Elordada jańadan ashylatyn HQKO-da operatorlar bolmaıdy dep habarlaıdy Qamshy.kz aqparat agenttigi. Bul týraly Parlament Májilisindegi Úkimet saǵatynda QR  Aqparat jáne komýnıkasıalar mınıstri Dáýren Abaev aıtty.

«Jaqyn arada Astanada digital-HQKO-ny ashý josparlanyp otyr. Onda operatorlardyń qatysýynsyz memlekettik qyzmetterdi tolyqtaı avtomattandyrylǵan rejimde alý qarastyrylǵan. Sıfrlyq halyqqa qyzmet kórsetý ortalyǵyn ashý memlekettik qyzmetterdiń jańa formatyna kóshýdiń kezeńi bolady. Osy oraıda azamattar qoǵamdyq pýnkter, ózine qyzmet kórsetý sektorlary men arnaıy stendterdegi planshetter kómegimen elektrondyq ótinimderdi beredi», - dedi Dáýren Abaev.

Búginde Aqparat jáne komýnıkasıalar mınıstrligi memlekettik qyzmet kórsetý prosesterin odan ári damytý boıynsha keshendi sharalardy júzege asyrýda. Eń aldymen, «elektrondyq úkimettiń» jáne «Azamattarǵa arnalǵan Úkimet» memlekettik korporasıanyń qyzmetin úılestirý men damytý sharalary eskerilgen.

Aqparat jáne komýnıkasıalar mınıstrligimen birigip jasalǵan servıske sáıkes, qyzmet alýshynyń ruqsaty rastalǵan jaǵdaıda memlekettik organdar men jeke uıymdarǵa «elektrondy úkimet» arqyly anyqtama berý qyzmetin iske qosý josparlanýda. Bul qyzmet túri HQKO qyzmetkerleriniń qatysýysyz ótedi. Azamat jeke málimetterin berý-bermeý jóninde sheshimdi ózi qabyldap, SMS-habarlama arqyly jaýap beredi.
«Qazirgi kezde 746 memlekettik qyzmettiń  621-i nemese 83 paıyzdan astamyn azamattar memlekettik korporasıa arqyly alýǵa qaýqarly. Elimiz boıynsha onyń 349 front-keńsesi bar. Olarda jumys isteıtin 22 myńǵa jýyq qyzmetker jyl saıyn 34 mıllıonnan astam qyzmet kórsetýde», - dep naqtylady Dáýren Abaev.