25 jeltoqsan kúni Ortalyq Komýnıkasıalar Qyzmetinde «Qazaqstan» Ulttyq telearnasynyń jańa jylǵa daıyndaǵan baǵdarlamalarynyń tanystyrylymy ótti, dep habarlaıdy Qamshy.kz aqparat agenttigi.
Mereke qarsańyndaǵy apta máńgilik mahabbat jaıly ańyz negizinde túsirilgen «Qozy Kórpesh-Baıan Sulý» atty 6 bólimdi kórkem telehıkaıanyń tusaýkeserinen bastalady. 25-29 jeltoqsan aralyǵynda kúndelikti saǵat 21.45-te Ulttyq arna kórermenderi qazaq mádenıeti men óneriniń uly murasynyń ekranızasıasyn tamashalaı alady. Telehıkaıanyń bas prodúseri – Baıan Maqsatqyzy. Senarı avtory – Ánnes Baǵdat. Basty rólderdi Gúlzada Turlash, Erjan Muqataev, Baqtıar Qoja, Jaqsybek Qurmanbekov pen Marat Abaı-Dildá syndy akterler somdady.
Senbi kúni, 30 jeltoqsanda, saǵat 20.00-de, birneshe aı boıy kórermenderge kásipkerliktiń qyr-syryn ashyp, bıznestiń ońtaıly jolyn kórsetken «Úmitker» realıtı-shoýynyń aqtyq shyǵarylymy ótedi. 5 mıllıon teńge kólemindegi syı kimge buıyratynyna Ulttyq arna kórermenderi kýá bolady.
Sondaı-aq, jańa jyldyq efır ázilge toly jobalarmen tolyqtyrylmaq. 30 jeltoqsan saǵat 11.30-da bastalatyn «Ázil álemi» baǵdarlamasy kórermenderge kóterińki kóńil-kúı syılaıdy. Al jeksenbi kúni, saǵat 14.10-da tanymal «Tamasha» ázil teatrynyń 90-shy jyldary túsirilgen eń úzdik toptamalary kórermenge jol tartady. Jańa jyl qarsańynda, 31 jeltoqsan kúni, saǵat 17.55-te elimizdiń tanymal vaınerleri, vıdeoblogerleri men qoǵam qaıratkerleriniń qatysýymen ótetin arnaıy «HA-HA shoý: Jańa Jyl 2018» jobasy kórsetiledi.
Halyq ánderi men kúılerin súıip tyńdaıtyn kórermender 30 jeltoqsan, saǵat 15.40-ta «Men qazaqpyn» halyqaralyq megajobasynyń gala-konsertiniń qaıtalaýy men merekelik konsertterdi tamashalaı alady.
Al, 31 jeltoqsan saǵat 22.30-da tanymal shoý-bıznes juldyzdarynyń qatysýymen jańa jyldyq sıqyrǵa toly «Syńǵyrlaǵan sıqyrlar» merekelik shoý-baǵdarlamasy efırge jol tartady. Atalmysh jobaǵa: Kámshat Joldybaeva, Aıgúl Imanbaeva, Búrkit, Álı Oqapov, Aıqyn Tólepbergenov, Kesh You, Qanat Úmbetov, Álıa Ábiken, Tóreǵalı Tóreáli, Oljas Abaı jáne «Qazaqstan» arnasynyń tanymal júrgizýshileri Janserik Beıseev, Aısulý Ryspanova, Irına Ten, Baıan Baqkeldiqyzy, Nartaı Aralbaıuly qatysady.
Eń kishkentaı telekórermenderimiz úshin 31 jeltoqsan saǵat 12.35-te áıgili «Walt Disney» kınokompanıasynyń qazaq tilinde dýblájdalǵan «Rapýnsel» múltfılmi kórsetiletin bolady.
