QR Densaýlyq saqtaý mınıstri Eljan Birtanov Soltústik Qazaqstan oblysynyń medısına qyzmetkerlerimen kezdesti, dep habarlaıdy Qamshy.kz aqparat agenttigi QazAqparat málimetine súıenip.

Mınıstr mindetti medısınalyq saqtandyrý salasyndaǵy basty másele saqtandyrylmaǵan azamattardyń kóptiginde (2,7 mln adam) ekenin aıtty.

«Bul, eń aldymen, medısına qyzmetkerleri úshin qıyndyq týyndatady. Erteń olar kelip, medısınalyq kómek tolyq kólemde kórsetilmeıtinin biledi. Sondyqtan da olardy barynsha qamtýdy oılastyrý ústindemiz», - dedi E. Birtanov.

Densaýlyq saqtaý mınıstri dıspanserlik esepte turǵan syrqattar tizimin qysqartý jaıly týraly da aıtty. Qazir ol tizimde 263 aýrý bar.

«2 myń naýqasqa qaraıtyn ýchaskelik dáriger 263 aýrýdyń barlyǵyn baqylap otyrýy múmkin emes. Ony 30-ǵa deıin qysqartý jónindegi buıryq daıyndap jatyrmyz. Reseıde ol tizimge 36-38 aýrý kirgizilgen, keıbir elderde tipti 10 aýrý bar. Biraq budan basqalar baqylaýda bolmaıdy degen uǵym týmaıdy. Munda naýqastyń ózi de jaýapty bolýy qajet. Ýaqtyly tekserýge kelmeıtin bolsa, onyń saldary úshin, tólem bóligi boıynsha, oǵan da jaýapkershilik júkteledi», - deıdi E. Birtanov.

Medısına mekemelerin sıfrlandyrý jaıyna toqtala kele, mınıstr bıyl qaǵazsyz qujat aınalymyn tolyqtaı engizý josparlanyp jatqanyn aıtty. Mınıstrlik ókilderi bul dárigerlerdiń jumysyn jeńildetetinine senimdi bolyp otyr. E. Birtanov kadrlar jáne jalaqy saladaǵy basty máselelerdiń biri ekendigin tilge tıek etti.

«Memlekette densaýlyq saqtaý salasyna quıylyp jatqan qarjyny 20-30%-ǵa arttyrý múmkindigi joq. Biz ishki rezervterdi qarastyrýymyz qajet. Turaqty (stasıonarlyq) mamandandyrylǵan medısınalyq kómekke qarjynyń 60%-y ketedi. Biz aqshanyń kóp bóligin aýrýlardyń aldyn alýǵa emes, saldarymen kúresýge jumsap jatyrmyz. Jańa normatıv boıynsha stasıonarlardyń sanyn eki esege qysqartamyz», - dedi ol.

Sonymen qatar qysqartý aýdandyq aýrýhanalarǵa qatysy joq ekenine sendirip otyr. Aýrýhanalardyń tıimdiligin arttyrý jóninde mınıstr 10 usaq aýrýhana salýdyń ornyna únemdi rejımde jumys isteıtin 5-6 iri aýrýhana salǵan jón, aýrýhanalardy materıaldyq-tehnıkalyq jabdyqtaýdyń da aıtarlyqtaı qıyndyqtary bar ekendigin aıtty.

E. Birtanov dárigerlerdiń jalaqysyn uıymdardyń óz rezervteriniń esebinen arttyrýǵa keńes berdi. Kóptegen aýrýhanalar sharýashylyǵy esebinen jumys isteıdi, olar laýazymdyq eńbekaqylar men syıaqylar júıesin ózderi belgileıdi. Ondaı aýrýhanalarda jalaqy búdjettik aýrýhanalarǵa qaraǵanda 20%-ǵa joǵary.

Onyń aıtýynsha, ákimshilik shyǵyndardy, sonyń ishinde bas dárigerdiń orynbasarlary sanyn da qaıta qaraý qajet. Al shaǵyn aýrýhanada bas dárigerdiń orynbasary bireý bolsa da jetkilikti.