Qarashanyń 9 - 19 kúnderi Germanıada ótken 66-shy Halyqaralyq Mangeım-Haıdelberg (International Filmfestival Mannheim-Heidelberg) kınofestıvalinde «Oralman» fılmi úzdik jetistikteri úshin arnaıy júldemen marapattaldy dep habarlaıdy Qamshy.kz aqparat agenttigi«Qazaqfılm» kınostýdıasynyń baspasóz qyzmetine silteme jasaı otyryp. Odan bólek, kınofestıvaldiń uıymdastyrýshylary atalǵan kınotýyndyny  Germanıada prokatqa shyǵarýyna usynys jasady. 

Esterińizge sala ketsek, Qazaqstan Respýblıkasy Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» kınostýdıasy túsirgen rejıseri Sábıt Qurmanbekovtiń «Oralman» fılmi atalǵan kınofestıvaldiń negizgi baǵdarlamasyna iriktelinip alynǵan bolatyn.  Bıyl festıváldiń bas júldesine 22 elden 21 kartına talasqa túsken. 

- Mádenı jáne dinı ózgeshelikterine qaramastan, óz eline qaıta oralǵan otbasynyń dramalyq oqıǵasy emosıonaldy áserli baıandalǵany úshin marapattalady, - delingen festıváldiń resmı saıtynda.  

Mangeım-Geıdelberg kınofestıvaliniń nátıjesi boıynsha, baıqaýdyń «Úzdik tolyqmetrajdy fılmi» atty bas júldesi rejıser Vıto Palmıerımniń «Tehasta kórisermiz» atty ıtalándyq kartınaǵa buıyrdy. Al fılıppındyq rejıser Bagane Fıol túsirgen «Ormandaǵy serýen» fılmi festıváldiń arnaıy júldesimen marapattaldy. Sonymen qatar, «Kúzetshi» (Domınıkan Respýblıkasy, Pýerto-Rıko, Brazılıa), «Qasıetti aýa» ( Izraıl) jáne «Murtaza» (Túrkıa) atty fılmder qazylar alqasynyń qurmetti syılyqtarymen marapattaldy.

66-shy Halyqaralyq Mangeım-Haıdelberg (International Filmfestival Mannheim-Heidelberg) kınofestıvaliniń halyqaralyq qazylar alqasynyń quramyna  Germanıanyń tanymal kınematografısteri – Klaýdıa Landsberger, Krıstıan Iýl Lemche jáne Klemens Klopfenshteınder kirdi. 

Halyqaralyq Mangeım-Haıdelberg kınofestıvali 1952 jyldan beri ótkizilip keledi. Festıvál kınoındýstrıanyń kásibı mamandaryna jáne kınosúıer qaýymǵa arnalǵan.  Jyl saıyn festıválge 500 kásibı maman men 60 myń kórermen qatysady. Bul óz kezeginde kınofestıvaldiń aýqymy keń jáne Germanıadaǵy eń iri festıválderdiń biri ekenin dáleldeıdi. Festıvál sheńberinde rejıserlermen, akterlermen jáne prodúserlermen kezdesýler uıymdastyrylady. 

Esterińizge sala ketsek, «Oralman» kórkem fılmi osy jyldyń basynda 
Irannyń astanasy Tegeranda ótken  35-shi Halyqaralyq Fadjr kınofestıvali men XIII Halyqaralyq «Eýrazıa» kınofestıvaliniń Bas júldesin jeńip alǵan bolatyn.  Fılmde basty róldi somdaǵan akter Dýlyǵa Aqmolda qyrkúıek aıynda Tatarstanda ótken XIII Halyqaralyq musylmandar kınosy festıvalinde «Úzdik er adam róli» júldesimen marapattaldy. Sondaı-aq, kartına Italıada ótken HH Halyqaralyq «Religion Today» kınofestıvalinde «Úzdik fılm» nomınasıasynda jeńiske jetip, táýelsiz SIGNIS qazylar alqasynyń arnaıy júldesin ıemdendi. 

Aıta ketelik, Bashqurtstanda ústimizdegi jyldyń jeltoqsanynda ótetin IV Halyqaralyq «Kúmis Aqbozat» kınofestıvaliniń ashylý saltanaty «Oralman» fılmimen ashylady.