Bes bastamanyń ishindegi taǵy bir ózektisi memlekettik granttardyń sanyn arttyrý jáne bilimgerlerdi jataqhanamen qamtý máselesi. Iá, atalmysh sala boıynsha da atqarylar is aýqymdy. Elbasynyń sheshimimen 2018-2019 jyly bólinetin qosymsha granttar bilim salasyna eleýli serpin beretini anyq. Oqý oqyp, izdenemin degen jastardy qoldaý, bilimge, jataqhanaǵa degen qoljetimdilik boıynsha jarıa etilgen jaqsy jańalyq - jalpyǵa ortaq jaǵymdy is, dep habarlaıdy Qamshy.kz aqparat agenttigi Almaty oblysy ákimdiginiń baspasóz qyzmetine silteme jasaı otyryp.

Buǵan deıin elimiz boıynsha memleket tarapynan joǵary oqý oryndaryna 54 myń grant bólinip kelgen. Endigi kezekte Elbasy bastamasymen atalmysh tegin oqý júıesi 20 myń grantpen tolyqtyrylmaq. Al óńirimizde oblys ákiminiń grantymen jergilikti búdjet esebinen 438 bilimger tálim alsa, endi bul kórsetkish 100 grant kóleminde kóbeımek. Bul úlken jetistik, úlken múmkindik. Bolashaqqa degen umtylysy bıik ár bala úshin joǵary deńgeıdegi qoldaý - asqaq armannyń oryndalýyna ashylǵan dańǵyl jol. Kózdelip otyrǵan kórsetkishterdiń osy sátten bastap iske asary da anyq. Sebebi, Elbasy joǵary bilim alýdyń qoljetimdiligi men oqý sapasyn arttyrý úshin birqatar sharalardy usynyp, naqty sheshimi bolýyn talap etti. Baǵdarlamanyń maqsaty boıynsha granttyń basym bóligi tehnıkalyq, ınjenerlik, aqparattyq-tehnologıalyq mamandyqtarǵa bólinbek. Osy arqyly tórtinshi ónerkásiptik revolúsıa jaǵdaıyndaǵy jańa ekonomıkada suranysqa ıe bolatyn bilimi men biligi joǵary maman daıarlaý múmkindigi paıda bolmaq. Mine, erteńgi el tizginin ustaıtyn jastarǵa degen qamqorlyqtyń kórinisi osy. Elbasy sózindegideı orta mektep túlekterin joǵary bilimmen qamtý, olardyń oqý júıesine nazar aýdaryp, sapasyn kóterý  - álemdik trend. Sondaı-aq Prezıdent bilimgerlerdiń standartqa saı sapaly bilim alýymen qatar olardyń turatyn jerine jaǵdaı jasaý máselesin de qarastyrǵan. Bul da búgingi kúnniń ózekti máselesine aınalǵan bolatyn. Kez kelgen oqý ornynyń bilimgerdi jataqhanamen qamtýy kenjelep kelgeni bárimizge belgili. Endi bul taqyryp ta  sheshimin tappaq. Osy oraıda Elbasy usynǵan jekemenshik seriktestigi qaǵıdasymen Stýdentter úıin salýdy bastaý máselesi óte utqyr da utymdy oı ekendigi anyq. Jaqsylyq jarshysy bolǵan jańalyqtyń ereksheligi 2022 jyldyń sońyna deıin keminde 75 myń oryndy jańa jataqhana salynbaq. Endigi kezekte «jumyla kótergen júk jeńil» degendeı, bárimiz birge berekeli iske bastamashy bolaıyq.