Aman Ǵumarov jaqynda kórermenge jol tartqan «Tar zaman» serıalynda Muhtar Áýezovtiń jastyq shaǵyn somdaǵan. Qamshy.kz aqparat agenttiginiń tilshisine bergen suhbatynda akter óz róliniń aýyrtpalyǵyn aıtty. Óner jolyndaǵy ózgeshe taǵdyrynan syr shertti. Teatr, kıno salasyndaǵy áriptesterin de áńgimege arqaý etti.

- Sizge Muhtar Áýezovtiń róli berilgende qandaı sezimde boldyńyz?

- Birinshiden, elimizdi, jerimizdi búgingi urpaqqa jetkizý úshin jan qıǵan ata-babalarymyzǵa alǵys aıtqym keledi. Qanshama batyrdyń tógilgen qany – bizdiń táýelsiz elde ómir súrip jatqanymyzǵa birden-bir sebep. Al ózderińizge belgili «Tar zaman» fılmi azattyq jolynda arpalysqan Alash arystary jaıynda túsirildi. Sol zamanda qazaq nendeı kúı keshti, qalaı kúresti, qandaı zardap shekti – bári qamtyldy. Bir aıta keterligi, bul – Alash arystary týraly Qazaqstandaǵy tuńǵysh fılm.

Al Muhtar Áýezovtiń rólinen qatty qoryqtym. Shyny kerek, áli de qorqamyn. Sebebi ol kisi – bar qazaq úshin alyp adam, aıtýly tulǵa. Biraq qansha seskensem de, uly jazýshynyń róli maǵan buıyrǵanyna rıza boldym. Mártebesin de, jaýapkershiligin de túsindim. Osyndaı múmkindik bergen rejıser Murat Bıdosovqa alǵysym sheksiz. Muhtar Áýezov syndy tulǵany rólin somdaý – kez kelgenniń basyna qona bermeıtin úlken baq.

- Róldi alyp shyǵa aldyńyz ba? Kóńilińiz toldy ma?

- «Kóńilim toldy, róldi alyp shyqtym» dep aıta almaımyn. Baǵany halyq bere jatar. Negizi Muhtar Áýezovti somdaýym úshin áli talaı róldi sahnalap, birneshe fılmge túsýim kerek. Biraq shamam kelgenshe tyrystym. Boıymda bar talantymdy osy rólge saldym. Halyq pen joǵary ıntellekt ıesi Muhtar Áýezovtiń arasyndaǵy lınıany tabýǵa talpyndym. Tym ásirelep nemese tym arzandatyp jiberýden aýlaq boldym. Kem-ketigi bolsa, halyqtan keshirim suraımyn...

- Buǵan deıin qandaı fılmderge tústińiz?

- Eń úlken jobanyń biri – rejıser Asqar Uzabaev túsirgen «Súıe bilseń» serıalynda jas balanyń rólinde oınadym. Serıaldyń eki maýsymyna da tústim. Onda búgingi zamannyń jastary, solardyń ómiri, mahabbaty, qalaýy beınelenedi. Halyqtyń kóńilinen shyqqan týyndy boldy. Budan bólek, jaqynda ǵana kórermenge jol tartqan «Klasstastar» fılminde Aıdos degen balanyń beınesin somdadym. Ózderińizge belgili, ol – komedıa. Jalpy osy ýaqytqa deıin maǵan jas, erke balalardyń róli buıyrǵan eken.

- Qandaı róldi armandaısyz?

- Tabıǵatym – lırıka. Degenmen, menińshe, akter kez kelgen rólge ıkemdi bolýy kerek. Komedıa, tragedıa dep talǵamaı, bárin alyp shyǵa alatyn talant qajet. Sol úshin ózim de eńbektenip kelemin. Ózimdi kórsetip, bıikke bastaıtyn rólderim áli kóp.

Jalpy mahabbat sahnasynda erekshe lırıkti oınaǵym keledi. Akterlik qabiletimdi aıshyqtaı túsetin psıhologıalyq rólderdi de somdap, baǵymdy synap kórsem deımin.

- Janyńyzǵa lırıkaǵa jaqyn bolsa, óleń shyǵaratyn qabiletińiz bar shyǵar?

- Shyǵaramyn, biraq ózim úshin. Aqyn emespin.

- Alǵash teatrda oınadyńyz ba, álde kınoda ma?

- Teatrdyń orny men úshin bólek. Onyń sahnasy, aýrasy adamǵa erekshe dem beredi. Seze alatyn jan úshin kıesi bar. Ózim Temirbek Júrgenov atyndaǵy óner akademıasynyń túlegimin. Teatradǵy alǵashqy qadamym – Ǵabıt Músirepov atyndaǵy Qazaq memlekettik akademıalyq balalar men jasóspirimder teatry boldy. Keıin Aıgúl Imanbaeva ashqan A.I. teatrynda jumys istedim. Qazir «Astana Múzıkl» teatryn A.I.-men qatar alyp júrmin. Alǵash teatrǵa qadam bastym, teatrǵa ǵashyq boldym, súıdim, oǵan ómirimdi arnaýǵa barmyn. Al jalpy teatr da, kıno da janyma jaqyn, ekeýin bólip-jarmaımyn.

