2018 jyldyń 1 qańtaryndaǵy jaǵdaı boıynsha elimizdegi halyq sany 18 157,1 myń adamǵa jetti. Sonyń ishinde qalalyqtar — 10 426,5 myń adam (57,4 paıyz), aýyldyqtar — 7 730,6 myń adam (42,6 paıyz). Bul týraly Qamshy.kz aqparat agenttigi QR Ulttyq ekonomıka mınıstrliginiń baspasóz qyzmetine silteme jasap habarlaıdy.
Vedomstvo málimetinshe, bul kórsetkish 2017 jylǵy 1 qańtarmen salystyrǵanda 231,2 myń adamǵa nemese 1,3 paıyzǵa ósti.
«AHAT organdary usynǵan azamattyq hal aktileri jazbalaryndaǵy málimetterdi óńdeý nátıjesinde, 2017 jylǵy qańtar-jeltoqsanda týylǵandar sany — 390,5 myń adam. Bul 2016 jylǵy qańtar-jeltoqsanǵa qaraǵanda 4,7 paıyzǵa az. Týýdyń jalpy koefısıenti 1000 adamǵa 21,65», — delingen mınıstrliktiń habarlamasynda.
Sondaı-aq, 2017 jylǵy qańtar-jeltoqsanda respýblıka halqynyń tabıǵı ósimi 2016 jylǵy qańtar-jeltoqsanmen salystyrǵanda 17,0 myń adamǵa nemese 6,1 paıyzǵa kemip, 260,5 myń adamǵa jetkeni aıtylady. Vedomstvo málimetinshe, tabıǵı ósimniń jalpy koefısıenti 1000 adamǵa shaqqanda 14,44 adamǵa teń boldy.
Al qaıtys bolǵandar sany jaıly málimetke qaraǵanda, ólim-jitimniń jalpy koefısıenti 1000 adamǵa 7,21 adam.
Baspasóz qyzmetiniń málimetinshe, 2017 jylǵy qańtar-jeltoqsanda respýblıkada 1 jasqa deıingi 3150 náreste ólimi tirkeldi.
«2016 jylǵy qańtar-jeltoqsanmen salystyrǵanda 1 jasqa deıingi shetinegen náreste sany 10,6 paıyzǵa azaıdy. Náreste ólim-jitiminiń negizgi sebebi — perınataldyq kezeńde paıda bolatyn jaǵdaılar, budan 2017 jylǵy qańtar-jeltoqsanada 1586 náreste qaıtys bolyp, náresteler arasyndaǵy jalpy ólim sanynyń 50,3 paıyzǵa qurady. Týa bitken aýytqýlardan 731 nemese 23,2 paıyzǵa, tynys organdary aýrýlarynan -195 nemese 6,2 paıyzǵa jáne jazataıym jaǵdaıdan, ýlanýdan jáne jaraqattan — 168 nemese 5,3 paıyzǵa náreste qaıtys boldy. 2017 jylǵy qańtar-jeltoqsanda náreste ólim-jitiminiń koeffısıeti 1000 týǵandarǵa shaqqanda 8,07 boldy», — dep habarlady baspasóz qyzmetindegiler.
Kóshi-qon qyzmeti organdary usynǵan málimetterdi óńdeý nátıjesinde, 2017 jylǵy qańtar-jeltoqsanda elimizge turǵylyqty turýǵa kelgenderdiń tirkelý sany 2016 jylǵy qańtar-jeltoqsanmen salystyrǵanda 20,5% kóbeıip, 16 081 adam qurady. Elimizden ketken kóship-qonýshylardyń tirkelý sany 7,8 paıyzǵa kóbeıip, 37 704 adam boldy, kóshi-qonnyń aıyrymy -21 623 adam.
Sondaı-aq, elimizdegi negizgi kóshi-qon almasýynyń TMD memleketterimen ekeni aıtylady.
— TMD elderinen kelgenderdiń úlesi — 72,1 paıyz;
— TMD elderge ketkenderdiń úlesi — 89,4 paıyz.
«Óńiraralyq kóship-qonýshylardyń úlesine elimizdiń jalpy ishki kóship-qonýshylar sanynyń 35,4 paıyzyn aldy. Óńiraralyq kóshi-qonnyń oń aıyrymy: Astana qalasy — 36 449 adam; Almaty qalasy — 31 775 adam; Aqmola oblysy — 1 544 adam qalyptasty», — dep habarlady vedomstvonyń baspasóz qyzmeti.
