Respýblıka Saraıynda Qazaqstan Respýblıkasynyń Táýelsizdik kúnin merekeleýge arnalǵan saltanatty jıyn ótti. Alqaly shara barysynda Memleket basshysynyń Jarlyǵyna sáıkes elimizdiń damýyna eleýli úles qosqan almatylyqtarǵa memlekettik marapattar tapsyryldy.

Almaty ákimi Baýyrjan Baıbek Memleket basshysynyń sarabdal saıasaty men batyl sheshimderiniń arqasynda Qazaqstan damýdyń dańǵyl jolyna túskenin atap ótti. Ýaqyttyń ózi Elbasynyń «Aldymen ekonomıka, sodan soń saıasat» qaǵıdasynyń zamannyń talabyn dóp basyp, elimizdiń damýyna zor serpilis bergenin dáleldedi.

«Táýelsizdik jyldary Qazaqstan ekonomıkasy 20 esege artty. Jalpy kólemi 10 myń shaqyrymnan astam jol salyndy, jóndeldi, 120 mln. sharshy metr turǵyn úı salynyp, 1 mıllıonnan astam otbasy baspanaly boldy. 15 jylda ortasha jalaqy men zeınetaqy 10 esege artty. Qazirgi kezde bizdiń basty mindetimiz - álemniń damyǵan 30 eliniń qataryna ený. Onyń negizi Memleket basshysy júrgizip otyrǵan saıası, ekonomıkalyq jáne rýhanı jańǵyrý. Jahandaný ǵasyrynda Elbasynyń «Rýhanı jańǵyrý» baǵdarlamasy halqymyzdyń bar bolmysyn, rýhanı qundylyqtar men murany saqtap, Táýelsizdigimizdi baıandy etýge yqpal etetin bolady», - dedi B.Baıbek.

Almaty ákimi Elbasynyń bastamasymen júzege asyp jatqan memlekettik baǵdarlamalardyń óńirlik ekonomıka men eńbekpen qamtýǵa zor serpilis bergenin atap ótti. Tek bıyldyń ózinde ǵana Almatyda 20 myń adam jumysqa tartyldy, kósheler men skverlerdi qaıta jasaýǵa 43 myń adam qatysty.

«Nurly jol» baǵdarlamasy elimizdiń óńirlerin kúretamyr joldarmen jalǵap, azamattardyń iskerlik belsendiligin, elimizdiń ınvestısıalyq tartymdylyǵyn arttyrdy. Óz kezeginde «Nurly jer» baǵdarlamasy halyqtyń jeńildikpen úı alýyna múmkindik berdi. Qalada 14 myńnan astam páter salynatyn bolsa, sonyń 5880 páteri bıyl iske qosyldy.Bul 2016 jylmen salystyrǵanda 3 esege artyq. Osy baǵdarlamalardyń arqasynda jańa jumys oryndary ashyldy, azamattardyń tabysyn kóerýge oń serpin berildi, qosymsha salyq túsimderi qamtamasyz etildi», - dedi B.Baıbek.

Almaty ákimi halyqaralyq zertteýler qorytyndysy boıynsha 2030 jylǵa qaraı álemdik ekonomıka flagmandary Ońtústik – Shyǵys Azıa elderi, ásireese Qytaı men Indıa bolatynyn jetkizdi. Osylaısha, álemdik ekonomıkanyń damý tetikteri Shyǵysqa qaraı yǵysýda. Óz kezeginde Almaty jahandyq básekege qabiletti naryǵy bar Orta Azıadaǵy ekonomıkasy eń qarqyndy damyǵan qalaǵa aınaldy ári Ońtústik Koreıa, Japonıa, Qytaı syndy elderdiń ınvestısıalary tartylǵan. Al bul Almatynyń Sıngapýr jáne Gonkong sıaqty úlken ınvestısıalyq áleýetke ıe ekenin kórsetedi.

«Búgingi kúni Almaty – iskerlik ortalyq, bıznes júrgizýge qolaıly qala, Orta Azıadaǵy qalyptasqan iri óńirlik magnıt. Memleket basshysynyń tapsyrmasy boıynsha keptelis máselesin sheshýge yqpal etetin somasy 500 mıllıardtan astam teńgeni quraıtyn Úlken Almaty aınalma avtokólik (BAKAD) jolynyń qurylysy bastalady. Bul joba Batys Eýropa- Batys Qytaı kúretamyr jolyna qosylyp, myń jyldyq tarıhy bar qalamyzdyń Uly Jibek jolyndaǵy saýda ortalyǵy retindegi mártebesin qaıta jańǵyrtady», - dep atap ótti qala basshysy.

Saltanatty jıyn barysynda elimizdiń damýyna eleýli úles qosqan almatylyqtarǵa memlekettik marapattar tapsyryldy. Memleket basshysynyń Jarlyǵyna sáıkes bıylǵy jyly 70-ten astam almatylyq memlekettik joǵary marapatqa ıe boldy. Olardyń úshten biri - bilim, densaýlyq saqtaý, mádenıet sport pen áleýmettik qorǵaý syndy áleýmettik sala ókilderi, besten biri – bıznes pen óndiris oryndarynyń ókilderi, 18% – memlekettik qyzmetkerler,15% – qurylysshylar. Azamattyq qoǵam men BAQ ókilderi de joǵary marapatty ıelendi.

Mysaly, «Parasat» ordenimen Qazaqstan Respýblıkasynyń Ánuranyn tuńǵysh oryndaýshy Sara Tynyshtyǵulova marapttaldy. «II dárejeli Dostyq» ordenin memleket jáne qoǵam qaıratkeri, Orta Azıa Ýnıversıtetiniń prezıdenti Jumataı Álıev aldy.

«Qurmet» ordenimen «Men almatylyqpyn» qoǵamdyq qozǵalysynyń negizin qalaýshy Konstantın Avershın, sýretshi Amandos Aqanaev, ánshi Mádına Sádýaqasova,«Ortalyq klınıkalyq aýrýhana» AQ aýrýhanalar birlestiginiń meńgerýshisi Sergeı Shıller marapattaldy.

«İİİ dárejeli«Eńbek Danqy» ordeni «Aqsaı» Nanbólkekombınaty» JSHS nan-bólke ónimderin daıarlaýshy Rýshangúl Gaıtovaǵa,«Kastıng» JSHS elektrolız suıyqtyǵy sehynyń elektrolıznıgi Aleksandr Zeıbelge berildi.

«Qazaqstannyń eńbek sińirgen qaıratkeri» ataǵyn «Symbat» sán akademıasynyń art-dırektory Balnur Asanova ıelendi. Qazaqstan Respýblıkasynyń Qurmet gramotasymen №134 lıseıdiń hımıa pániniń muǵalimi, 30 jyldyq eńbek ótili bar pedagog Irına Nesterenko marapattaldy.