- Ózińiz aıtqan Aıgúl Imanbaeva qatardaǵy aktrısa bolyp júrip, jekemenshik A.I. teatryn qurdy. Sol sekildi Azamat Satybaldy da teatr ashyp aldy. Sizde ondaı jospar bar ma?

- Bolashaqtyń enshisinde. Olar jeke teatryn ózderiniń adal eńbegimen ashty. Qazaqtyń ónerine jany ashıtyn nar tulǵalar dep tanımyn. Nege ashpasqa? Qaıta teatr kóbeıse, elimizdiń mádenıeti artar edi.

Al ózim teatr asham dep sizge ýáde bermeı-aq qoıaıyn. Degenmen, jasyryp qaıteıin, armanym bar. Biraq teatr ashý úshin talaı eńbektenip, sol kisilerdiń dárejesine jetýim kerek.

- Akter óz róline qalaı daıyndalady?

- Akter óz róline ár sekýnd saıyn daıyndalady. Máselen, men sizben suhbattasyp otyryp, óz rólimdi oılap otyrmyn. Ról – adamnyń kıimi sekildi bolýy kerek. «Uıqyńnan tur» degende kıimińdi kıip alyp, rólge kirip ketýiń kerek. Ról adamǵa ońaı kelmeıdi, aspannan túse salmaıdy. Kıesin túsine bilgen jan joǵary deńgeıde somdaıdy. Árıne, ózim de kez kelgen róldi alyp shyǵýǵa tyrysamyn.

«Romeo – Djýletta» qoıylymynda maǵan berilgen Merkýsıonyń róli men úshin úlken tájirıbe boldy. Merkýsıo meniń dosym da, syrlasym da, muńdasym da bola aldy. Merkýsıoda temperament bolý kerek, ol minezdi, erkindikti qajet etedi.  Ár rólden ózime uqsaıtyn jáne uqsamaıtyn qasıetterin izdeımin. Sodan bir túıin jasaımyn. Al rólge kire almaı jatqan jaǵdaıda aǵa-ápkelerimmen aqyldasamyn. Tabıǵatqa shyǵyp, mıymdy tynyqtyramyn, mýzyka tyńdap, túrli janrda fılmder kóremin.

- Ról akterdi tárbıeleı me?

- Jańa aıtyp óttim ǵoı, Merkýsıo syrlasym boldy. Ózime qarsy tustarynda «nege bulaı istedi, nege olaı aıtty?» dep oıǵa batamyn. Ár akter óz rólin aqtap alýy tıis. Men de jaqsy jaǵynan kórsetýge tyrysamyn. Ózińe tıesili róldegi keıipkerdiń jan dúnıesin túsinip alamyn. Qarsy shyǵatyn tustarym da kóp bolady.--Óner úshin obrazyńyzdy ózgertýge daıynsyz ba?

- Iá, daıynmyn. Buǵan deıin meniń shashym uzyn bolǵan. Muhtar Áýezovtiń róli úshin uzyn shashymdy buıraladym. «Klasstastar» fılmi úshin shashymdy qıdym. Qysqasy, rejıser menen qandaı obraz kórgisi kelse, men soǵan qaraı ıilemin.

- Akter ómirde neni qurban etedi?

- Bir akter bolǵan. Bir-eki saǵattan keıin teatrda qoıylymy bar, sol sátte oǵan sýyq habar keledi. Jaqyn baýyrynan aıyrylǵan. Biraq akter qoıylymdy úzbeı, óz rólin oınap shyqty. Tipti, qaıǵyly halin halyqqa bildirgen joq. Jaqyny ómirden ótip ketse de, janazasyna bara almady. Árıne, mundaı jaǵdaılar bolmaı-aq qoısyn, degenmen men úshin ondaı kisiler úlken qurmetke laıyq.

- Ózińiz úshin ónerdiń orny qandaı?

- Óner joly jeke ómirime kedergi keltiredi. Ony jasyrmaımyn. Alaıda shamam kelgenshe bárin qamtýǵa tyrysamyn. Óner – meniń balam, meniń súıgenim, barym da, narym da. Sol sebepti birinshi orynda. Atam kúıshi, aqyn bolǵan. BQO-daǵy Jańaqala aýdany Qyzyloba aýylynyń týmasy. Óner maǵan qannan daryǵan shyǵar dep oılaımyn. Sonymen qatar aǵam Omarov Samır án aıtýǵa, dombyra tartýǵa baýlydy. Sol kisiniń arqasynda túrli baıqaýlarǵa qatystym. Sóıtip júrip arman qýyp Almatyǵa keldim de, óner akademıasyna qujat tapsyrdym. Negizi ánshi bolamyn dep oılaǵanmyn, biraq ustazym, jetekshim Asqat Maemırov qolymnan jetektep aparyp, akter mamandyǵyna túsirdi.

- Eger qolyńyzǵa bılik tıse, óz salańyzda neni ózgerter edińiz?

- Bir mysal aıtaıyn, opera qazaqtyń tól týyndysy emes. Biraq damydy, aýyz toltyryp aıtarlyqtaı opera ánshilerimiz jetkilikti. «Anany ózgertý kerek, mynaý qate» dep kóńiliń tolmaı, halyqqa muń shaqqannan góri áreket etken durys. Ár adam ózin damytsa, el de damıdy.

- Áńgimeńizge raqmet!