Qazaqstan Respýblıkasynyń Táýelsizdik kúnine arnalǵan saltanatty jıyn barysynda Almaty ákimi Baýyrjan Baıbek Memleket basshysynyń «Sıfrly Qazaqstan» qurý boıynsha bergen tapsyrmasyna oraı qazirgi kezde «Smart Almaty» ınovasıalyq qalasyn qalyptastyrýǵa qatysty belsendi

«Zamanaýı tehnologıalardy densaýlyq saqtaý, bilim berý, bıznes, qaýipsizdik jáne kólik sıaqty salalarda engizý azamattarǵa esh kezeksiz, ǵalamtor arqyly memlekettik qyzmetterdi paıdalanýlaryna múmkindik beredi. Bulardan ózge, memlekettik qyzmet kórsetý ýaqyty qysqarady ári ashyq bolady, sybaılas jemqorlyqqa baǵyttalǵan adamı faktor joıylady», - dedi Baýyrjan Baıbek.

Almaty ákimi búginde jol qyzmetkerleri men avtokólikterdiń beıne tirkeý jáne GPS qurylǵylarmen qamtylǵanyn aıtty.Eger ınspektorlar belgilengen baǵyttan shyǵatyn nemese beınetirkegishti óshiretin bolsa, onda olar qyzmetten bosatylady. Bulardan ózge, jol polısıasy ákimshilik quqyq buzýshylyq týraly hattamany elektrondy toltyrýǵa kóshti. Bul osy saladaǵy jemqorlyqtyń beleń alýyna tosqaýyl qoıyp, aıyppuldy sol jerde tóleýge múmkindik beredi. Qazirdiń ózinde polısıa qyzmetkerleri 200-den astam planshetpen qamtylǵan, kelesi jyly olar planshetpen 100% jabdyqtalatyn bolady.

Ol qaladaǵy «bir tereze» qaǵıdasymen barlyq memlekettik qyzmetti kórsetetin «Open Almaty» qoǵamdyq qabyldaý ortalyǵy týraly da aıtty. Bul ortalyq Ońtústik –Shyǵys Eýropa elderiniń arasynda halyqqa qyzmet kórsetýdegi ınovasıalyq joba retinde 2-shi oryndy ıelendi. Ortalyq azamattar úshin sabylyp qala kezbeı, memlekettik qyzmetti bir jerden alýǵa múmkindik beredi. Qoǵamdyq qabyldaý halyqqa yńǵaıly bolý úshin qala ortalyǵynda - «Almaty Towers» ǵımaratynda ornalasqan. Munda qalanyń barlyq aýdandyq ákimdikteriniń, bes negizgi basqarmalardyń, alty ortalyq memlekettik organnyń, «Atameken» UKP-nyń ókilderi men medıatorlar jumys isteıdi. Shaǵymdar telefon jáne Internet arqyly on-laın qabyldanady. Ashylǵanyna nebári 3 aı bolǵan Ortalyqqa 4 myńǵa jýyq ótinishter túsken.

Almaty ákimi halyqaralyq zertteýler qorytyndysy boıynsha taıaý arada álemdik ekonomıkanyń jańa tendensıalarǵa negizdeletinin aıtty. Dástúrli dúkender qyzmetine, qolma-qol aqshaǵa, óndiristegi qol eńbegine suranys azaıady. Barlyq saýda- sattyq pen qyzmet kórsetý elektorndy túrde ınternet arqyly júzege asady.

«Búgingi kúni qalamyzda elektrondy komersıa júıesi keń qoldanysqa ıe. Mysaly, respýblıka boıynsha «Qazposhta» arqyly shetelden keletin poshtalyq jóneltilim kólemi 10 mıllıonnan asatyn bolsa, onyń 40 paıyzy Almatyǵa tıesili. Jalpy, qazirdiń ózinde almatylyqtardyń sıfrly tehnologıany qoldaný deńgeıi óte joǵary. Elektrondy úkimet portalyn qoldanýshylardyń 25%-y almatylyqtar. Elimizdegi tólem kartalarynyń 30%-y Almatyda tirkelgen, búkil qolma-qol aqshasyz tólemderdiń 54 paıyzy Almatyda júrgiziledi», - dedi Baýyrjan Baıbek.