Qazaqstandyq Mıtropolıttik aımaqtyń ákimshilik jáne rýhanı-mádenı mıtropolıt Iosıf (Chernov) atyndaǵy ortalyǵynda Astana jáne Qazaqstan mıtropolıti Aleksandr men «Ýaqyp» Qazaqstandyq qory» korporatıvtik qaıyrymdylyq qorynyń prezıdenti Qaırat Aıtbaıdyń kezdesýi ótti, dep jazady Qamshy.kz aqparat agenttigi.
Kezdesý Qazaqstan Respýblıkasy Din isteri jáne azamattyq qoǵam mınıstrliginiń jáne «Ýaqyp» qorynyń bastamasymen ótti.
Kezdesýdiń basty taqyryby - bıylǵy jyldyń 7 aqpanynda órtenip keteken Almaty oblysy, Eńbekshiqazaq aýdany Túrgen aýylynda ornalasqan Arhıstratıga Bojıa Mıhaıla pravoslav shirkeýin qalpyna keltirý jumystaryna «Ýaqyp» qorynyń qatysýy boldy.
Qaırat Aıtbaı Mıtropolıt aımaǵynyń basshysyna, Mıhaıl-Arhangelsk shirkeýiniń kelýshilerine, ǵıbadathananyń órtenip ketýine baılanysty óz ókinishin bildirdi.
Sondaı-aq, qor prezıdenti Mıtropolıt Aleksandrge Memleket basshysy N.Á. Nazarbaevtyń bastamasymen 2017 jyly 1 shildede qurylǵan «Ýaqyp» qaıyrymdylyq qorynyń maqsattary men mindetterin tanystyrdy. Onyń aıtýynsha, bul qor komersıalyq emes qaıyrymdylyq uıymy bolyp tabylady. Onyń qyzmeti áleýmettik jobalardy, bilim berý jáne aǵartý jumystaryn qarjylandyrýǵa, sondaı-aq dinı qyzmetkerlerdiń tıimdiligin arttyrýǵa jáne ǵıbadathanalardyń jumys jasaýyna qoldaý kórsetýge baǵyttalǵan. Qor dinı radıkalızmniń aldyn alý, azamattardyń destrýktıvti dinı ıdeologıaǵa qarsy ımýnıtetin qalyptastyrý, destrýktıvtik dinı aǵymdardan zardap shekkenderdi ońaltý jumystary úshin kómek kórsetetindigi jáne áleýmettik az qamtylǵandarǵa, jumyssyzdarǵa, múgedekterge kómek kórsetýmen aınalysatyndyǵy aıtyldy.
Óz kezeginde Mıtropolıt Aleksandr Qazaqstandaǵy áleýmettik jáne qaıyrymdylyq qyzmetterdi ǵana emes, sonymen qatar memlekettik organdardyń, konfesıalardyń basshylaryn, bıznes jáne ǵylym basshylaryn eldiń rýhanı adamgershilik jáne zıatkerlik damýyna shoǵyrlandyrýǵa múmkindik beretin osyndaı qaıyrymdylyq qorynyń paıda bolýynyń ózektiligin jáne mańyzdylyǵyn atap ótti. Sonymen qatar, Mıtropolıt okrýginiń basshysy Qaırat Aıtbaıǵa Qazaqstan pravoslavıelik shirkeýiniń qyzmeti, bilim berý jáne áleýmettik qaıyrymdylyq jobalaryn júzege asyrýy, memlekettik organdarmen, úkimettik emes qoǵamdyq uıymdarmen jáne elimizdiń dástúrli konfesıalarynyń basshylarymen, eń aldymen Qazaqstan musylmandary dinı basqarmasymen ózara is-qımyly týraly aıtyp berdi.
Budan bólek, taraptar Qazaqstan Mıtropolıt okrýgy men «Ýaqyp» qorynyń yntymaqtastyǵy jáne ózara qarym-qatynas jasaý múmkindikterin talqylady.
