Mysyrlyq áıel qyzyn materıaldyq turǵyda qamtamasyz etý úshin eldi 42 jyl boıy erkekpin dep aldap kelgen. Mysyrdyń ońtústigindegi aýylda er adamdar áıeldermen salystyrǵanda kóbirek aqsha tabady dep jazady Qamshy.kz aqparat agenttigi BBC-ge silteme jasap.

BBC jýrnalısi Sesa Abý Daý Lýksordeniń turmys-tirshiligimen tanysyp qaıtty. Sesa Abý Daý Lýksordeniń áńgimesiniń qazaqsha nusqasyn nazarlaryńyzǵa usynamyz.

Meniń esimim Sesa Abý Daý Lýksorde. Men aıaq kıim tazalaımyn. Mysyrdyń ońtústigindegi Al-Bogdadı aýylynda turamyn. Kóp qıyndyq kórdim. Kúıeýim júktiligimniń altynshy aıynda qaıtys boldy. Qyz bosandym. Osyndaı baǵa jetpes syı úshin Qudaıǵa alǵys bildiremin.

Qaıta turmys qura almadym. Tamaq tabý qıyn boldy. Qurylysta jumys istedim. Kúnine birneshe tyıyn ǵana taptym. Ákem de aǵam da kómektespedi. Jany jánátta bolsyn, anam ǵana qolynan kelgenshe qol ushyn berdi. Jumysta bolǵanda qyzyma qarady.

Áıelderdiń kıimin kıý? Eshqashan!

Maǵan uzaq qaraǵan adamdy basymmen uratynmyn. Qyzý qandymyn. Eshkim meni eshteńege májbúrleı almaıdy. Ol adamdy uryp tastaımyn. Qudaı maǵan kúsh berdi.

Bizge eshkim eshqashan kók tıyn da bergen emes. Barlyǵyn ózim isteýge týra keldi. Tek anam ǵana kómektesti.

Adamdar meni jaqsy kóredi. Aıaq kıimin tazalaý qajet bolsa meni taýyp alady. Musylmandar da, hrıstıandar da birdeı jaqsy qaraıdy. Mereke kúnderi sadaqa beredi.

Aıaǵym aýyra bastaǵanda osy dúńgirshekti ashtym. Barlyǵy mynaý qorapsha úshin. Men tek ólgende ǵana bul qorapshany tastaımyn.

Naǵyz áıel degen kim? Kúıeýi qaıtys bolǵanda balasyna qamqor bola alatyn adam.