Qazaqstan Respýblıkasynyń Kásipodaqtar federasıasynda elbasynyń «Tórtinshi ónerkásiptik revolúsıa jaǵdaıyndaǵy damýdyń jańa múmkindikteri» atty kásipodaqtar belsendileriniń májilisi ótti, dep habarlaıdy Baq.kz.
Atalǵan shara Elbasynyń Qazaqstan halqyna Joldaýyn iske asyrý aıasynda ótti. Nursultan Nazarbaev jappaı sıfrlandyrý dáýiriniń ındýstrıasyn qurý úshin ındýstrıalandyrýdyń úshinshi besjyldyq josparyn ázirlep bastaýdy tapsyrdy. Mundaı ótpeli kezeńde eńbek kóleminiń keńeıý qaýpi bolýy yqtımal.
«Prezıdent óz joldaýynda bizdiń aldymyzda turǵan qıyndyqtarǵa tótep berýdi tapsyrdy. Desek te, ónerkásiptik revolúsıa – bul jańa múmkindikter men táýekeldilikti de talap etedi. Joldaý aıasynda qabyldanǵan áleýmettik saladaǵy mańyzdy sheshimder adamı kapıtaldy jetildirýge ǵana kómektespeıdi, sonymen qatar, turaqty jáne jappaı áleýmettik-ekonomıkalyq progres negizi bolyp tabylady. Árıne, jańa tehnologıalyq qurylym jumys oryndaryn ońtaılandyrýdy kózdeıdi. Qyzmetkerlerimizge munyń ne sebepti ekenin jáne jańa mamandyqtar boıynsha qaıta biliktiligin joǵarylatýdyń jáne ózgerý úrdisinde bolýdyń qandaı múmkindikteri bar ekenin túsinýimiz kerek», - deıdi Qazaqstan Respýblıkasy Kásipodaqtar federasıasynyń tóraǵasy Baqytjan Ábdiraıym.
Spıkerdiń pikirinshe, táýekeldik aımaqta naqty tabys ákelmeıtin kásipter de bar. Sondaı-aq, mehanıkalyq qaıtalanatyn úderisterge ushyraǵan tómen bilikti jumysshy mamandyqtar búgingi kúnde joǵalýda.
«Esterińizde bolsa, osydan 5-6 jyl buryn Astanada halyqaralyq kelissózder júrgizetin arnaıy pýnkt bolǵan. Qazir ol joq. Bul degenimiz, kóptegen mamandyq joǵalyp ketip jatqanyn aıtady. Tipti zańgerler de baǵdarlamalaý formatyna júginip otyr. Quqyqtyq salada týyndaıtyn barlyq másele 90% kompúterlik júıege aýysqan. Qazirgi tańda, adamzat balasy kókeıinde turǵan suraqtyń jaýabyn arnaıy bir ókilge barmaı, úıde otyryp, jańa tehnologıadan bilip otyrady», - deıdi Baqytjan Ábdiraıym.
Al tanymal saıasattanýshy Erlan Saırov sıfrlyq dáýirge beıimdelýdiń barysynda elimizge tıimdi jaqtaryn atap ótti.
«Qazirgi tańda, baıqasańyzdar adamnyń eńbegin jasandy robottar jasaýda. Iaǵnı adam eńbek etý monopolıasynan aıyrylyp jatyr. Sondyqtan bul joldaýdyń negizgi maqsaty osy dúnıeniń jańa kelbetinen qalys qalmaý bolyp tabylady. Munda elbasynyń aıtyp otyrǵany, máselen shet eldegi tehnologıalardy, ásirese aýyl sharýashylyq salasyndaǵy tehnologıalardy elge ákelip, Qazaqstandy dúnıejúzilik habyna aınaldyrý. Sebebi, adamzat balasynyń sany kúnnen kúnge óskendikten, azyq-túlik jaǵynan tapshy bolyp otyr. Al Qazaqstannyń jeri qunarly. Sondyqtan zamanaýı tehnıkalardy egistik alqabyna jumyldyrsaq, álemdik máseleniń bir sheshýin taptyq desek, artyq etpes», - deıdi Erlan Saırov.
