Almaty qalasynyń ákimdigi egde adamdardy belsendi ómirge tartý, olardyń áleýetin tıimdi paıdalaný, urpaqtar úndestigin qalyptastyrý,aǵa urpaqty qoldaý maqsatynda «Belsendi uzaq ómir» atty Jol kartasynyń jobasyn jasady. Búgin qalanyń Qoǵamdyq keńesiniń keńeıtilgen otyrysynda Almaty ákimi Baýyrjan Baıbek egde adamdarǵa jaqsy jaǵdaı jasaýǵa baǵyttalǵan joba týraly aıtty.

Baýyrjan Baıbek bıylǵy jyly elimizde aýqymdy áleýmettik reformalar - Memleket basshysynyń Bes áleýmettik bastamasynyń qolǵa alynǵandyǵyn atap ótti. Halyqtyń barlyq tobynyń múddesin qorǵaıtyn bul bastama azamatardyń ómirin jaqsartýǵa, qoǵamnyń áleýmettik birligin nyǵaıtýǵa baǵyttalǵan. Almaty qalasynyń 2020 jylǵa deıingi damý Baǵdarlamasynyń basty negizi - ár adamǵa degen qamqorlyq. Atalǵan Baǵdarlamanyń basty ereksheligi munda jastarǵa, zeınetkerlerge, kópbalaly otbasylarǵa, ıaǵnı adamdardyń barlyǵyna tıisti qoldaý kórsetiledi.

«Eń aldymen biz áleýmettik qoldaýǵa zárý jandarǵa kómek kórsetemiz. Memleket basshysynyń tapsyrmasy boıynsha memlekettik bala baqshalardyń aqysy eki ese tómendedi. Almatyda qabyldanǵan Jastarǵa qoldaý kórsetý kartasy aıasynda stýdentter jataqhanasy salynýda, jas otbasylar páter alý úshin alǵashqy tólemsiz 5%-dyq nesıe alady. Degenmen, azamattar arasynda qamqorlyqty qajet etetin taǵy bir top bar. Olar – búgingi kúni Almatynyń 12 paıyzyn quraıtyn egde jandar. EYDU múshe elderde 60 jáne odan da joǵary jastaǵylar zeınetaqymen shektelmeı, tolyqqandy ómir súrýde. Bizdiń qarttarymyz da ózderin tyń ári qamqorlyqta ekendikterin sezinýleri tıis.Sondyqtan bıylǵy jyldy biz Almatyda aǵa urpaqqa qoldaý kórsetý aıasynda ótkizetin bolamyz», - dedi Baýyrjan Baıbek.

Densaýlyq saqtaýdyń Búkilálemdik uıymynyń málimetteri boıynsha zeınetkerlerdi belsendi ómirge tartý olardyń jaqsy ómir súrýleri men uzaq jasaýlarynyń basty quraly bolyp tabylady. Qazirgi kezde Almaty qalasynda 222 myń zeınetker bar nemese olar jalpy turǵyndardyń 12,5% quraıdy.

Almaty qalasynyń ákimdigi egde adamdardy belsendi ómirge tartý, olardyń áleýetin tıimdi paıdalaný, urpaqtar úndestigin qalyptastyrý,aǵa urpaqty qoldaý maqsatynda «Belsendi uzaq ómir» atty Jol kartasynyń jobasyn jasady. Jobany jasaý barysynda jalpy saraptama júrgizildi, halyqaralyq tájirıbe zertteldi, sarapshylar men ÚEU-dar tartyldy.

Jobany júzege asyrý aıasynda belsendi uzaq ómir Ortalyǵy qurylady, munda kitaphana, EDSH-dyń fıtnes-zaly, emdik ıoga, aerobıka, shahmat, toǵyzqumalaq, domıno jáne basqa da zaldar jumys isteıdi. Ortalyqta kompútrlik aǵartýdyń, aǵylshyn tiliniń kýrstary, motıvasıalyq semınarlar men sheberlik synyptary ashylady. Qoǵamdyq birlestiktermen yntymaqtastyqta kún saıyn tegin zańgerlik, psıhologıalyq, medısınalyq konsýltasıalar kórsetiledi.

«Ár adamnyń qyzyǵýshylyǵy boıynsha klýbtar jumys isteıdi, mysaly parkter men skverlerde skandınavıalyq ádispen júrý, top bolyp mýzeılerge, teatrlarǵa, kórmelerge jáne basqalarǵa barý uıymdastyrylady. Jol kartasynyń mańyzdy bóligi urpaqtar úndestigi - jastar men egde jandardyń úılesim tabýy, ol úshin birikken ekskýrsıalar, oıyndar, túrli sharalar qarastyrylǵan», - dedi Almaty qalasynyń Jumyspen qamtý jáne áleýmettik baǵdarlamalar basqarmasynyń basshysy Meıirjan Otynshıev.

