarda bilim alýshylar men tárbılenýshiler, oqýdyń kúndizgi nysany boıysha oqıtyndar, bala týýǵa, bala asyrap alýǵa baılanysty demalystaǵylar men zeınetkerlerdiń bosatylatyndyǵy aıtylýda.
Gúlim AQAP,
Batys Qazaqstan oblysy
