Halyqqa memleket esebinen tegin kórsetiletin medısınalyq qyzmet paketi kezeń-kezeńmen ońtaılandyrylady. Bul týraly "Áleýmettik medısınalyq saqtandyrý qory" KEAQ Almaty fılıaly dırektory Tileýhan Ábildaev málimdedi.

Aıtýynsha, alǵashqy kezeńde, ıaǵnı, 2018 jyly bastapqy medısınalyq-sanıtarlyq kómek (BMSK), konsýltatıvtik-dıagnostıkalyq kómek sheńberinde kórsetiletin qyzmetter tizimin jasaý, turaqty baqylaýdy qajet etetin sozylmaly syrqattar tizimin qaıta qaraý, BMSK deńgeıinde baqylaýǵa kelmeıtin syrqattardy tizimnen alyp tastaý, áleýmettik mańyzy bar aýrýlar tizimin ońtaılandyrý, stasıonardy almastyratyn kómek deńgeıinde júrgiziletin nozologıalar, manıpýlásıalar men hırýrgıalyq otalar tizimin qalyptastyrý syndy jumystar josparlanǵan. Ekinshi kezeńde mindetti áleýmettik medısınalyq saqtandyrý júıesin engize otyryp, TMKKK paketiniń jańa úlgisin ári qaraı damytý kózdelgen. Bizdiń maqsatymyz, qos paketti qatar damyta otyryp, shuǵyl jáne kezek kúttirmetin jaǵdaıǵa dýshar bolǵan árbir adamǵa kómek kórsetý jáne qoǵam úshin mańyzy bar syrqattardy baqylaýda ustaý. Qarapaıym tilmen aıtqanda, birde-bir adam medısınalyq kómekten qaǵylmaıdy degen sóz. Sodan keıingi kezeńdegi maqsat - tizimdi turaqty túrde jańartyp otyrý, eskirgen tehnologıalardan bas tartý. Sebebi medısınalyq tehnologıalar úzdiksiz damý ústinde.

Sonymen, TMKKK paketine qandaı qyzmet túrlerin engizý usynylyp otyr?

T.Ábildaevtyń sózine súıensek, buǵan dárigerdiń jedel kómegin qajet etetin shuǵyl jaǵdaılarda, áleýmettik mańyzy bar aýrýlarǵa (týberkýlez, VICH-indeti, psıhıkalyq aýytqýlar, qaterli isik t.b.) shaldyqqandarǵa kórsetiletin medısınalyq kómek jatady. Sondaı-aq, bul tizimge sońy múgedektikke ákep soqtyratyn, demografıalyq ósimge zalal keltiretin juqpaly emes sozylmaly aýrýlardyń negizgi túrlerin, qorshaǵan ortaǵa qaýip tóndiretin ótkir juqpaly syrqattardy dıagnostıkalaý men emdeý de kiredi. TMKKK paketine kiretin bastapqy medısınalyq-sanıtarlyq kómek ishinde: profılaktıkalyq ekpeler, toq ishek, sút bezi, jatyr moıny isigine skrınıng, qan aınalym júıeleriniń aýrýlaryna tekserý, gloýkoma, 1 jasqa deıingi balalardy jáne júkti áıelderdi qaraý, sozylmaly aýrýlardy qadaǵalaý (29 top), áleýmettik mańyzy bar syrqattardy baqylaý (aýrýdyń 5 túri boıynsha), jedel járdem, zertanalyq dıagnostıka (126 qyzmet boıynsha), qondyrǵylardyń kómegimen dıagnostıka jasaý (qyzmettiń 89 túri boıynsha), sozylmaly nemese áleýmettik aýrýlar boıynsha dárigerdiń keńesi de bar. TMKKK paketine usynylǵan konsýltatıvtik-dıagnostıkalyq kómek túrleri:

- bastapqy medısınalyq-sanıtarlyq kómek deńgeıinde baqylaýǵa bolatyn sozylmaly aýrýlardy turaqty baqylaý (bul boıynsha 24 túrli syrqatqa shaldyqqan 2,4 mln adamǵa kómek kórsetiledi;

- áleýmettik mańyzy bar aýrýlardy anyqtaý jáne emdeý;

Mindetti áleýmettik medısınalyq saqtandyrý paketine baǵasy qymbat laboratorlyq dıagnostıka qyzmetteri, TMKKK paketine enbegen syrqattar boıynsha ambýlatorlyq deńgeıde dári-dármekpen qamtamasyz etý, stasıonardy almastyratyn kómek, medısınalyq ońaltý jáne densaýlyqty qalpyna keltirý syndy qyzmetterdi engizý usynylyp otyr, deıdi Tileýhan Shildebaıuly.

MSQ Almaty qalalyq fılıaly dırektorynyń sózinshe, MÁMS deńgeıindegi konsýltatıvtik-dıagnostıkalyq kómekke mynadaı qyzmetter enýi tıis:

- eresekterdi profılaktıkalyq tekserýden ótkizý;

- 18 jasqa deıingi balalardy skrınıngtik tekserýden ótkizý;

- 18 jasqa deıingi balalarǵa, múgedekter men zeınetkerlerge, kóp balaly analarǵa stomatologıalyq qyzmet kórsetý;

- sala mamandarynyń qabyldaýy, keńesi men em-dom sharalary (35 profıl boıynsha);

- bastapqy medısınalyq sanıtarlyq kómek deńgeıinde baqylaýǵa jatpaıtyn sozylmaly aýrýlarǵa shaldyqqan naýqastardy baqylaý (nevrologıalyq, endokrındik, tuqym qýalaıtyn aýrýlar, óse kele paıda bolǵan aqaýlar, tamyr, súıek, býyn aýrýlary, jaraqattardyń saldarynan bolatyn aýrýlar, zat almasý júıesi qyzmetiniń buzylýy t.b.);

- baǵasy qymbat laboratorlyq dıagnostıka (qyzmettiń 750 túri: mıkroelementterge, fermentterge, keıbir dárilik quraldarǵa, gormondarǵa, dárýmenderge, onkomarkerlerge, aýtoımmýndy markerlerge, alergenderge, vırýsty gepatıt markerine bıohımıalyq zertteý, PSR dıagnostıka);

- ınstrýmentaldy zertteý jáne fýnksıonaldy dıagnostıka (228 qyzmet boıynsha).