Halyqty keń qamtý úshin komýnaldyq jáne komersıalyq menshik negizderinde áleýmettik klýbtar ashylady. Árbir bıznesmen tegin jumys isteıtin áleýmettik klýb ashý týraly ótinim bere alady,olardyń turaqty ári júıeli jumysy úshin memorandým jasalady. Bıylǵy jyly qalanyń barlyq aýdandarynda 40-qa jýyq áleýmettik klýbtar ashý josparlanǵan.

Aqyly baseınder, sport zaldary, bı stýdıalary sıaqty ınfraqurylymdardyń qoljetimdiligi ári deneshynyqtyrýmen jáne sportpen apta saıyn aınalysýy úshin ár aýdannyń ortasha 100 zeınetkerin qamtıtyn áleýmettik joba jasaldy.

«Biz aýylsharýashylyq týrızmniń tıimdi quraly bolyp tabylatyn ári álemde balamasy joq Agro-kraýdsorsıng jobasyn qolǵa alýdy josparladyq. Ol úshin aýylsharýashylyǵyna qatysty jer ýchaskesi bólinedi jáne bazalyq ınfraqurylymdy uıymdastyratyn operator belgilenedi. Kóshetter men qajetti zattar operatorlar men jeke ınvestorlar esebinen atqarylady. Aýylsharýashylyq ónimine ketken shyǵyndy óteý úshin ónimniń 30%-yn operator, alady, al qalǵan 70%- y zeınetkerge tıesili, ol ózi paıdalanady nemese jármeńkege aparyp satýyna bolady»,- dedi Almaty qalasy Jumyspen qamtý jáne áleýmettik baǵdarlamalar basqarmasynyń basshysy.

Almatyda bıylǵy jyly Jol kartasy aıasynda zeınetkerlerdi qalanyń belsendi ómirine tartý úshin 100-den astam mádenı- sporttyq, ıntellektýaldy sharalar ótkiziledi. Mysaly, «Talanttar konkýrsy», «Almaty- meniń súıikti qalam» fotokórmesi jáne zeınetkerler úshin arnaıy bos oryndar jármeńkesi.

Egde jandar arasynda áleýmettik týrızmdi damytýǵa aıryqsha nazar aýdarylady. Osy maqsatta qalalyq jáne taýly baǵyttar, ekotýrızm aımaqtary, toptyq serýender, týrısik nysandardy jaıaý aralaý, týrızm boıynsha sheberlik synyptary uıymdastyrylady.

Qoǵamdyq keńestiń otyrysynda Jol kartasyn talqylaý barysynda arnaıy Ata-Apa.kz ınternet- portalyn qurý usynyldy, munda egde jandarǵa paıdaly aqparattar, áleýmettik jáne memlekettik baǵdarlamalar, eńbek bırjasy jáne basqalar týraly habarlar jaráılanady. Mysaly, eger zeınetker repetıtor qyzmetin kórsetkisi kelse, úıinde otyryp uzaq ómir súrý Ortalyǵyna telefon shalyp, ózi týraly málimetterdi qaldyra alady.

Bulardan ózge, biryńǵaı Call-center qurý da qarastyrylǵan, munda senim qyzmeti uıymdastyrylyp, áleýmettik qyzmet pen nysandar týraly aqparat alýǵa bolady. Buqaraǵa kórsetiletin áleýmettik qyzmettiń spaasyn arttyrý

úshin áleýmettik zertteýler men qyzmet alýshylardyń pikirin bilý turaqty júrgiziledi.

Aıta keterligi, qazirgi kezde Almatyda egde jandarǵa barynsha nazar aýdarylyp, qoldaý kórsetilýde. Jyl saıyn 4 myń zeınetker sanatorıalyq-kýrorttyq joldamalar alady. Áleýmettik jaǵdaıy tómen 17 myń zeınetkerge, onyń ishinde 2 myńnan astamyna komýnaldyq qyzmet tólemi boıynsha kómek beriledi. Egde jastaǵy zeınetkerlerge qoǵamdyq kólikte 50% jeńildik kórsetiledi, 75 jastan asqandar jolaýshylar kóligimen tegin júredi. Sport uıymdarynda da 50% deıin jeńildikter bar.