Ǵabıt Músirepov «Has sulýdyń kóz jasyndaı, móldir ónerge» balaǵan teatr qashan da bolsyn rýhanı azyq jınap, taǵylymy mol tarıhtan habar beretin altyn besik. Ulttyń ulylyǵyn ulyqtaıtyn, ulaǵatty urpaq tárbıeleýge bastamashy bolatyn da teatr. Búginde elimizdiń barlyq qalasynda mádenıet oshaqtary, ıaǵnı teatrlar bar. Qazaq teatrymen qosa, ózge ulttyń mádenıetimen tanysýǵa da jaǵdaı jasalǵan. Endeshe, salystyryp kórelik. Qazaq teatrynyń kóshin bastap turǵan bıyl 92-shi maýsymyn ashqan M.O.Áýezov atyndaǵy qazaq drama teatry men 1993 jyly Almaty qalasynda ashylǵan M.Iý.Lermontov atyndaǵy orys drama teatryna kelýshilerdiń sany qandaı? Ónerge degen qyzyǵýshylyq qandaı dárejede?
Aldymen qazaq teatrynyń tarıhynan habar bersek. Tuńǵysh ret 1917 jyly Oıqudyq jaılaýynda Abaıdyń aıaýly jary Áıgerimniń segiz qanat úıinde Muhtar Áýezovtiń «Eńlik-Kebek» pesasy qoıyldy. Atalǵan pesa elimizde teatr oshaqtarynyń kóbeıýine bastamashy boldy.
Búginde qalyń kórermendi ózine úıirip otyrǵan Almaty qalasyndaǵy M.O. Áýezov atyndaǵy drama teatrdyń 24-shi qazanda sahlanaıtyn qoıylymyn kórelik.
Gogoldiń «Úılený» komedıasy alǵash ret 1961 jyly N.Jantórınniń rejıserligimen qalyń kórermenge jol tartqan. Janry - komedıa.
Al dál osy kúni Lermontov atyndaǵy orys drama teatrynda 2017 jyly 24-shi maýsymda premerasy ótken «Gore ot ýma» tragıkomedıasy sahnalanady.
Teatr - qoǵamnyń aınasy. Atalǵan qoıylymdar kúndelikti ómirde bolyp jatqan ózekti máselerdi astarly mysqylmen, qaǵytpa qaljyńmen, ádepti ázilmen jetkizedi.
Eki qoıylymnyń da bılet quny 500 teńgeden bastalady.
Orys drama teatryna baryp kórýdi jón sanap bılet satyp alýǵa bolatyn saıtty qaradyq. Qoıylymnyń sahnalanýyna áli 5 kún bar, alaıda birde – bir bılet qalmaǵan.
Al M.O. Áýezov atyndaǵy qazaq drama teatryndaǵy qoıylymǵa bılet bar ma eken?
Birshama oryn bos tur.
"Gore ot ýma" qoıylymynyń jaz mezgilinde premerasy bolǵandyqtan qalyń kórermendi ózine jıyp otyr ma? degen oımen basqa da qoıylymdarǵa nazar aýdardyq. Bul jerde de sanaýly ǵana oryn qalǵan.
Áýezov atyndaǵy qazaq drama teatrynda móldir mahabbatty sýretteıtin «Qyz Jibek» qoıylymynyń premerasy 2017 jyly 13-14 maýsymda ótti. Al 2 kúnnen soń sahnada somdalatyn qoıylym bıletteriniń satylymy qandaı eken? Bul jaqta da birshama oryn ázirge bos tur.
Eki teatrdaǵy bılet satylymyn eskere kele, orystildi kórermenniń sany Muhtar Áýezov negizin qalaǵan qazaq drama teatryna qyzyǵýshylardan áldeqaıda kóp pe degen jaýapsyz suraqqa tap bolasyń. Ekinshi jaǵynan qazaqtildi kórermen biraz ýaqyt buryn bılet alyp qamdanbaıdy degen oıǵa kelesiń.
Bastysy, teatrdyń ǵumyry, ónerdiń ómiri kórermenniń qoshemetimen ólshenetini eskerilip, teatr esigin tozdyrýshylar qatary kóbeıse, nur ústine nur bolady.
Aıgerim TAÝBAI
