«Bala – adamnyń baýyr eti». Degenmen osyny jete túsinbeı qursaǵynan jaryp shyqqan sábıinen bas tartyp, dalaǵa tastap jatqan jas analar bar. Osyndaı keleńsiz jaıt jaqynda Pavlodar óńirinde de oryn alǵany esterińizde bolar. Bul – bir ǵana ana men balanyń emes, qaımana qazaqtyń qabyrǵasyn qaıystyrǵan ult qasireti. Búkil qazaq qoǵamyn «jylatqan», bul jaǵdaı bizdiń de júregimizdi tynshytpady. Sonyń áserinen tómendegi úsh óleń ómirge keldi. Bul – bireýdiń qateligin betke basý nemese aıybyn ashý emes, keıingilerge sabaq bolsa degen nıet.
QASQA QULYN
Aldyńnan araı tógip atsa kúniń,
Túspese eger tumarly, jatqa kúnim.
Erteń-aq bolary anyq arǵymaq at
Búgingi múlgip turǵan qasqa qulyn.
Sıpatyp jat jurttyqqa burymdaryn,
Qara kózden ashshy jas syǵymdadyń.
Qazaqtan baqyt tappaı, muhıt asyp,
Ózińdeı ketti talaı qulyndarym.
Qulaq asshy, qubylmaı qasqa qulyn,
Joq pa edi saǵan shaǵar basqa muńym?
Qursaǵynan shyqqanyn qoqys tastap,
Nege ana sezindi jat sábıin?!
Talaı taǵdyr tolqyǵan jaǵada tur,
Talaı tamshy móltildep janarda tur.
"Sýyq úıdiń" munartqan terezesin
Talaı sábı telmirip qarap otyr.
Qymbat ǵoı kim-kimge de baqytty shaq,
Ómir ózi úkimin oqyp turad(y).
Eneńniń baýyrynda erkelegen,
Sen odan ekensiń-aý baqyttyraq.
Alla ózi jarylqar peıildini,
Joly bulaı túspesin keıinginiń,
Basy bútin bolsa da keı adamda,
Maldyń da joq bolyp tur meıirimi.
KÚNÁ
(Kókek ananyń monology)
Keshir balam, sen maǵan buıyrmadyń,
Taǵdyr talaı tatqyzdy quıyn dámin.
Sen keshersiń, aldymda men bilemin,
Bir kúnániń myńdaǵan «syıy» baryn.
Artyń jazyq bolsa da aldymyz jar,
Biz bilmeıtin dúnıeniń kóp syry
Meniń bir sát lázzátim eken-aý,
Seniń búkil ómirińniń óksigi.
Sábı kútip jylap júrse qansha adam,
Sol baqytty men de talaı ańsaǵam.
Arsyz ettiń, aıalaımyn dediń de,
O, mahabbat, túkiremin men saǵan.
Tirshiliktiń toǵystyrdy túnegi,
Qıa salý ońaı emes bilemin.
Dál toǵyz aı bir aýamen tynystap,
Júregimmen birge soqty júregiń.
Ar azaby janshymaıdy deısiń be?
Munymdy ar sanamaıdy deısiń be?
Kókirekti jaryp shyqqan qyzǵaldaq,
Iisińdi ańsamaıdy deısiń be?
Men muńlymyn, bult torlaǵan kúndeımin,
Qaharlana qarǵys aıtsyn, tún meıli,
Mine, ýaqyt. Qoshtasatyn sát jetti,
Al ákeńniń qaıda ekenin bilmeımin.
AŃSAÝ
(Sábıdiń monology)
O anashym,
Jan ediń janyń izgi,
Ne boldy eken baılaǵan baǵyńyzdy?
Analyq meıirińdi tókpe, meıli!
Aqtaımyn perzenttik paryzymdy.
Bilem, bilem, barasyń qımaı qarap,
Men túgili, aı jylap, tún oılanad(y)
Qursaǵyńa toǵyz aı syıǵan beıbaq,
Qushaǵyńa bir kún de syımaı barad(y).
Aıybym bolsa eger keshir meni,
Aımalap súıe almaımyn tósińdi endi.
Qulaǵyma azan da aıtylmady
Kindigim basqalardaı kesilmedi.
Mende áýlet joq,
Bolmaıdy janashyr da,
Kim alar qaıysqanda panasyna?
Jeti atasyz jer basqan jetimekpin,
Joq mende arqa súıer naǵashy da.
Zarymdy tún aıtady, kún aıtady,
Myna qoǵam nesine muńaıtady?
Ájem joq aq besikte álpeshteıtin,
Jylaǵanda ertegi kim aıtady?
Dalam jatyr sher basqan kókiregi,
Qalam únsiz, qaıǵydan egiledi.
Sen búgin kerek etpe, adamsynba!
Jetimegiń erteń-aq jetiledi.
Estimeppeń ájeńniń áldı ánin?
Almadyń ba batasyn qarıanyń?
Bir jylarsyń sen sonda esińe alyp,
Sher dombyra tókkende «Kúı-anany»,
Zar jaq bala salǵanda «Sábı ánin».
Ókpem joq adamǵa da, ǵalamǵa da
Kiná artpaımyn saǵan da, zamanǵa da
Men úshin ANA bireý, ÁKE jalǵyz,
Tirlikte tabylǵanmen saǵan bala.
Tileýberdi Sahaba
