Uıaly telefondaǵy áńgimeniń jazylatyny eshkimge jasyryn emes. Kerek bolsa, arnaıy qyzmetter kez kelgen ýaqytta tyńdaı alady.
Telefondaǵy áńgimeńizdiń tyńdalyp jatqanynan qaýiptenesiz be? Internette ony anyqtaýdyń túrli joldary kórsetilgen. Máselen, sóılesý kezinde telefonyńyz tez qyzyp ketetin bolsa, tokqa qosyp qoıǵanda qatty ysysa, sóılesken ýaqytta óz daýsyńyz ózińizge jańǵyryp estilse, qýat kózi jyldam taýsylsa – alańdaýǵa negiz bar. Árıne, bulardyń bireýi ǵana sizge sáıkes kelse, ol qurylǵynyń óz aqaýynan bolýy múmkin. Degenmen saqtyqta qorlyq joq.
Byltyr quzyrly oryndarǵa áleýmettik jelilerdegi habarlamalardy oqýǵa ruqsat berilgen. UQQ men polısıa qyzmetkerleri terorızmnen kúdiktense nemese memleket tutastyǵyna qater tóndi dep eseptese, WhatsApp, Facebook sıaqty messendjerlerdegi habarlamalarǵa qol suǵýǵa quqyly.
Sonymen qatar UQQ men polısıa qyzmetkerleri prokýrordyń arnaıy sanksıasymen kúdiktilerdiń telefon arqyly aıtqan áńgimesin qozǵalǵan istiń sheńberinde tyńdaı alady.
Qazir ınternette ózge bireýdiń telefondaǵy áńgimesin tyńdaýǵa jaǵdaı týǵyzatyn saıttar bar. Suraǵan aqshasyn tóleseńiz boldy, qajet adamnyń telefondaǵy áńgimesine qulaq tosa beresiz. Negizi Internette ashyqtan-ashyq óz qyzmetin usynatyn saıttar zańmen qýdalanady. Alaıda mundaı baǵdarlamalardy jasap, jarıalap jatqandar jaýapkershilikten jaltarýdyń túrli ádisin oılap tapqan.
- Internettegi telefondy tyńdaýǵa arnalǵan baǵdarlamalar zańsyz. Biraq olar óz quqyqtaryn qorǵaý úshin eskertý jazyp qoıady. Mysaly, telefondaǵy áńgimesi tyńdalatyn adamnyń ruqsaty qajet. Mundaı jaǵdaıda jaýapkershilik baǵdarlamany jasap, óz qyzmetin usynǵandarǵa emes, ol qyzmetti paıdalanǵan adamǵa artylady, - deıdi zańger Qaırat Júkel.
Qazir telefonmen sóılesken óz áńgimeńizdi dıktofonǵa jazyp alýǵa bolady. Ol úshin arnaıy baǵdarlamany kóshirip alsańyz bolǵany. Alaıda jańa zańǵa sáıkes, áńgimeni dıktofonǵa jazý úshin suhbattasyńyzdyń ruqsatyn alýyńyz kerek. Áıtpese ol jeke ómirge qol suǵýshylyq bolyp sanalady. Ol úshin ákimshilik, tipti qylmystyq jaýapkershilikke tartylasyz. Mundaı jaǵdaıda moraldyq shyǵyndy óteý jaǵy da qarastyrylǵan. Árbir Qazaqstan azamatynyń jeke hattary, telefonmen sóılesýi zańmen qorǵalady.
