Qazirgi tańda ata – baba dástúrin ulyqtaý men órkenıetti órleter saltymyzdyń tasada qalyp, tól meıramdarymyzdyń umytylyp bara jatqandyǵy jasyryn emes. Osy tusta elimizdiń bas basylymy «Egemen Qazaqstan» gazetine QR Mádenıet jáne sport mınıstri Arystanbek Muhamedıuly «Naýryz eń áýeli baldyrǵandarǵa arnalýy kerek» degen taqyrypta aýqymdy suhbat berip, Naýryzǵa qajet irgeli izdenisterdi atap ótip, segiz usynys jasaǵan edi.
Elbasymyzdyń ult ıgiligi úshin jasaǵan «Bolashaqqa baǵdar: rýhanı jańǵyrý» strategıalyq baǵdarlamasyn negizge ala otyryp, Naýryz meıramyn ulyqtaýdy qolǵa alǵan mınıstr qoǵamnyń barlyq máselelerin qamtı kele, úlken senim artyp otyr.
Ulystyń Uly kúni – Áz-Naýryz meıramy ultymyzdyń bar asyl qundylyqtaryn kórsetip, ulyqtaýǵa tamasha múmkindik beretin mereke. Bul kúni jaqsy men jaman, aq pen qara degen uǵym sanada bolsa da, jer betinde tek kún shýaǵyn shashqan, bir-birine meıirimmen qarap, keshirimdi bola bilgen, jarqyn júzi bal-bul jaınaǵan qalyń jurttyń ortaq merekesi. Bul kúnde adamdar bir-birimen tós qaǵystyryp, renish bolsa, keshirim surap, aıtar alǵysy bolsa jaýdyryp, jaqsy kún men nurly tirshilik úshin shúkirshilik etetin kún.
Osy oraıda QR Ulttyq kitaphanasy mınıstrdiń usynysyna qoldaý bildirip, túrli sharalardy bastap ta ketti. Máselen, naýryz aıynyń birinshi juldyzynda «Alǵys aıtý» kúnine oraı «Alǵysym sheksiz halqyma» atty merekelik konsert pen fleshmob ótti. Ulystyń uly kúnin bir aı boıy toılaýdy usynǵan Mınıstrdiń usynysy osylaısha birinshi naýryzdan bastaý aldy.
Almaty qalasyndaǵy Dostyq úıinde Ulttyq kitaphana kóshpeli kitap kórmesin uıymdastyrdy. Kórmege Ulttyq kitaphana qorynan ártúrli ult ókilderiniń tarıhyn jáne qazirgi ómirin, jer aýdarý úderisterin, olardy ornalastyrýdy, mádenıetin, salt-dástúrlerin, ádet-ǵuryptaryn jáne ónerin pash etetin, qazaq, orys jáne aǵylshyn tilderinde 100-den astam basylymdar usynyldy.
«Naýryz eń áýeli baldyrǵandarǵa arnalýy kerek» dep mınıstr Arystanbek Muhamedıuly aıtqandaı, QR Ulttyq kitaphanasy «Qazaqstan kitaptary» zalynda balalar men jasóspirimderge arnalǵan kitap kórmesin uıymdastyryp, bul aıdyń qadir-qasıetin, mán-mańyzyn túsindirýge atsalysýda.
Naýryz meıramy barsha qazaqstandyqtar úshin erekshe mereke. Kóktem kelip, jańa jyldyń, jańa ómirdiń bastalýy. Sol sebepti de QR Ulttyq kitaphanasynyń qyzmetkerleri «Naýryz meıramyn bir aı boıy toılaý» týraly usynysty qýana qoldaıdy, jáne ol úshin barynsha atsalysady. Sondaı-aq, aldaǵy ýaqytta 22 naýryz Ulystyń Uly kúnine oraı QR Ulttyq kitaphanasy merekelik sharalardy uıymdastyryp, ulttyq meıramdy ulyqtaýdy jalǵastyratyn bolady.
Qurmetti, qazaqstandyqtar! Sizderdi Ulystyń Uly kúni – Naýryz meıramymen quttyqtaımyn! Elimiz tynysh, jurtymyz aman bolsyn! Aq mol bolsyn! Naýryz – jyl bastaýy! Barshańyzǵa jańa ómir, jańa qadamdar men jańa belester tileımin! Kók baıraǵymyz kókte jelbireı bersin! Áz-Naýryz qutty bolsyn!
J. T. Seıdýmanov,
QR Ulttyq kitaphanasynyń
dırektory
